Matuod nga Kahamungayaan sa Bag-ong Kalibutan sang Dios

SI David,⁠a nga isa ka Cristianong bana kag amay, nagsaylo sa Estados Unidos, kag sigurado gid sia nga husto ang iya nangin desisyon. Bisan pa nga indi niya gusto nga bayaan ang iya asawa kag mga anak, sigurado sia nga magaayo ang kabuhi nila tanan kon mas madamo ang iya kuarta. Gani ginbaton niya ang imbitasyon sang iya mga himata sa New York kag wala madugay nakakita sia didto sing palamugnan.

Apang, sa paglipas sang binulan, ang kasanag nga ginalauman ni David amat-amat nga nagdulom. Halos wala na sia sing tion para sa espirituwal nga mga hilikuton. May tion pa gani anay nga halos nadulaan sia sing pagtuo sa Dios. Nakamarasmas lamang sia sa kon ano gid ang iya kahimtangan sang nasulay na sia. Ang pagpansal niya sang iya igtalupangod sa materyal nga kahamungaya amat-amat nga nagdaldal sa iya palayo sa tanan nga butang nga importante gid anay sa iya. Dapat sia maghimo sing mga pagbag-o.

Kaangay ni David, madamo ang nagabiya sang ila imol nga mga dutang-natawhan kada tuig, sa paglaum nga basi magtin-ad ang ila pangabuhi. Apang, masami nga nagluya ang ila espirituwalidad. Ang iban nagpalibog, ‘Mahingamo bala sang isa ka Cristiano ang materyal nga manggad kag mangin manggaranon man sa Dios?’ Ang kilala nga mga manunulat kag mga manugwali nagasiling nga posible ini. Apang subong sang natun-an ni David kag sang iban pa, mabudlay maangkon ang isa ka butang nga wala ka sing mawasi nga iban nga butang.​—⁠Lucas 18:24.

Ang Kuarta Indi Malain

Sa pagkamatuod, ang kuarta isa ka imbension sang tawo. Kaangay sang madamo pa nga imbension, ini mismo indi malain. Sa pagkamatuod, isa lamang ini ka paagi sang pagbaylo. Gani, kon ginagamit sing husto, may maayo ini nga kapuslanan. Halimbawa, ginakilala sang Biblia nga “ang kuarta pangamlig,” ilabi na batok sa mga problema nga may kaangtanan sa kaimulon. (Manugwali 7:12) Para sa iban, “ang kuarta sabat sa tanan nga butang.”​—⁠Manugwali 10:​19, New International Version.

Ginapakamalaut sang Kasulatan ang katamad kag ginapalig-on ang kapisan. Dapat naton buhion ang aton pamilya, kag kon may sulusobra pa kita, may ‘mahatag kita sa nagakinahanglan.’ (Efeso 4:28; 1 Timoteo 5:8) Isa pa, sa baylo nga dingutan ang kaugalingon, ang Biblia nagapalig-on sa aton nga magkalipay sa aton mga pagkabutang. Ginasingganan kita nga ‘kuhaon ang aton bahin’ kag kalipayan ang mga bunga sang aton mga pinangabudlayan. (Manugwali 5:18-20) Sa katunayan, may yara madamo nga halimbawa sang matutom kag manggaranon nga mga lalaki kag mga babayi sa Biblia.

Matutom kag Manggaranon nga mga Lalaki

Si Abraham, nga isa ka matutom nga alagad sang Dios, nakaangkon sing daku nga panong kag kasapatan, madamo nga pilak kag bulawan, kag ginatos ka suluguon. (Genesis 12:⁠5; 13:​2, 6, 7) Ang matarong nga si Job madamo man sing manggad​—⁠sa mga kasapatan, mga suluguon, bulawan, kag pilak. (Job 1:⁠3; 42:​11, 12) Ini nga mga lalaki manggaranon bisan sa karon nga talaksan, apang manggaranon man sila sa Dios.

Gintawag ni apostol Pablo si Abraham nga ‘amay sang tanan nga may pagtuo.’ Si Abraham indi piguton ukon sobra ka maluyagon sa iya mga pagkabutang. (Roma 4:11; Genesis 13:⁠9; 18:1-8) Sing kaanggid, ginlaragway mismo sang Dios si Job subong “wala sing kasawayan kag matarong.” (Job 1:8) Pirme sia handa sa pagbulig sa mga imol kag sa mga nasit-an. (Job 29:12-​16) Si Abraham kag si Job nagsalig sa Dios sa baylo nga sa ila manggad.​—⁠Genesis 14:22-​24; Job 1:​21, 22; Roma 4:​9-​12.

