Matuod nga mga Panudlo—Diin Mo Ini Masapwan?
GINAPATIYOG sang isa ka lalaki sa Tibet ang isa ka prayer wheel, ang isa ka silindriko nga kahoy ukon metal nga nagaunod sing nasulat nga mga pangadi. Nagapati sia nga ang iya mga pangabay ginasulit sa kada pagtiyog ini. Sa isa ka maaliwanay nga balay sa India, may isa ka diutay nga hulot para sa puja—ang pagsimba nga nagalakip sang paghalad sing incienso, bulak, kag iban pa nga mga butang sa imahen sang nagkalainlain nga mga dios kag mga diosa. Linibo ka kilometro ang kalayuon sa Italya, isa ka babayi sa napunihan nga simbahan ang nagaluhod sa atubangan sang imahen ni Maria, nga iloy ni Jesus, kag nagapangadi samtang nagauyat sing rosarito.
Ayhan nakita mo mismo ang impluwensia sang relihion sa kabuhi sang mga tawo. “Ang relihion . . . may yara importante nga papel sa mga katilingban sa bug-os nga kalibutan sadto kag tubtob karon,” siling sang libro nga The World’s Religions—Understanding the Living Faiths. Sa libro nga God—A Brief History, ang awtor nga si John Bowker nagsiling: “Wala pa gid sing bisan ano nga katilingban sang tawo nga ang Dios wala sing papel, sing masami ang papel subong ang nagakontrol sang tanan nga butang kag ang Manunuga. Matuod ini bisan sa mga katilingban nga ginhungod nga mangin indi relihioso.”
Sa pagkamatuod, ang relihion nagaimpluwensia sa kabuhi sang minilyon ka tawo. Indi bala ini isa ka mabakod nga pamatuod nga ang tawo may espirituwal nga kinahanglanon kag handum? Sa iya libro nga The Undiscovered Self, ginpatalupangod sang kilala nga sikologo nga si Dr. Carl G. Jung ang kinahanglanon sang tawo nga magsimba sa isa ka mas mataas nga gahom kag nagsiling sia nga “makita ini sa bug-os nga maragtas sang tawo.”
Apang, madamo nga tawo ang nagasiling nga wala sila nagapati sa Dios ukon indi sila interesado sa relihion. Ginaduhaduhaan kag ginapanghiwala sang iban ang pagluntad sang Dios bangod wala mapaayawan sang ila nakilal-an nga mga relihion ang ila espirituwal nga kinahanglanon. Ang relihion ginahatagan sing kahulugan subong “debosyon sa pila ka prinsipio; bug-os nga pagkamainunungon ukon pagkatutom; pagkatadlong; mainampuon nga gugma ukon katutom.” Paagi sa sini nga kahulugan, halos tanan nagapakita sing pila ka sahi sang relihioso nga debosyon sa iya kabuhi. Nagalakip ini bisan sa mga ateista.
Sa sulod sang linibo ka tuig sang maragtas sang tawo, ang mga panikasog sang tawo nga paayawan ang iya espirituwal nga kinahanglanon nagdul-ong sa iya nga tilawan ang madamo nga sahi sang pagsimba. Ang resulta amo ang nagkalainlain nga relihioso nga pagtamod nga makita sa bug-os nga kalibutan. Halimbawa, walay sapayan nga ang halos tanan nga relihion nagapati sa isa ka mas mataas nga gahom, lainlain ang ila ideya kon sin-o ukon kon ano ini. Ginapadaku sang kalabanan nga mga relihion ang importansia sang kaluwasan ukon kahilwayan. Apang lainlain ang ila mga panudlo sa kon ano ang kaluwasan kag kon paano ini matigayon. Bangod sang tuman kadamo nga mga pagtuluuhan, paano naton makilala ang matuod nga mga panudlo nga nagapahamuot sa Dios?