Hatagi sing Igtalupangod ang Imo “Kalantip sa Pagpanudlo”
“Ibantala ang pulong . . . magsabdong, magsaway, maglaygay, nga may bug-os nga pagkamapinasensiahon kag kalantip sa pagpanudlo.”—2 TIM. 4:2, NW.
1. Ano ang ginsugo ni Jesus sa iya mga disipulo, kag ano nga halimbawa nga iya ginpahamtang?
WALAY sapayan sang dalayawon nga mga pagpang-ayo ni Jesus sang yari sia sa duta, nakilal-an sia, indi subong isa ka manugbulong ukon manughimo milagro, kundi subong isa ka manunudlo. (Mar. 12:19; 13:1) Para kay Jesus, ang labing importante nga hilikuton amo ang pagbantala sang maayong balita sang Ginharian sang Dios, kag amo man ini ang panimuot sang iya mga sumulunod karon. Ang mga Cristiano may asaynment nga magpadayon sa paghimo disipulo paagi sa pagtudlo sa mga tawo sa pagtuman sa tanan nga ginsugo ni Jesus.—Mat. 28:19, 20.
2. Ano ang kinahanglan naton palambuon agod matuman naton ang aton asaynment nga magbantala?
2 Agod matuman naton ang aton asaynment nga maghimo sing disipulo, dapat padayon kita nga magtinguha nga pauswagon ang aton ikasarang sa pagtudlo. Ginpadaku ini ni apostol Pablo sang nagsulat sia sa iya kaupod nga si Timoteo. Nagsiling sia: “Hatagi sang dalayon nga igtalupangod ang imo kaugalingon kag ang imo panudlo. Magpabilin ka sa sining mga butang, kay sa paghimo sini maluwas mo ang imo kaugalingon kag ang mga nagapamati sa imo.” (1 Tim. 4:16, NW) Ang sahi sang pagtudlo nga gintumod ni Pablo indi ang basta lamang pagpaalinton sing ihibalo. Ang epektibo nga Cristianong mga ministro nagalab-ot sa tagipusuon sang mga tawo kag nagapahulag sa ila nga maghimo sing mga pagbag-o sa ila kabuhi. Isa ini ka kalantip. Busa, paano naton mapalambo ang “kalantip sa pagpanudlo” kon nagabantala sang maayong balita sang Ginharian sang Dios sa iban?—2 Tim. 4:2, NW.
Pagpalambo Sing “Kalantip sa Pagpanudlo”
3, 4. (a) Paano kita makapalambo sing “kalantip sa pagpanudlo”? (b) Paano kita ginabuligan sang Teokratikong Eskwelahan Para sa Ministeryo nga mangin epektibo nga mga manunudlo?
3 Ang “kalantip” isa ka ikasarang nga sarang matigayon paagi sa pagtuon, paghanas, ukon pagpanilag. Dapat naton hatagan sing igtalupangod ining tatlo ka aspekto agod mangin epektibo kita nga mga manunudlo sang maayong balita. Matigayon lamang naton ang husto nga paghangop sa isa ka topiko kon tun-an naton ini upod ang pangamuyo. (Basaha ang Salmo 119:27, 34.) Makatuon man kita paagi sa pagpanilag sa epektibo nga mga ministro samtang nagatudlo sila kag ilugon naton sila. Kag ang tayuyon nga panikasog nga iaplikar ang aton natun-an makabulig sa aton nga mapauswag ang aton ikasarang.—Luc. 6:40; 1 Tim. 4:13-15.