Ang isa pa ka halimbawa amo si Hari Solomon. Subong manunubli sa trono sang Dios sa Jerusalem, si Solomon ginbugayan indi lamang sing kaalam gikan sa Dios kundi sing bugana man nga manggad kag himaya. (1 Hari 3:4-14) Sa kalabanan nga bahin sang iya kabuhi, matutom sia. Apang, sa naulihi nga bahin sang iya kabuhi, ang “tagipusuon [ni Solomon] indi bug-os kay Jehova.” (1 Hari 11:1-8) Ang matuod, ginailustrar sang iya masubo nga eksperiensia ang pila sa kinaandan nga mga siod sang materyal nga kahamungayaan. Binagbinaga ang pila sini.

Mga Siod Sang Kahamungayaan

Ang pinakadaku nga katalagman amo ang mangin mahigugmaon sa kuarta kag sa kon ano ang mabakal sini. Bangod sang manggad, napukaw ang handum sang iban nga indi gid mabusog. Sadtong maaga nga bahin sang iya paggahom, natalupangdan ni Solomon ini nga huyog sa iban. Nagsulat sia: “Ang nagahigugma sang pilak indi mabusog sing pilak, bisan ang nagahigugma sing manggad sing kinitaan. Ini man walay kapuslanan.” (Manugwali 5:10) Ginpaandaman sang ulihi ni Jesus kag ni Pablo ang mga Cristiano tuhoy sining malimbungon nga gugma.​—⁠Marcos 4:​18, 19; 2 Timoteo 3:2.

Kon ang kuarta nangin ang aton panguna nga interes sa baylo nga isa lamang ka instrumento sa pagtigayon sing pila ka butang, mas madali kita mahulog sa tanan nga sahi sang pagsulay, lakip na ang pagbutig, pagpangawat, kag pagdaya. Si Judas Iscariote, nga isa sang mga apostoles ni Cristo, nagluib sa iya agalon kabaylo sang 30 lamang ka bilog nga pilak. (Marcos 14:11; Juan 12:6) Bangod sang sobra nga gugma sa kuarta, ginsimba pa gani sang iban ang kuarta sa baylo sang Dios. (1 Timoteo 6:10) Busa, dapat pirme tinguhaan sang mga Cristiano nga mangin bunayag sa kon ano gid ang ila motibo sa pagpangita sing mas madamo nga kuarta.​—⁠Hebreo 13:5.

Ang paghingamo sing manggad may mas malimbungon man nga mga katalagman. Una, ang bugana nga manggad nagapalig-on sa isa sa pagsandig sa kaugalingon. Ginlakip ini ni Jesus sang ginpatuhuyan niya ang “malimbungon nga gahom sang manggad.” (Mateo 13:22) Ginpaandaman man sang manunulat sang Biblia nga si Santiago ang mga Cristiano nga indi pagkalimtan ang Dios bisan kon nagahimo sing mga plano sa negosyo. (Santiago 4:13-16) Sanglit ang kuarta daw nagahatag sa aton sing diutay nga kahilwayan, yara pirme ang katalagman nga magsalig ang tawo sa ila kuarta sa baylo nga sa Dios.​—⁠Hulubaton 30:7-9; Binuhatan 8:18-24.

Ikaduha, kaangay ni David, nga ginsambit kaina, natukiban niya nga ang paghingamo sing manggad masunson nga nagaubos sang panahon kag kusog sang isa ka tawo amo nga amat-amat ini nga nagapahilayo sa iya sa espirituwal nga mga hilikuton. (Lucas 12:13-21) Para sa mga manggaranon, yara man pirme ang pagsulay nga gamiton ang ila ginapanag-iyahan para lamang sa paglingawlingaw ukon sa personal nga mga kalipayan.

Mahimo bala nga ang rason kon ngaa napahamak si Solomon sa espirituwal bangod nadula niya ang iya kaligdong sang nagkabuhi sia sing maluho? (Lucas 21:34) Nakahibalo sia nga maathag nga ginadumili sang Dios ang pagpakig-alyansa sa pagminyo sa dumuluong nga mga pungsod. Apang, nagminyo sia sang ulihi sa mga isa ka libo ka babayi. (Deuteronomio 7:3) Bangod gusto niya nga pahamut-an ang iya dumuluong nga mga asawa, naghimo sia sing isa ka sahi sang kahimusan tuhoy sa pagpakighiusa sa iban nga pagtuluuhan para sa ila benepisyo. Subong sang ginsambit kaina, ang tagipusuon ni Solomon amat-amat nga napahilayo kay Jehova.

