Mga Pamangkot Gikan sa mga Bumalasa

Ang Deuteronomio 14:21 nagasiling: “Dili kamo magkaon sing bisan ano nga bangkay sang sapat.” Nagasumpakil bala ini sa Levitico 11:​40, nga nagasiling: “Ang nagakaon sang bisan ano gikan sa bangkay sini magalaba sang iya panapton, kag mangin di-matinlo sia tubtob sa gab-i”?

Wala sing pagsumpakilay sa sining duha ka bersikulo. Ang nahauna nga teksto nagasulit sa pagdumili sa pagkaon sing bangkay sang sapat, nga mahimo ginpatay sang ilahas nga mga sapat. (Exodo 22:31; Levitico 22:8) Ang ikaduha nagapaathag kon ano ang himuon sang isa ka Israelinhon kon di-hungod nga nalapas niya ining pagdumili.

Ang katunayan nga gindumili sang Kasuguan ang isa ka butang wala nagakahulugan nga wala gid sing makalapas sini. Halimbawa, may kasuguan batok sa pagpangawat, pagpatay, pagsaksi sing binutig, kag iban pa. Sa amo man nga tion, may mga silot kon lapason ining mga kasuguan nga ginhatag sang Dios. Ining mga silot nagapatuman sang kasuguan kag nagapakita kon daw ano ini ka serioso.

Ang tawo nga naglapas sang pagdumili batok sa pagkaon sing unod sang bangkay sang sapat mangin di-matinlo sa mga mata ni Jehova kag dapat magpaidalom sa nagakaigo nga paagi sa pagpaninlo. Kon indi niya matinluan ang iya kaugalingon sing nagakaigo, ‘manabat siya bangod sa iya sala.’​​—Levitico 17:​15, 16.