Mangin Suod sa Dios
Walay Tupong nga Amay
“AMAY.” Isa ini ka tinaga nga nagapukaw sa tudok nga balatyagon sang isa ka tawo. Ang mahigugmaon nga amay mabinuligon gid sa iya mga anak. Amo kon ngaa gintawag sang Biblia si Jehova nga Dios nga “Amay.” (Mateo 6:9) Ano nga sahi sang Amay si Jehova? Agod masabat ini, binagbinagon naton kon ano ang ginsiling ni Jehova sang ginbawtismuhan si Jesus. Kay mahibaluan naton kon ano nga sahi sang ginikanan ang isa ka amay paagi sa iya pagpakigsugilanon sa iya mga anak.
Mga Oktubre 29 C.E. sadto sang magkadto si Jesus sa Suba Jordan sa pagpabawtismo. Ang Biblia nagasaysay kon ano ang natabo: “Sang nabawtismuhan na si Jesus, gilayon nga nagbutwa sia sa tubig; kag, yari karon! ang langit nabuksan, kag nakita niya nga nagapanaug ang kaangay sa salampati nga espiritu sang Dios nga nagakunsad sa iya. Yari karon! May tingog man gikan sa langit nga nagsiling: ‘Ini ang akon Anak, ang hinigugma, nga ginakahamut-an ko.’”a (Mateo 3:16, 17) Ining mapinalanggaon nga mga tinaga nga ginbungat mismo ni Jehova nagasugid sa aton kon ano sia nga sahi sang Amay. Talupangda ang tatlo ka butang nga ginpabutyag ni Jehova sa iya Anak.
Una, paagi sa mga tinaga nga “Ini ang akon Anak,” daw nagasiling si Jehova nga ‘Ginapabugal ko gid ikaw.’ Nahibaluan sang isa ka mahinantupon nga amay nga dapat hatagan ang mga kabataan sing atension kag dapat mabatyagan man nila nga importante sila. Dapat hatagan pirme sing pasalig ang mga kabataan nga ang kada isa sa ila, pinasahi nga miembro sang pamilya. Hunahunaa lamang kon ano ang ginbatyag ni Jesus sang mabatian niya ining mga pulong gikan sa iya Amay bisan pa nga hamtong na sia!
Ikaduha, paagi sa pagtawag sa iya Anak nga “hinigugma,” ginpabutyag ni Jehova sing dayag ang iya gugma kay Jesus. Daw nagasiling ang Amay nga ‘Palangga ko ikaw.’ Ang isa ka maayo nga amay tampad nga nagasiling sa iya mga anak nga palangga niya sila. Ini nga mga tinaga upod ang pag-angga-angga sa mga bata nagabulig sa ila nga mag-uswag. Pat-od nga natandog gid si Jesus sang mabatian niya mismo gikan sa iya Amay nga palangga sia!
Ikatlo, paagi sa mga tinaga nga “ginakahamut-an ko,” ginpabutyag ni Jehova ang iya kahamuot sa iya Anak. Daw nagasiling si Jehova nga ‘Anak ko, nalipay gid ako sa ginhimo mo.’ Ang isa ka mahigugmaon nga amay nagapangita sing kahigayunan agod mapabutyag niya sa iya mga anak nga nahamuot sia sa maayo nga mga butang nga ila ginahimo ukon ginahambal. Nagabakod ang buot sang mga kabataan kon ginakahamut-an sila sang ila mga ginikanan. Pat-od gid nga napalig-on si Jesus sang mabatian niya nga nahamuot sa iya ang iya Amay!
Si Jehova isa gid ka walay tupong nga Amay. Luyag mo bala sia mangin amay? Malipay ka sa paghibalo nga mahimo mo mapalambo ini nga sahi sang kaangtanan kay Jehova. Kon bangod sa pagtuo nanikasog ka nga makilala sia kag ginhimo mo ang iya kabubut-on, buligan ka niya. Ang Biblia nagasiing: “Magpalapit kamo sa Dios, kag magapalapit sia sa inyo.” (Santiago 4:8) May labi pa bala nga makahatag sa imo sing daku nga kalig-unan sangsa magpalapit ka kag mangin suod kay Jehova nga Dios, ang labing maayo nga Amay?
[Footnote]
a Suno sa kaanggid nga teksto sa Ebanghelyo ni Lucas, gingamit ni Jehova ang pronombre nga “ikaw,” nga nagasiling: “Ikaw ang akon Anak, ang hinigugma; ginakahamut-an ko ikaw.”—Lucas 3:22.