“Ginbahinbahin sang Lenguahe Apang Ginhiusa sang Gugma”

Kahilwayan. Kaluwasan. Siniglo na nga ginahandum sang mga tawo ang kaumpawan gikan sa mga kabudlayan kag mga kabalaka. Paano naton maatubang ang mga problema sa kabuhi? Mahilway pa bala kita gikan sa sini? Kon amo, paano?

AMO ini ang topiko sang mga serye sang tatlo ka adlaw nga distrito nga mga kombension nga gin-organisar sang mga Saksi ni Jehova kag nagsugod sang Mayo 2006. Ang tema sini, “Malapit Na ang Kaluwasan!”

Linibo ka delegado gikan sa lainlain nga pungsod ang nagtambong sa siam sini nga kombension. Ginhiwat ini sang Hulyo kag Agosto 2006, sa Prague, ang kapital sang Czech Republic; sa Bratislava, ang kapital sang Slovakia; sa Chorzow kag Poznan, Poland;a kag sa lima ka siudad sa Alemanya—Dortmund, Frankfurt, Hamburg, Leipzig, kag Munich. Kapin sa 313,000 tanan ang nagtambong sa sining mga kombension.

Ano nga kahimtangan ang nagluntad sa mga kombension? Ano nga mga komento ang nabaton sang mga Saksi gikan sa iban nga mga tawo? Kag ano ang nabatyagan sang mga tumalambong pagkatapos sang mga kombension?

Mga Paghanda

Nalangkag gid ang mga bisita kag ang mga Saksi sa amo nga lugar kay napat-od nila nga indi gid malipatan ini nga mga okasyon. Daku nga hilikuton ang pag-aman sing bastante nga mga dalayunan para sa mga delegado. Halimbawa, sa kombension sa Chorzow, ginpadayon sang taga-Poland nga mga Saksi sa ila puluy-an ang halos 13,000 ka bisita halin sa Nasidlangan nga Europa. Ang mga delegado sa sini nga kombension naggikan sa Armenia, Belarus, Estonia, Estados Unidos, Georgia, Kazakhstan, Kyrgyzstan, Latvia, Lithuania, Moldova, Rusya, Tajikistan, Turkmenistan, Ukraine, kag Uzbekistan.

Binulan antes pa sini naghanda na ang madamo nga delegado para sa ila biyahe. Si Tatiana nga isa ka bug-os tion nga ebanghelisador sa Kamchatka, isa ka peninsula sang Rusya sa aminhan-nasidlangan sang Japan, nagsupot para sa biyahe mga isa ka tuig antes sini. Nagbiyahe sia sing 10,500 kilometros. Una, nagsakay sia sa eroplano sa sulod sang lima ka oras, dayon halos tatlo ka adlaw nga nagsakay sia sa tren, kag sang ulihi nagsakay sia sa bus sing 30 ka oras agod makalab-ot sa Chorzow.

Linibo ang nagboluntaryo sa mga hilikuton antes sang kombension agod ang mga istadyum kag ang palibot sini mangin nagakaigo nga mga duog sa pagsimba. (Deuteronomio 23:14) Halimbawa, gintinluan sing maayo sang mga Saksi sa Leipzig ang istadyum kag nangako sila nga tinluan ini liwat pagkatapos sang kombension. Subong resulta, ginbuhin sang mga opisyal sang istadyum sa arkila ang daku nga kantidad nga katumbas sa gastuhon sa pagtinlo sa istadyum.

Mga Imbitasyon

Ginpahibalo sing lapnag sang mga kongregasyon sa bug-os nga kalibutan ang tuhoy sa “Malapit Na ang Kaluwasan!” nga mga Kombension. Mapagsik gid nga nakigbahin sa sini nga kampanya ang mga indibiduwal nga nagtambong sa pinasahi nga mga kombension. Ginpahibalo nila ang tuhoy sa kombension tubtob sa gab-i sang bisperas sang kombension. Maayo bala ang resulta sang ila kakugi?

