‘Isa sang Pinakamalipayon nga mga Adlaw sang Akon Kabuhi’
ANG depresyon amo ang pinakamasunson nga ginareport, kag ayhan ang pinakamalala nga problema sa kapagros sa hunahuna para sa mga pamatan-on,” siling sang Beyondblue, isa ka ahensia sa Australia nga ginagastuhan sang gobierno. Ginapakita sang mga pagtuon nga mga 100,000 ka Australiano nga mga pamatan-on ang nagaeksperiensia sing depresyon kada tuig.
Ang Cristianong mga pamatan-on mahimo man makaeksperiensia sing depresyon. Apang, ang pagtuo kay Jehova nakabulig sa madamo sa ila nga madaug ang makapulung-aw nga mga balatyagon kag magmadinalag-on sa ila pagkapamatan-on. Paagi sa sini, ginadayaw sila sang iban. Paano?
Binagbinaga ang eksperiensia sang 18-anyos nga si Claire. Nagatambong sila sang iya iloy sa isa ka kongregasyon sang mga Saksi ni Jehova sa Melbourne. Sang ginbayaan sila sang iya amay, ginpung-aw gid si Claire. Apang, nagpabilin nga mabakod ang iya pagtuo sa iya langitnon nga Amay, nga si Jehova. Isa ka adlaw, nagduaw ang doktor sang pamilya, nga si Lydia, agod kamustahon ang nagamasakit nga iloy ni Claire. Pagkatapos sini, nagboluntaryo sia nga idul-ong si Claire sa shopping center. Samtang nagabiyahe, namangkot sia kon may nobyo na si Claire. Nagsabat si Claire nga subong isa sa mga Saksi ni Jehova wala sia nagapakigdeyt sing hampanghampang lamang. Nakibot ang doktor. Nian ginpaathag ni Claire kon paano sia nabuligan sang Biblia sa paghimo sing maalamon nga mga desisyon sa kabuhi. Pagkatapos sini, nagsiling si Claire nga dalhan niya ang doktor sing isa ka kopya sang publikasyon pasad sa Biblia nga nakabulig gid sa iya. Ini nga libro amo ang Questions Young People Ask—Answers That Work.
Tatlo ka adlaw pagkatapos mabaton ang libro, ginteleponohan ni Lydia ang iloy ni Claire kag nagsiling nga nanamian gid sia sa pagbasa sini. Nian nagpangabay sia sing anom pa ka kopya sang libro para sa iya kaupod nga mga doktor. Sang gindul-ong ni Claire ang libro, nagsiling ang doktor nga dayaw gid sia sa pagtuo ni Claire. Gintanyagan sia ni Claire sing pagtuon sa Biblia, kag nagpasugot ang doktor.
Pila ka bulan nga nagdumala si Claire sing pagtuon upod sa doktor kon tigpalanyaga. Nian ginpamangkot ni Lydia si Claire kon mahimo sia maghambal sa seminar tuhoy sa topiko sa depresyon sa mga pamatan-on. Bisan pa nagapangalag-ag, nagpasugot si Claire. Kapin sa 60 ka tawo ang nagtambong sa seminar. Apat ka propesyonal sa kapagros sa hunahuna—tanan mga adulto—ang naghambal sa atubangan sang mga tumalambong. Nian si Claire naman ang naghambal. Ginpatalupangod niya kon daw ano ka importante nga ang mga pamatan-on may yara kaangtanan sa Dios. Ginpaathag niya nga si Jehova nga Dios nagaulikid gid sa mga pamatan-on kag ginabuligan niya ang tanan nga nagapangayo sa iya sing bulig kag lugpay. Ginpabutyag man niya ang iya pagsalig nga sa dili madugay, dulaon ni Jehova ang tanan nga sahi sang balatian sa lawas kag hunahuna. (Isaias 33:24) Ano ang resulta bangod sining maayo nga pagpanaksi?
“Madamo ang nagpalapit sa akon pagkatapos sang sesyon kag nagsiling nga natandog gid sila sa pagpamati sa isa ka pamatan-on nga nagahambal tuhoy sa Dios,” siling ni Claire. “Nakapahamtang ako sing 23 ka kopya sang Young People Ask nga libro. Tatlo ka pamatan-on nga babayi sa tumalambong ang naghatag sa akon sang ila numero sang telepono. Ang isa sa ila nagatuon na karon sa Biblia. Isa yadto sang pinakamalipayon nga mga adlaw sang akon kabuhi.”