Ang Maayo nga Paggawi May Maayo nga Bunga
SA ISA ka pulo indi malayo sa dulunan sang nabagatnan nga bahin sang Japan, isa ka iloy kag tatlo niya ka bata ang nagtuon sing Biblia sa mga Saksi ni Jehova. Sang mahibaluan ini sang ila mga kaingod sa sining naligwin kag tuman ka konserbatibo nga duog, wala na nila gintamyaw ang iloy kon makita nila sia. “Ang masakit pa sa akon amo nga naglas-ay man sila pati sa akon bana kag mga bata,” panaysayon niya. Walay sapayan sini, ginsilingan niya ang iya mga bata: “Dapat naton gihapon tamyawon ang aton mga kaingod tungod kay Jehova.”—Mateo 5:47, 48.
Sa puluy-an, gintudluan niya ang iya mga bata nga mangin matinahuron walay sapayan sang di-pagsapak. Samtang nagalakbay sila para sa ila kinabatasan nga pagkadto sa mainit nga bukal, ang mga bata nag-ensayo sang ila panamyaw sa salakyan. Pagsulod pa lang sa bilding, ang mga bata malipayon nga nagatamyaw, “Konnichiwa!”—“Maayo nga adlaw!” Ang pamilya mapailubon kag padayon nga nagtamyaw sa tanan nga masugata nila, walay sapayan sang malas-ay nga sabat sang ila mga kaingod. Apang, natalupangdan sang mga tawo ang maayo nga pamatasan sang mga bata.
Sang ulihi, ang iban nga mga kaingod nagbalos man sing “Konnichiwa.” Pagligad sang mga duha ka tuig, ang halos tanan sa banwa nagbalos na sa panamyaw sang pamilya. Ang mga kaingod nangin mas mainabyanon, indi lamang sa ila, kundi sa iban man. Luyag padunggan sang deputado nga meyor ang mga bata bangod sini nga pagbag-o. Apang nagsiling ang iloy nga ginahimo lamang sang mga bata kon ano ang dapat nga himuon sang mga Cristiano. Sang ulihi, sa paindis-indis sa pamulongpulong sa bug-os nga pulo, ginsaysay sang anak nga lalaki kon paano ginhanas sang iya iloy ang ila pamilya nga tamyawon sing matinahuron ang iban walay sapayan sang malas-ay nga sabat. Ang iya pamulongpulong nagdaug sing nahauna nga premyo kag gin-imprinta ini sa pamantalaan sang banwa. Sa karon, malipayon gid ang pamilya sa maayong mga bunga bangod sang pagsunod sa Cristianong mga prinsipio. Mas mahapos ibantala ang maayong balita sa iban kon ang mga tawo mainabyanon.