Nasugilanon sang taga-Poland nga Saksi nga si Bogdan ang isa ka tigulang nga lalaki nga luyag magtambong sa kombension apang nagsiling sia nga kulang ang iya inugplete para sa 120 kilometros nga biyahe pa Chorzow. Nahibaluan sang ulihi nga may bakante nga isa ka pulungkuan sa bus nga gin-arkilahan sang kongregasyon sa amo nga lugar. Si Bogdan nagsiling: “Ginsilingan namon ang lalaki nga makaupod sia sa amon sing libre kon maabot sia sa alas 5:30 sa aga sa ginkasugtan nga lugar.” Ginbaton sang lalaki ang pangagda kag nagtambong sia sa kombension. Sang ulihi ginsulatan niya ang mga kauturan, nga nagasiling: “Sa tapos ko matambungan ang kombension, determinado ako nga mangin mas maayo nga tawo.”

Sa Prague ang isa ka lalaki nga nagadayon sa hotel nga ginadayunan sang mga delegado gikan sa Britanya, nagsiling sang isa ka gab-i sa mga tumalambong sa kombension nga nagtambong man sia sa mga sesyon sina nga adlaw. Ngaa nagtambong sia? Nagsiling ang lalaki nga nakabaton sia sang imbitasyon gikan sa napulo ka manugbantala sa mga kalye sang siudad. Bangod sini nagbatyag sia nga dapat gid sia magtambong! Nagdayaw gid sia kag luyag magtuon sing dugang pa.—1 Timoteo 2:3, 4.

Makapapagros nga Programa sang Pagtudlo Gikan sa Biblia

Ginbinagbinag sa programa kon paano atubangon ang nanuhaytuhay nga problema. Ginpaathag paagi sa prangka nga mga laygay gikan sa Kasulatan kon paano sulbaron ukon batason ining mga problema.

Ang mga indibiduwal nga ginasit-an sang katigulangon, maluya nga panglawas, kamatayon sang hinigugma, ukon iban pa nga personal nga problema ginpalig-on paagi sa Biblia agod mabuligan sila nga makatigayon sing paglaum sa kabuhi. (Salmo 72:12-14) Ginlaygayan ang mga mag-asawa kag mga ginikanan gikan sa Biblia kon paano mangin malipayon sa pag-asawahay kag kon paano padakuon sing madinalag-on ang ila mga anak. (Manugwali 4:12; Efeso 5:22, 25; Colosas 3:21) Ang lamharon nga mga Cristiano ginaipit sang ila mga katubotubo nga maghimo sing malain sa eskwelahan apang sa puluy-an kag sa kongregasyon makabati sila sing maayo nga laygay gikan sa Pulong sang Dios. Nakabaton sila sing epektibo nga laygay kon paano atubangon ang mga pag-ipit kag kon paano ‘malagyo gikan sa mga kailigbon nga kinaandan sa pagkapamatan-on.’—2 Timoteo 2:22.

Isa Gid ka Internasyonal nga Paghiliutod

Ang mga Saksi ni Jehova pirme makabaton sang maayo nga panuytoy gikan sa Kasulatan sa ila mga pagtilipon. (2 Timoteo 3:16) Apang pinasahi ini nga mga kombension bangod ini internasyonal nga pagtililipon. Ang tanan nga pinasahi nga kombension nagpresentar sang pareho nga espirituwal nga programa sa madamo nga lenguahe. Kada adlaw nagapamulongpulong ang mga katapo sang Nagadumala nga Hubon sang mga Saksi ni Jehova, kag makawiwili man ang mga report gikan sa iban nga pungsod. Ginbadbad ang mga pamulongpulong kag mga report agod makabenepisyo ang lainlain sing lenguahe nga mga tumalambong.

Nalangkag gid ang mga delegado nga makita ang ila mga kauturan gikan sa iban nga mga pungsod. “Indi problema ang lainlain nga lenguahe,” siling sang isa ka delegado. “Sa baylo nagdugang ini sa kalipay sang okasyon. Lainlain ang kultura sang mga bisita, apang nahiusa sila tanan sa isa ka pagtuo.” Amo ini ang ginsiling sang mga nagtambong sa kombension sa Munich: “Ginbahinbahin sang lenguahe apang ginhiusa sang gugma.” Nabatyagan sang mga nagtambong nga bisan ano man ang ila pungsod ukon lenguahe kaupod nila ang matuod nga mga abyan—ang espirituwal nga mga kauturan.—Zacarias 8:23.

