Report sang mga Manugbantala sang Ginharian

Pagpangita sa mga Takus sa Naligwin nga mga Duog sang Australia

ANG pila ka naligwin nga mga duog sa malapad nga nasulod nga bahin sang Australia wala mabantalaan sang mga Saksi ni Jehova sa sulod sang 12 ka tuig. Gani ang mga Saksi ni Jehova sa Darwin, ang kapital nga siudad sang Naaminhan nga Teritoryo, nag-organisar sing maid-id nga siam ka adlaw nga kampanya sa pagbantala agod pangitaon ang mga takus.​—Mateo 10:11.

Nagsugod ang pagplano sing maayo 12 ka bulan antes sang kampanya, lakip sa paghimo sing mga mapa para sa kapin sa 800,000 kilometros kuadrados​—mga tatlo ka pilo ang kalaparon sangsa New Zealand. Agod mahangpan kon daw ano kalapad ining naligwin nga teritoryo, hunahuna lamang nga ang promedyo nga distansia sang dalan sa isa ka rantsuhan halin sa atubangan nga gawang pakadto sa balay kapin sa 30 kilometros! Dugang pa, ang pila ka rantsuhan mga 300 kilometros ukon kapin pa ang antad sa isa kag isa.

May kabug-usan nga 145 ka Saksi nga mga boluntaryo ang nagpakigbahin sa kampanya. Ang iban naghalin pa sa malayo nga lugar subong sang Tasmania. Nag-abot naman ang iban sakay sa four-wheel-drive nga mga salakyan nga puno sing kagamitan para sa pagkamping, mga reserba nga mga piesa sang salakyan, kag gasolina ukon krudo. Ginkarga sang iban ang ila kagamitan sa mga treyler. Dugang pa, duha ka bus nga makapalingkod sing 22 ka tawo ang gin-arkilahan agod masakyan sang mga wala sing nagakaigo nga mga four-wheel-drive nga salakyan. Ang mga nagsakay sa bus nagpanaksi ilabi na sa mga pumuluyo sang magagmay nga mga banwa sa ginpili nga teritoryo.

Antes maghalin, naghimo sing kahimusan para sa mga pamulongpulong kag mga demonstrasyon ang responsable nga mga kauturan nga lalaki agod mag-aman sing mga panuytoy kon paano ipresentar ang maayong balita sa sining di-kinaandan nga teritoryo. Halimbawa, agod makabantala sing epektibo sa mga komunidad sang Aborigine masami ini nagakinahanglan nga sundon ang pila ka pamaagi kag talupangdon ang ila mga kustombre. Ang pag-amlig sa palibot ginhinun-anunan man agod indi mahalitan ang ilahas nga kabuhi.

Nakatigayon sila sing madamo nga makalilipay nga mga eksperiensia. Halimbawa, sa isa sang mga minuro sang mga Aborigine, ang mga kauturan naghimos sing isa ka pasad sa Biblia nga pamulongpulong publiko. Ang pangulo nga babayi sa komunidad personal nga nagpahibalo sa mga tawo tuhoy sini. Pagkatapos sini, 5 ka libro kag 41 ka brosyur ang napahamtang sa mga nagtambong. Sa isa pa ka minuro isa ka Aborigine ang nasugilanon. May kaugalingon pa gani sia nga Biblia, nga King James Version, apang daan kag gision na ini. Sang ginpamangkot kon kilala niya ang ngalan sang Dios, nagsiling sia nga huo kag nian ginkuha sa bulsa sang iya dyaket ang daan na nga gua sang Ang Lalantawan. Ginbasa niya sa magasin, nga ginakutlo ang Marcos 12:30, nga nagasiling: “Higugmaa si Jehova nga imo Dios sa bug-os mo nga tagipusuon.” Nagsiling sia, “Nanamian gid ako sa sini nga teksto.” Pagkatapos sang maid-id nga paghinun-anon sa Biblia, ginbaton niya ang isa ka bag-o nga Biblia kag ang iban pa nga pasad sa Biblia nga literatura.

Malapit sa Gulpo sang Carpentaria, nagpakita sing interes sa mensahe sang Ginharian ang isa ka pangulo nga may 400,000 ektaryas nga rantsuhan. Sang ginpakita sa iya ang mga publikasyon nga Ang Akon Libro Sang mga Sugilanon sa Biblia kag Ihibalo nga Nagadul-ong sa Kabuhi nga Walay Katapusan,a namangkot sia kon may iban pa nga literatura nga matigayon sa Kriol nga lenguahe. Tumalagsahon ini nga pangabay bangod bisan pa madamo sa mga Aborigine ang makahambal sing Kriol, diutay lamang ang makabasa sa sini. Nahibaluan sang ulihi sang mga manugbantala nga ang tanan nga 50 ka trabahador sa sini nga rantsuhan makabasa sing Kriol. Nalipay gid ang pangulo nga makatigayon sing literatura sa Biblia sa Kriol, kag malipayon niya nga ginhatag ang iya numero sang telepono agod mapakig-angutan sia.

Sa sulod sang siam ka adlaw sang maid-id nga pagpanaksi, may kadamuon nga 120 ka Biblia, 770 ka libro, 705 ka magasin, kag 1,965 ka brosyur ang napahamtang. Dugang pa, 720 ka pagduaw liwat ang nahimo, kag 215 ka pagtuon sa Biblia ang nasugdan.

Sa pagkamatuod, napaayawan na gid man ang espirituwal nga pagkagutom sang madamo nga takus nga nagalinapta sa sining malapad nga duog.​—Mateo 5:6.

[Nota]

[Mapa sa pahina 30]

(Para sa aktual nga pormat, tan-awa ang publikasyon)

AUSTRALIA

NAAMINHAN NGA TERITORYO

Darwin

Gulpo sang Carpentaria

Sydney

TASMANIA