4 Si Jehova amo ang aton Dakung Instruktor. Paagi sa dutan-on nga bahin sang iya organisasyon, ginatuytuyan niya ang iya mga alagad sa duta kon paano nila tumanon ang ila asaynment nga magbantala. (Isa. 30:20, 21) Amo sini kon ngaa nagahiwat kita sing semanal nga Teokratikong Eskwelahan Para sa Ministeryo. Gindesinyo ini para buligan ang tanan nga nakalista sa sini nga mangin epektibo nga mga manugbantala sang Ginharian sang Dios. Ang panguna sini nga tulun-an nga libro amo ang Biblia. Ginasugiran kita sang inspirado nga Pulong ni Jehova kon ano ang dapat itudlo. Isa pa, ginapakita sini kon ano nga mga pamaagi sang pagtudlo ang epektibo kag nagakaigo. Regular kita nga ginapahanumdom sa Teokratikong Eskwelahan Para sa Ministeryo nga mangin labi kita ka malantipon nga mga manunudlo kon magbase kita sang aton panudlo sa Pulong sang Dios, maggamit sing epektibo nga mga pamangkot, magtudlo sa simple nga paagi, kag magpakita sing sinsero nga interes sa iban. Binagbinagon naton ining mga punto sing isaisa. Pagkatapos, binagbinagon naton kon paano naton malab-ot ang tagipusuon sang estudyante.
Ibase ang Imo Pagpanudlo sa Pulong Sang Dios
5. Sa diin naton dapat ibase ang aton panudlo, kag ngaa?
5 Si Jesus, ang pinakamaayo sa tanan nga tawo nga manunudlo, nagbase sang iya panudlo sa Kasulatan. (Mat. 21:13; Juan 6:45; 8:17) Wala sia nagpamulong sa iya kaugalingon nga awtoridad, kundi sa awtoridad sang Isa nga nagpadala sa iya. (Juan 7:16-18) Amo sina nga halimbawa ang aton ginasunod. Busa, ano man ang aton ihambal sa pamalaybalay ukon sa mga pagtuon sa Biblia sa puluy-an, dapat isentro naton ini sa Pulong sang Dios subong amo ang awtoridad. (2 Tim. 3:16, 17) Bisan ano pa kanami sang aton pangatarungan, indi sini matupungan ang pagkaepektibo kag gahom sang inspirado nga Kasulatan. Ang Biblia may awtoridad. Busa, kon ginabuligan naton ang isa ka estudyante nga mahangpan ang bisan ano nga punto, ang pinakamaayo nga pamaagi amo ang pagpabasa sa iya kon ano ang ginasiling sang Kasulatan tuhoy sa sini.—Basaha ang Hebreo 4:12.
6. Paano mapat-od sang manunudlo nga nahangpan sang iya estudyante ang punto nga ila ginatun-an?
6 Apang, indi sini buot silingon nga indi na kinahanglan maghanda ang Cristianong manunudlo para sa pagtuon sa Biblia. Dapat handaan niya sing abanse kon ano nga mga teksto ang kinahanglan niya basahon sa Biblia ukon sang estudyante sa tion sang pagtuon. Sa masami, mas maayo nga basahon yadtong mga teksto nga sadsaran sang aton pagtuluuhan. Kinahanglan man buligan ang estudyante nga mahangpan ang kada teksto nga iya basahon.—1 Cor. 14:8, 9.
Maggamit sing Epektibo nga mga Pamangkot
7. Ngaa ang paggamit sing mga pamangkot isa ka maayo nga pamaagi sa pagtuon?
7 Ang maayo nga paggamit sing mga pamangkot nagapahunahuna sa estudyante kag nagabulig ini sa manunudlo nga malab-ot ang iya tagipusuon. Busa, sa baylo nga ipaathag ang teksto sa imo estudyante, pangabaya sia nga ipaathag ini sa imo. Kon kaisa, ang dugang nga pamangkot ukon ang sunodsunod nga mga pamangkot makabulig agod mabuligan mo ang imo estudyante nga makadangat sa husto nga paghangop. Kon amo sini ang pamaagi mo sa pagtuon, wala mo lamang sia ginabuligan nga mahangpan ang mga rason sa bisan ano nga sabat kundi agod makumbinsi man sia sa iya kaugalingon nga sabat.—Mat. 17:24-26; Luc. 10:36, 37.
