Mga Pamangkot Gikan sa mga Bumalasa
Kon ang isa ka tawo ginatublag sang mga demonyo, ano ang sarang niya mahimo agod mahilway sia gikan sa sini?
Ginapakita sang Pulong sang Dios nga ang mga ginasalakay sang mga demonyo makapanginpadlos sa sini nga mga pagtublag. Daku ang papel sang pangamuyo sa sini nga kahilwayan. (Marcos 9:25-29) Apang mahimo nga dugang pa nga mga tikang ang dapat himuon sang isa nga ginatublag sang mga demonyo. Ginapakita sang mga natabo sa unang-siglo nga mga Cristiano kon ano pa ang dapat himuon.
Antes sila nangin mga sumulunod ni Cristo, ang pila ka indibiduwal sa dumaan nga Efeso nadalahig anay sa demonismo. Apang, sa tapos sila magdesisyon nga mag-alagad sa Dios, “gintipon sang madamo sa mga naghimo sing salamangka ang ila mga libro kag ginpanutdan ini sa atubangan sang tanan.” (Binuhatan 19:19) Paagi sa pagsunog sang ila mga libro tuhoy sa pagpamakot, ining bag-o nga mga tumuluo sa Efeso nagpahamtang sing maayo nga huwaran para sa sin-o man karon nga luyag manginpadlos gikan sa pagsalakay sang mga demonyo. Dapat gid nga ihaboy ukon sunugon sini nga mga tawo ang tanan nga butang nga may kaangtanan sa espiritismo. Lakip sa sini ang mga libro, magasin, pelikula, mga impormasyon gikan sa Internet, mga musika nga may espiritistiko nga kahulugan, subong man ang mga anting-anting ukon iban pa nga butang nga ginasuksok subong “pangamlig” ukon naangot sa espiritistiko nga mga buhat.—Deuteronomio 7:25, 26; 1 Corinto 10:21.
Mga pila ka tuig pagkatapos masunog sang mga Cristiano sa Efeso ang ila mga libro tuhoy sa salamangka, si apostol Pablo nagsulat: “Nagapakigdumog kita . . . batok sa malaut nga mga puersa nga espiritu.” (Efeso 6:12) Ginlaygayan ni Pablo ang mga Cristiano: “Isuklob ang kompleto nga hinganib gikan sa Dios agod makatindog kamo sing malig-on batok sa mga pahito sang Yawa.” (Efeso 6:11) Ina nga laygay naaplikar gihapon karon. Kinahanglan nga pabakuron sang mga Cristiano ang ila espirituwalidad agod maamligan sila batok sa malaut nga mga espiritu. “Labaw sa tanan,” siling gid ni Pablo, “kuhaa ang daku nga taming sang pagtuo, nga pangpalong ninyo sa tanan nga nagadabadaba nga mga baslay sang isa nga malauton.” (Efeso 6:16) Mapabakod sang isa ka tawo ang iya pagtuo paagi sa pagtuon sa Biblia. (Roma 10:17; Colosas 2:6, 7) Busa, ang regular nga pagtuon sa Biblia makabulig nga mapalambo naton ang pagtuo nga amo ang aton pangamlig batok sa impluwensia sang malaut nga mga espiritu.—Salmo 91:4; 1 Juan 5:5.
Kinahanglan sang mga Cristiano sadto sa Efeso nga himuon ang isa pa ka importante nga tikang. Ginsilingan sila ni Pablo: ‘Sa tanan nga sahi sang pangamuyo kag pag-ampo magpadayon sa pagpangamuyo sa tagsa ka higayon sa espiritu.’ (Efeso 6:18) Huo, ang hanuot nga pagpangamuyo kay Jehova para sa pangamlig, kinahanglanon gid sang luyag mahilway sa pagsalakay sang mga demonyo karon. (Hulubaton 18:10; Mateo 6:13; 1 Juan 5:18, 19) Nagakaigo gid ang ginasiling sang Biblia: “Busa, magpasakop kamo sa Dios; apang pamatuki ang Yawa, kag magapalagyo sia sa inyo.”—Santiago 4:7.
Samtang ang isa nga ginasalakay sang demonyo dapat magpangamuyo pirme sing hanuot para sa kahilwayan, ang iban nga matuod nga mga Cristiano mahimo man makapangamuyo para sa indibiduwal nga nagahandum gid nga mag-alagad kay Jehova kag hanuot nga nagapanikasog nga pamatukan ang malaut nga mga espiritu. Sarang nila mapangabay sa Dios nga kabay nga ang isa nga ginapapiutan sang mga demonyo makatigayon sing espirituwal nga kusog nga mapamatukan ang mga pagsalakay sang demonyo. Sanglit ang Pulong sang Dios nagasiling nga “ang pakitluoy sang matarong nga tawo, kon ini nagapanghikot, may daku nga puersa,” ang mga pangamuyo sang mga alagad sang Dios makabulig gid sa mga ginapiutan nga nagahimo sang labi nila nga masarangan nga ‘mapamatukan ang Yawa.’—Santiago 5:16.
[Retrato sa pahina 31]
Ginsunog sang mga tumuluo sa Efeso ang ila mga libro tuhoy sa salamangka