Tubig nga Nagaibwal Agod Maghatag sang Kabuhi nga Walay Katapusan

“Ang bisan sin-o nga nagainom sang tubig nga akon ihatag sa iya indi na gid pag-uhawon, kundi ang tubig nga akon ihatag sa iya mangin tuburan sang tubig sa iya nga nagaibwal agod maghatag sang kabuhi nga walay katapusan.”​—JUAN 4:14.

“SING hinali, sa kilid sang bulan, . . . nagtuhaw ang nagainggat nga asul kag puti nga hiyas, asul nga tipulon nga napunihan sing puti kag daw pandong nga alimpulos, kaangay sang gamay nga perlas nga amat-amat nga nagabutwa sa mangitungito nga dagat sang kadulom.”​—Edgar Mitchell, isa ka astronot nga naglaragway sang duta gikan sa kahawaan.

Katahom gid sang duag sang aton planeta. Amo nga ang astronot nga ginsambit kaina napahulag sa paghimo sing binalaybay tuhoy sini. Matahom gid ini bangod sang tubig nga nagakulap sa tres kuartos nga bahin sang duta. Sa pagkamatuod, wala lamang nagapatahom sa aton planeta ang tubig; nagasakdag man ini sa kabuhi sang mga tinuga sa duta. Sa katunayan, mga 65 porsiento sang aton lawas ang human sa tubig. Amo nga ang Encyclopædia Britannica nagsiling tuhoy sa tubig: “Importante gid ini sa kabuhi, may papel ini sa tanan nga proseso nga nagakatabo sa mga tanom kag mga sapat.”

Bangod nagabalikbalik lang ini, indi na kinahanglan sang duta ang bag-o nga suplay sang tubig. “Ang halos tanan nga tulo sang tubig nga aton ginagamit nagabalik sa kadagatan,” paathag sang The World Book Encyclopedia. “Pag-abot sa dagat, mangin alisngaw ini bangod sang init sang adlaw. Nian magatupa ini sa duta subong ulan. Ginagamit ang tubig sing sulitsulit. Wala ini nagakaubos.” Sang nagligad nga mga 3,000 ka tuig, ining dalayawon nga proseso ginlaragway sa Biblia: “Ang tanan nga suba nagailig pakadto sa dagat, apang ang dagat wala mapuno; sa duug diin ang mga suba nagakadto, didto nagabalik sila.” Dalayawon gid ang proseso sang tubig sa duta!​—Manugwali 1:7.

Importante ang tubig agod mabuhi, kag tumalagsahon ang kinaiya sini. Gani indi katingalahan nga kapin sa 700 ka beses ini nga ginsambit sa Biblia. Pirme ginasambit sang Biblia ang pinasahi nga kinaiya sang tubig​—ilabi na ang ikasarang sini sa pagtinlo kag pagsakdag sang kabuhi—​sa paglaragway sa gahom sang Biblia agod mangin matinlo ang aton kaangtanan kag pagsimba kay Jehova.​—Isaias 58:11; Juan 4:14.

Ang Gahom sang Biblia sa Pagtinlo

Bangod sang ila regular nga pagpaligo kag pagpanghinaw, nangin talalupangdon ang katinlo sa pisikal sang mga Israelinhon. Nangin kinabatasan nila nga hinawan ang tiil sang ila mga gin-agda nga magkaon sa ila balay. (Lucas 7:44) Ginagamit sang mga Israelinhon ang tubig sa pagpaninlo sa ila lawas kag sa ila mga pagkabutang, kag ginagamit man nila ini sa pagpaninlo sa tion sang ila pagsimba. Ang mga saserdote nga nagaalagad sa tabernakulo kinahanglan nga manghinaw kag maglaba pirme sang ila mga bayo. (Exodo 30:18-21) Sang ulihi, sa templo sa Jerusalem, nagpahimo si Solomon sing “isa ka dagat nga tinunaw” nga saway nga masudlan sing 44,000 litros nga tubig, nga bastante sa pagpaninlo nga ginapatuman sang Kasuguan sang Dios. (2 Cronica 4:2, 6) Ano ang kahulugan sini nga paggamit sang tubig sa mga Cristiano subong?