8. Paano naton mahantop kon ano ang yara sa tagipusuon sang estudyante?
8 Ang pamaagi sa pagtuon sa aton mga publikasyon amo ang pamangkot kag sabat. Walay duhaduha nga ang kalabanan nga mga tawo nga imo ginatun-an sa Biblia mahapos lang makasabat sa naimprinta nga mga pamangkot nga yara sa mga parapo. Apang, ang manunudlo nga luyag maglab-ot sing tagipusuon indi lamang kontento sa husto nga mga sabat. Halimbawa, mahimo mapaathag sing husto sang isa ka estudyante kon ano ang ginasiling sang Biblia tuhoy sa pagpakighilawas. (1 Cor. 6:18) Apang, paagi sa mataktikanhon nga mga pamangkot tuhoy sa iya mga pagtamod, mahibaluan sang manunudlo kon ano gid ang ginahunahuna sang estudyante tuhoy sa iya ginatun-an. Busa, mahimo mamangkot ang manunudlo: “Ngaa ginapakamalaut sang Biblia ang pagpakigsekso sa indi tiayon? Ano ang masiling mo sa sini nga pagdumili sang Dios? Sa banta mo may benepisyo bala ang pagtuman sa mga talaksan sang Dios sa moral?” Ang iya sabat sa sini nga mga pamangkot makapakita kon ano gid ang yara sa tagipusuon sang estudyante.—Basaha ang Mateo 16:13-17.
Magpaathag Sing Simple
9. Ano ang dapat naton dumdumon kon nagapaalinton sing Makasulatanhon nga impormasyon?
9 Ang kalabanan nga kamatuoran sa Pulong sang Dios halos simple. Apang, ang mga tawo nga aton ginatun-an sing Biblia mahimo naligban sa doktrina sang butig nga relihion. Bilang mga manunudlo, dapat himuon naton ang Biblia nga madali mahangpan. Ang epektibo nga mga manunudlo nagapaalinton sang impormasyon sing simple, maathag, kag sibu. Kon sundon lamang naton ini nga pamaagi, mapaalinton naton sing maathag ang kamatuoran. Likawi ang di-kinahanglanon nga mga detalye. Indi kinahanglan nga komentuhan ang tanan nga aspekto sang teksto nga aton ginabasa. Magkonsentrar lamang sa kon ano ang importante sa pagpaathag sang punto nga ginabinagbinag. Ang estudyante amat-amat nga makahangop sa mas madalom nga mga kamatuoran sa Kasulatan samtang nagauswag sia sa paghangop.—Heb. 5:13, 14.
10. Paano naton mapat-od kon daw ano kadamo nga materyal ang tuptupan sa isa ka pagtuon sa Biblia?
10 Daw ano kadamo nga materyal ang dapat tuptupan sa isa ka pagtuon? Nagakinahanglan ini sing paghantop. Nanuhaytuhay ang ikasarang kag kahimtangan sang estudyante kag manunudlo, apang dapat naton pirme tandaan nga ang aton tulumuron subong manunudlo amo ang pagbulig sa aton estudyante nga magpalambo sing mabakod nga pagtuo. Busa, dapat naton sia hatagan sing bastante nga tion sa pagbasa, sa paghangop, kag sa pagbaton sang kamatuoran nga ginatudlo sang Pulong sang Dios. Indi kita dapat magtuptop sing materyal nga mas madamo sangsa iya masarangan. Apang, indi naton dapat himuon nga tuman kahinay ang pagtuon. Kon nahangpan na sang estudyante ang isa ka punto, dapat magliton na kita sa masunod nga punto.—Col. 2:6, 7.
11. Ano nga leksion tuhoy sa pagtudlo ang aton matun-an kay apostol Pablo?
11 Ginhuptan ni apostol Pablo nga simple ang mensahe sang maayong balita kon nagapakigsugilanon sia sa mga bag-uhan. Bisan pa mataas ang iya tinun-an, wala sia naggamit sing mga tinaga nga mga maalam lamang ang makahangop. (Basaha ang 1 Corinto 2:1, 2.) Bangod sa pagkasimple sang kamatuoran sang Kasulatan, madamo nga sinsero nga tawo ang nagganyat kag nakumbinsi sa sini. Indi kinahanglan nga mataas ang tinun-an sang isa agod mahangpan niya ini.—Mat. 11:25; Binu. 4:13; 1 Cor. 1:26, 27.