Mga Ekspresyon sa Pagpasalamat

Natilawan ang panimuot kag pagbatas sang mga nagtambong bangod sa paniempo sa tion sang mga kombension sa Poland. Pirme nagaulan kag tuman pa ka tugnaw—mga 14 degrees Celsius. Ang isa ka utod gikan sa Estados Unidos nagsiling: “Amo ini ang natambungan ko nga kombension nga may pinakatugnaw kag pinakalain nga paniempo, kag halos wala ako sing nahangpan sa programa. Apang nabawi ini tanan bangod sa tumalagsahon nga internasyonal nga kahimtangan kag malipayon nga panimuot kag pinasahi nga pagkamaabiabihon. Indi gid malipatan ini nga kombension!”

Indi malipatan sang mga taga-Poland nga nagtambong ang pahibalo sa pagpagua sing Insight on the Scriptures sa Polaco nga lenguahe—makalilipay nga padya sa ila pagbatas sang tugnaw kag ulan. Ginkalipay gid ang pagpagua sang bag-o nga publikasyon nga Live With Jehovah’s Day in Mind sa tanan nga “Malapit Na ang Kaluwasan!” nga mga Kombension.

Madumduman sang madamo sa tumalambong ang kombension bangod sa iban nga rason. Si Kristina, isa ka Czech nga utod nagboluntaryo nga updan sa bus ang mga delegado halin sa iban nga pungsod. Nagsiling sia: “Sang nagpaalam na kami sa isa kag isa, gindapit ako pahigad sang isa ka utod nga babayi kag ginhakos ako kag nagsiling: ‘Maayo gid ang pag-atipan sa akon! Gindalhan mo kami sing pagkaon kag tubig sa amon mismo pulungkuan. Madamo gid nga salamat sa imo masinakripisyuhon nga gugma.’” Ang ginatumod niya amo ang aman nga panyaga para sa mga delegado gikan sa iban nga pungsod. “Subong pa lang namon ini ginhimo,” paathag sang isa ka utod nga lalaki. “Ini amo ang pagdul-ong sang halos 6,500 ka palanyagahon kada adlaw. Makatalandog gid nga makita nga madamo ang nagbulig lakip ang mga kabataan.”

Ang isa ka utod nga babayi sa Ukraine nga nagtambong sa kombension sa Chorzow nagsiling: “Natandog gid kami sang gugma, pag-atipan kag kaalwan nga ginpakita sang amon mga masigkatumuluo. Daw indi namon mapabutyag ang amon pagpasalamat.” Ang otso anyos nga si Annika nga taga-Finland nagsulat sa sanga talatapan sang mga Saksi ni Jehova sa Poland: “Sobra pa sa ginapaabot ko ang kalipay nga nabatyagan ko sa kombension. Maayo gid nga mangin bahin sang organisasyon ni Jehova, kay may mga abyan ka sa bug-os nga kalibutan!”—Salmo 133:1.

Mga Komento Gikan sa Iban nga mga Tawo

May kahimusan nga mamasyar ang iban nga mga delegado antes sang kombension. Sa kaumhan sang Bavaria, naghapit ang mga bisita sa mga Kingdom Hall kag gin-abiabi sila sang mga Saksi sa amo nga duog. Nagdayaw gid sa sining utudnon nga pagpalanggaanay ang indi Saksi nga giya sang isa ka grupo nga nagapamasyar. “Sang nagasakay kami sa bus pauli sa amon hotel,” report sang isa ka delegado, “ang giya nagsiling nga tuhay gid kami sa iban nga grupo nga nagapamasyar. Maayo ang amon pamayo kag nagakooperar ang tanan sa mga nagapanguna. Wala sing nagapamuyayaw ukon kagamo. Natingala sia nga nangin maayo nga mag-abyan dayon ang mga indi magkilal-anay.”