Ginpaathag ni apostol Pablo nga gintinluan ni Jesus ang Cristiano nga kongregasyon “paagi sa paghugas sa tubig paagi sa pulong.” Kaangay sang tubig nga nagatinlo sa pisikal, ang kamatuoran sa Pulong sang Dios may gahom sa pagtinlo sa aton paggawi kag sa aton pagsimba. Bangod sini, ang mga disipulo ni Cristo ‘balaan kag wala sing depekto.’ (Efeso 5:25-27) Amo nga ang tanan nga luyag kahamut-an sang Dios dapat magtinguha nga mahuptan ang ila kaugalingon nga “wala sing higko kag wala sing depekto” sa ila paggawi kag sa ila pagsimba sa Dios. (2 Pedro 3:11, 14) Paano sila mabuligan sang Pulong sang Dios agod mahimo ini?

Paagi sa pagtuon sing Biblia, ang mga luyag magpahamuot kay Jehova nga Dios nagatigayon sing ihibalo, nga nagalaragway sa tubig. Kon magsalop sa ila hunahuna kag tagipusuon ini nga ihibalo, pahulagon sila sini nga tumanon ini nga laygay: “Magbalhin kamo paagi sa pagbag-o sang inyo hunahuna, agod mapamatud-an ninyo sa inyo kaugalingon ang maayo kag kalahamut-an kag himpit nga kabubut-on sang Dios.”​—Roma 12:2.

Ang sibu nga ihibalo sa kabubut-on sang Dios magabulig sa sini nga mga tawo nga mahibaluan ang mga higko kag mga depekto sa ila paggawi kag panghunahuna. Pagligad sang tion, samtang ginaaplikar nila ang mga prinsipio sa Biblia, ang Pulong sang Dios mangin kaangay sang tubig nga magabulig sa ila agod ‘mahugasan’ sila gikan sa daku nga sala.​—1 Corinto 6:9-11.

Naeksperiensiahan sang isa ka pamatan-on sa Espanya ini nga pagbag-o. “Sang 18 anyos ako, indi gid ako malipayon,” paathag ni Alfonso. Nangin adik sia sa droga kag nangin bat-ulan nga kriminal. “Pamatyag ko malain gid ako nga tawo bangod sa pagtratar ko sa akon lawas kag sa iban.

“Sa eskwelahan, natalupangdan ko ang isa ka babayi nga kaedad ko nga matinlo ang pamustura, kag lain sia sa iban nga estudyante bangod sang iya kabuot. Bangod sini, napahulag ako nga bag-uhon man ang akon pagkabuhi. Sa iya panugda, nagtambong ako sa pagtilipon sang mga Saksi ni Jehova. Sang ulihi nagtuon ako sa Biblia kag nakatigayon sing maayo nga relasyon sa Dios. Sa sulod sang isa ka tuig, gintinluan ko ang akon kabuhi kag nangin bawtismado nga Saksi. Bangod sini nga pagbag-o, madamo nga mga ginikanan sa amon palibot ang nangabay sa akon nga buligan ang ila tin-edyer nga mga kabataan nga adik man sa droga.”

Tubig nga Nagahatag sing Kabuhi nga Walay Katapusan

Ginsilingan ni Jesus ang Samaritana nga nagsag-ub sa bubon ni Jacob tuhoy sa “tubig nga buhi.” Nagsiling sia: “Ang bisan sin-o nga nagainom sang tubig nga akon ihatag sa iya indi na gid pag-uhawon, kundi ang tubig nga akon ihatag sa iya mangin tuburan sang tubig sa iya nga nagaibwal agod maghatag sang kabuhi nga walay katapusan.” (Juan 4:10, 14) Subong sang ginpaathag sa Biblia, ginpakita sang ginsiling ni Jesus nga ang “tubig nga buhi” nagapatuhoy sa mga aman sang Dios para sa kabuhi. Bangod sini, matigayon sang mga tawo ang kabuhi nga walay katapusan. Ang importante nga bahin sining malaragwayon nga tubig amo ang halad gawad ni Cristo Jesus. “Ginhigugma gid sang Dios ang kalibutan,” paathag ni Jesus, “amo nga ginhatag niya ang iya bugtong nga Anak, agod ang tagsatagsa nga nagatuo sa iya indi malaglag kundi makatigayon sang kabuhi nga walay katapusan.”​—Juan 3:16.