Buligi ang mga Estudyante nga Pabaloran ang Ila Natun-an
12, 13. Ano ang mahimo makapahulag sa estudyante nga iaplikar ang iya ginatun-an? Iilustrar.
12 Masiling naton nga epektibo ang aton panudlo kon nagatandog ini sa tagipusuon sang estudyante. Dapat mahangpan sang estudyante kon paano naaplikar sa iya ang impormasyon, kon paano sia makabenepisyo sa sini, kag kon paano mag-uswag ang iya kabuhi kon tumanon niya ang ginasiling sang Kasulatan.—Isa. 48:17, 18.
13 Halimbawa, mahimo ginabinagbinag naton ang Hebreo 10:24, 25, nga nagapalig-on sa mga Cristiano nga magtipon upod sa masigkatumuluo para sa pagpalig-unanay sa Kasulatan kag sa mahigugmaon nga paghiliutod. Kon ang estudyante wala pa nagatambong sa mga miting, mahimo naton ilaragway sa malip-ot kon paano ini ginahimo kag kon ano ang pagabinagbinagon. Mahimo naton isiling nga ang mga miting sang kongregasyon bahin sang aton pagsimba kag ipakita nga personal kita nga nagabenepisyo sa sini. Nian, mahimo naton agdahon ang estudyante nga magtambong. Dapat, ang iya motibo sa pagtuman sa mga sugo sang Biblia amo ang iya handum nga pahamut-an si Jehova indi agod pahamut-an ang tawo nga nagatudlo sa iya.—Gal. 6:4, 5.
14, 15. (a) Ano ang sarang matun-an sang isa ka estudyante sa Biblia tuhoy kay Jehova? (b) Paano ang ihibalo sa personalidad sang Dios makabenepisyo sa isa ka estudyante sa Biblia?
14 Ang isa sa panguna nga benepisyo nga matigayon sang estudyante gikan sa pagtuon sa Biblia kag sa pag-aplikar sa mga prinsipio sini amo ang makilala kag mahangpan si Jehova subong isa ka persona. (Isa. 42:8) Magluwas nga isa sia ka mahigugmaon nga Amay, Manunuga kag Tag-iya sang uniberso, ginapahayag man niya ang iya personalidad kag mga ikasarang sa mga nagahigugma kag nagaalagad sa iya. (Basaha ang Exodo 34:6, 7.) Sang malapit na pangunahan ni Moises ang pungsod sang Israel paggua sa Egipto, ginpakilala ni Jehova ang iya kaugalingon paagi sa sining mga pulong: “Ako mangin amo kon ano ako mangin amo.” (Ex. 3:13-15, NW) Ginapahangop sini nga sarang si Jehova mangin bisan ano agod matuman ang iya katuyuan tuhoy sa iya ginpili nga katawhan. Busa, nakilala sang mga Israelinhon si Jehova subong Manluluwas, Mangangaway, Manug-aman, kag Manugtuman sang mga saad kag iban pa.—Ex. 15:2, 3; 16:2-5; Jos. 23:14.
15 Mahimo indi maeksperiensiahan sang aton mga estudyante ang milagruso nga mga bulig ni Jehova sa ila kabuhi subong sang naeksperiensiahan ni Moises. Walay sapayan sini, samtang nagatubo sila sa pagtuo kag sa pag-apresyar sang ila natun-an kag nagasugod na sa pag-aplikar sini, walay duhaduha nga makita nila nga kinahanglan sila mangayo kay Jehova sing kaisog, kaalam, kag panuytoy. Samtang ginahimo nila ini, mahimo man nila makilala si Jehova subong isa ka maalam kag masaligan nga Manuglaygay, Manug-amlig, kag maalwan nga Manug-aman sang tanan nila nga kinahanglanon.—Sal. 55:22; 63:7; Hulu. 3:5, 6.