Ang isa ka utod nga lalaki nga nagaboluntaryo sa Departamento sang News Service sa kombension sa Prague nagsiling: “Sang Domingo sang aga, ginduaw kami sang opisyal sang mga pulis nga gin-asayn sa kombension. Natalupangdan niya nga wala sing gamo kag nagsiling nga wala sia sing ulubrahon. Nagsiling man sia nga namangkot ang pila ka pumuluyo sa palibot sang istadyum kon ano ang okasyon. Kon magsambit sia sing mga Saksi ni Jehova, masami sila nagakahangawa apang ginasilingan sila sang opisyal nga: ‘Bisan katunga lang sang kabuot sang mga Saksi ni Jehova ang mailog sang mga tawo, indi na kinahanglan ang mga pulis.’”

Madamo ang Nahilway Na!

Ang Pulong sang Dios, ang Biblia, isa ka taytay sa ulot sang mga kultura, agod may paghidait kag paghiusa ang mga Cristiano. (Roma 14:19; Efeso 4:22-24; Filipos 4:7) Ginpamatud-an ini sang “Malapit Na ang Kaluwasan!” nga pinasahi nga mga kombension. Nahilway na ang mga Saksi ni Jehova sa madamo nga kasisit-an nga ginaantos sini nga kalibutan. Ang pag-ihig-ihig, kapintas, kag dumot sa rasa, pila lamang sa mga problema sang katilingban nga wala na sa ila, kag ginalauman nila ang tion nga ini nga mga problema madula sa bug-os nga kalibutan.

Naeksperiensiahan gid mismo sang mga nagtambong sa sining mga kombension ang paghiusa sang mga Saksi gikan sa lainlain nga pungsod kag kultura. Maathag gid ini sa katapusan sang mga kombension. Ang tanan nagapinalakpak, nagahakos sa bag-o nga mga abyan, kag nagaletrato sa isa kag isa sa katapusan nga higayon. (1 Corinto 1:10; 1 Pedro 2:17) Malipayon kag kumbinsido nga malapit na ang kahilwayan gikan sa tanan nga problema kag kabalaka, nagpauli ang mga tumalambong sa ila puluy-an kag kongregasyon nga determinado pa gid nga padayon nga manguyapot sing hugot sa “pulong sang kabuhi” sang Dios.—Filipos 2:15, 16.

[Footnote]

[Kahon/Piktyur sa pahina 10]

Nahiusa Bisan Beinte-Seis ka Lenguahe

Ginpresentar ang programa sa lenguahe sang tagsa ka lugar sa tanan nga siam ka kombension. Sa mga kombension sa Alemanya, ang pamulongpulong ginhatag man sa 18 ka iban pa nga lenguahe. Sa Dortmund ang mga pamulongpulong ginhatag sa Arabo, Espanyol, Farsi, Portuges kag Ruso; sa Frankfurt sa Pranses, Ingles, kag Serbian/Croatian; sa Hamburg sa Danes, Olandes, Sweko, kag Tamil; sa Leipzig sa Inintsik, Polaco kag Turko; kag sa Munich, Pasenyas nga Aleman, Griego, kag Italyano. Ang mga diskurso sa kombension sa Prague ginhatag sa Czech, Ingles kag Ruso. Sa Bratislava ang programa ginhatag sa Hungario, Ingles, Slovako kag Pasenyas nga Slovako. Ang mga lenguahe nga gingamit sa Chorzow amo ang Polaco, Pasenyas nga Polaco, Ruso, kag Ukrainiano. Kag sa Poznan, Polaco kag Pinlandes.

Beinte-seis tanan ka lenguahe! Nabahinbahin gid matuod sang lenguahe ang mga tumalambong, apang ginhiusa sila sang ila gugma.

[Piktyur sa pahina 9]

Ang taga-Croatia nga mga delegado sa Frankfurt nalipay nga mabaton ang “New World Translation” sa ila lenguahe