Ano nga Edukasyon ang Makabulig sa Imo nga Magmadinalag-on?

NAEKSPERIENSIAHAN mo na bala nga daw indi mo na gid masarangan ang imo mga problema kag pamatyag mo daw ginasuyop ka sang nagaalimpulos nga tubig? Handurawa lamang kon daw ano kasakit kon nagsayop ka sa pag-atubang sa isa ukon kapin pa sining mga problema! Wala sing isa nga ginbun-ag ang may ikasarang nga magdesisyon pirme sing husto kag solbaron sing madinalag-on ang tanan nga problema. Amo kon ngaa kinahanglan ang edukasyon. Sa diin ka makatigayon sing edukasyon agod maatubang mo sing madinalag-on ang mga problema sa kabuhi?

Tuman gid ang pagpabalor sang madamo, pamatan-on man ukon may edad, sa edukasyon. Ang pila ka eksperto nagasiling pa gani nga ‘kumbinsido gid sila nga indi ka makakita sing maayo nga obra kon wala ka sing kurso.’ Apang, may mga kinahanglanon ang tawo nga indi mapaayawan sang materyal nga mga katigayunan. Halimbawa, makabulig bala sa imo ang tinapusan sa kolehiyo nga mangin maayo nga ginikanan, tiayon, ukon abyan? Ang matuod, ang mga tawo nga ginadayaw bangod sang ila tinapusan sa kolehiyo mahimo maglain ang batasan, indi malipayon sa ila pagkabuhi subong pamilya, ukon maghikog pa gani.

Ang iban nagapangayo sing panuytoy sa relihion subong amo ang ginahalinan sang edukasyon, apang nalugaw-an bangod wala nila mabaton ang bulig agod atubangon ang mga kabudlayan sa kabuhi. Bilang halimbawa sini, si Emiliaa nga taga-Mexico nagsiling: “Sang nagligad nga 15 ka tuig, abi ko mabulagay na kami sang akon bana. Pirme lang kami nagakamog. Indi ko sia mapauntat sa pag-inom. Ginabilin ko pirme ang amon magagmay nga mga kabataan sa balay agod pangitaon ko ang akon bana. Indi na gid ako makaagwanta. Pila ka beses nga nagkadto ako sa simbahan agod mangita sing solusyon sa akon problema. Bisan pa nga ginabasa man kon kaisa ang Biblia, wala gid ako makabati sing laygay nga para gid sa akon problema; ni wala man sing isa nga nagtanyag nga tudluan ako sang dapat ko himuon. Ang pagpungko kag pagsulitsulit sang pila ka pangadi sa simbahan wala makabulig sa akon.” Ang iban mahimo maluyahan kon makita nila nga indi maayo nga halimbawa ang paagi sang pagkabuhi sang ila espirituwal nga mga lider. Subong resulta, madamo ang wala na sing salig sa relihion subong amo ang ginahalinan sang paghanas ukon edukasyon agod magmadinalag-on.

Gani, mahimo mamangkot ka, ‘Ano nga sahi sang edukasyon ang tigayunon ko agod magmadinalag-on?’ May sabat bala sa sining importante nga pamangkot ang matuod nga Cristianismo? Binagbinagon ini sa masunod nga artikulo.

[Nota]