Magpakita sing Mahigugmaon nga Interes
16. Ngaa ang kinaugali nga ikasarang indi amo ang labing importante sa aton pagkaepektibo subong manunudlo?
16 Kon sa banta mo indi ikaw malantipon nga manunudlo, indi ka dapat maluyahan sing buot. Si Jehova kag si Jesus amo ang nagadumala sa edukasyonal nga programa nga ginahimo karon sa bug-os nga kalibutan. (Binu. 1:7, 8; Bug. 14:6) Sarang nila pakamaayuhon ang aton mga panikasog agod nga ang aton panudlo magbunga sa mga tawo nga may matarong sing tagipusuon. Bisan pa kulang sing kinaugali nga ikasarang ang isa ka manunudlo, mahimun-an ini sang iya sinsero nga gugma sa estudyante. Ginpakita ni apostol Pablo nga nahangpan niya nga importante gid ang paghigugma sa mga ginatudluan.—Basaha ang 1 Tesalonica 2:7, 8.
17. Paano kita makapakita sing sinsero nga interes sa aton estudyante sa Biblia?
17 Makapakita man kita sing sinsero nga interes sa aton estudyante sa Biblia paagi sa paghinguyang sing tion nga kilalahon sia. Kon nagabinagbinag kita sing mga Makasulatanhon nga mga prinsipio sa iya, mahimo nga mahibaluan naton ang iya mga kahimtangan. Mahimo maobserbahan naton nga ginaaplikar na niya ang pila ka punto nga iya natun-an sa Biblia. Apang mahimo nga sa pila ka bahin, kinahanglan pa sia maghimo sing pila ka mga pagbag-o. Paagi sa pagbulig sa iya nga makita kon paano ang inyo ginatun-an maaplikar sa iya kahimtangan, mahimo naton sia mahigugmaon nga mabuligan nga mangin tunay nga disipulo ni Cristo.
18. Ngaa importante nga mangamuyo kita upod sa aton estudyante kag ngaa maayo nga ilakip naton sia sa aton pangamuyo?
18 Labing importante sa tanan, sarang kita mangamuyo upod sa aton estudyante kag ilakip sia sa aton pangamuyo. Dapat mangin maathag sa iya nga ang aton tulumuron amo ang pagbulig sa iya nga makilala ang iya Manunuga sing labi pa, mangin suod sa Iya, kag makabenepisyo sa Iya panuytoy. (Basaha ang Salmo 25:4, 5.) Kon mangamuyo kita nga pakamaayuhon ni Jehova ang mga panikasog sang estudyante nga iaplikar ang iya natun-an, makita sang estudyante nga importante gid nga mangin “manugtuman sing pulong.” (Sant. 1:22, NW) Samtang nagapamati ang estudyante sa aton sinsero nga mga pangamuyo, makatuon man sia kon paano mangamuyo. Daw ano gid nga kalipay nga mabuligan naton ang aton mga estudyante sa Biblia nga makapalambo sang ila kaugalingon nga kaangtanan kay Jehova!
19. Ano ang pagabinagbinagon sa masunod nga artikulo?
19 Makapalig-on gid mahibaluan nga kapin sa anom ka milyon kag tunga nga Saksi sa bug-os kalibutan ang masako karon sa pagpalambo sang ila “kalantip sa pagpanudlo” sa pagbulig sa bunayag sing tagipusuon nga mga tawo sa pagtuman sang tanan nga ginsugo ni Jesus. Ano ang mga resulta sang aton pagbantala? Ang sabat sa sini nga pamangkot binagbinagon sa masunod nga artikulo.
Madumduman Mo Bala?
• Ngaa ang mga Cristiano kinahanglan magpalambo sing “kalantip sa pagpanudlo”?
• Ano nga mga pamaagi ang sarang naton magamit agod mangin labi ka epektibo ang aton pagpanudlo?
• Ano ang makabulig sa aton kon kulang kita sing kinaugali nga ikasarang sa pagpanudlo?
[Piktyur sa pahina 9]
Nakapalista ka na bala sa Teokratikong Eskwelahan Para sa Ministeryo?
[Piktyur sa pahina 10]
Ngaa importante nga pangabayon mo ang imo estudyante nga magbasa sang teksto?
[Piktyur sa pahina 12]
Mangamuyo upod sa imo estudyante kag ilakip sia sa imo pangamuyo