Maathag gid nga ginapakita sini nga mga halimbawa ang kamatuoran sang laygay ni Jesus: “Indi kamo makapaulipon sa Dios kag sa Manggad.” (Mateo 6:24) Kon amo, paano malandas sing madinalag-on sang isa ka Cristiano ang mga problema sa ekonomiya nga ginaatubang sang madamo gid sa karon? Mas importante pa, may paglaum bala nga mag-ayo ang kabuhi sa ulihi?

Ang Matuod nga Kahamungayaan sa Ulihi

Indi kaangay sang mga patriarka nga sanday Abraham kag Job kag sang pungsod sang Israel, ang mga sumulunod ni Jesus ginsugo nga “maghimo sing mga disipulo sa mga tawo sang tanan nga pungsod.” (Mateo 28:​19, 20) Ang pagtuman sa sina nga sugo nagakinahanglan sing tion kag panikasog nga mahimo kuntani magamit sa sekular nga mga hilikuton. Busa, ang sekreto sa kadalag-an nasandig sa sugo ni Jesus sa aton: “Gani, padayon nga pangitaa anay ang ginharian [sang Dios] kag ang iya pagkamatarong, kag ini tanan iban pa nga mga butang idugang sa inyo.”​—⁠Mateo 6:33.

Pagkatapos nga diutayan lang madula ang iya pamilya kag ang iya pagtuo kag kaangtanan sa Dios, natadlong gid man sang ulihi ni David ang iya kabuhi. Subong sang ginsaad ni Jesus, sang gin-una liwat ni David sa iya kabuhi ang pagtuon sa Biblia, pangamuyo, kag ministeryo, ang iban pa nga butang nangin maayo. Ang iya kaangtanan sa iya asawa kag mga anak amat-amat nga napasag-uli. Ang iya kalipay kag kaayawan nagbalik. Nagahimakas gihapon sia. Wala sia magmanggaranon. Apang, natun-an niya ang pila ka hamili nga mga leksion gikan sa iya mapait nga eksperiensia.

Ginpamensaran liwat ni David kon bala husto ang nangin desisyon niya nga magsaylo sa Estados Unidos, kag namat-od sia nga indi na gid liwat pagtugutan nga mangibabaw ang kuarta sa iya mga desisyon. Nahibaluan na niya karon nga ang labing bilidhon nga mga butang sa kabuhi​—⁠ang mahigugmaon nga pamilya, maayo nga mga abyan, kag ang kaangtanan sa Dios​—⁠indi matigayon paagi sa kuarta. (Hulubaton 17:17; 24:27; Isaias 55:​1, 2) Sa pagkamatuod, ang moral nga integridad mas bilidhon pa sangsa materyal nga manggad. (Hulubaton 19:⁠1; 22:1) Upod ang iya pamilya, determinado si David nga pirme magpahamtang sing nagakaigo nga mga prioridad.​—⁠Filipos 1:10.

Ang mga panikasog sang tawo sa pagtukod sing isa ka mahamungayaon gid apang may maayo sing moral nga katilingban pirme nagakapaslawan. Apang, nagsaad ang Dios nga ang iya Ginharian magaaman sing bugana nga materyal kag espirituwal nga mga butang nga kinahanglan naton agod magkabuhi kita sing malipayon. (Salmo 72:16; Isaias 65:21-23) Nagtudlo si Jesus nga agod mangin matuod nga hamungaya, dapat kita anay mangin mahunahunaon sa aton espirituwal nga kinahanglanon. (Mateo 5:3) Gani, manggaranon man kita ukon imol sa materyal, ang pag-una karon sa espirituwal nga mga butang amo ang pinakamaayo nga paagi nga makahanda ang bisan sin-o sa aton para sa bag-ong kalibutan sang Dios sa malapit nga palaabuton. (1 Timoteo 6:17-19) Ina nga kalibutan isa gid ka mahamungayaon nga katilingban sa materyal kag subong man sa espirituwal.

[Mga nota]

[Mga retrato sa pahina 5]

Si Job nagsalig sa Dios, indi sa iya manggad

[Mga retrato sa pahina 7]

Ang labing bilidhon nga butang sa kabuhi indi matigayon paagi sa kuarta