Si Alfonso, nga ginsambit kaina, nagpabalor gid sang “tubig nga buhi” nga naggikan sa Dios. Nagsiling sia tuhoy sa mga tawo nga nagpadayon sa ila pagkabuhi subong kriminal kag adik: “Patay na ang akon magulang kag ang akon mga barkada sadto. Ginluwas ako sang ihibalo sang Pulong sang Dios gikan sa kamatayon. Salamat sa pagtudlo ni Jehova, buhi gihapon ako.” Dugang pa, natun-an ni Alfonso sa Pulong sang Dios ang paglaum nga matigayon niya ang kabuhi nga dayon sa ginsaad sang Dios nga bag-ong duta.​—2 Pedro 3:13.

Pangagda Para sa Tanan

Sa katapusan nga tulun-an sa Biblia, mabasa naton ang paglaragway sa “suba sang tubig sang kabuhi, nga matin-aw subong sang kristal, nga nagailig gikan sa trono sang Dios kag sang Kordero.” (Bugna 22:1) Ang suba nagapatuhoy sa mga aman sang Dios sa mga tawo agod mangin himpit man sila kaangay sang kabuhi nanday Adan kag Eva sa tion nga gintuga sila.

Pagkatapos malaragway ini nga suba, nagpangagda ang Biblia: “Kag ang bisan sin-o nga ginauhaw magkari; ang bisan sin-o nga luyag magkuha sang tubig sang kabuhi nga wala sing bayad.” (Bugna 22:17) Sa karon, ini nga pangagda ginapalanog na sa bug-os nga duta. Kada tuig, nagahinguyang sing kapin sa isa ka bilyon ka oras ang mga Saksi ni Jehova sa kapin sa 235 ka kadutaan agod buligan ang mga tawo nga makatigayon sing nagahatag-kabuhi nga ihibalo sa Biblia.

Ginauhaw ka bala sang tubig sang kabuhi? Kon amo, mag-inom sa matinlo nga tubig, nga amo ang pagtuon kag paggamit sang mga aman sang aton Manunuga. Paagi sa sini, malakip ka sa mga “mahalungon nga nagatipon para sa ila kaugalingon sang maayo nga sadsaran para sa palaabuton subong ila bahandi, agod makapanguyapot sila sing malig-on sa matuod nga kabuhi.”​—1 Timoteo 6:19.

[Blurb sa pahina 14]

Kaangay sang tubig nga nagatinlo sa pisikal, ang kamatuoran sa Biblia may gahom sa pagtinlo sa aton paggawi kag sa aton pagsimba

[Kahon/Mga piktyur sa pahina 15]

SUPLAY SANG TUBIG SA TION SANG BIBLIA

Sa tion sang Biblia, mabudlay gid ang pagpangita sing mga tuburan sang tubig. Sanday Abraham kag Isaac nagkutkot sing bubon malapit sa Beer-seba agod makasiguro nga may bastante nga tubig para sa ila panimalay kag sa ila kasapatan.​—Genesis 21:30, 31; 26:18.

Ang manabaw nga mga bubon masami nga nagakahubsan sa tion sang malawig kag nagatagiti nga tig-ilinit. Agod indi madali mahubsan ang mga bubon, dapat madalom ini. (Hulubaton 20:5) Ang isa ka bubon sa Laquis may kadalumon nga 44 metros. Ang isa pa ka bubon nga nasapwan sa Gibeon, kapin sa 25 metros ang kadalumon kag 11 metros ang kasangkaron. Buot silingon, ginhaw-as nila sa sini ang mga 3,000 toneladas nga igang. Ang Samaritana nga nagsag-ub sa bubon ni Jacob nagsiling kay Jesus: “Ang bubon madalom.” Ang nibel sang tubig sa sini nga bubon mahimo nga 23 metros gikan sa ibabaw sang duta.​—Juan 4:11.

May mga tangke man nga suluptan sing tubig sang una sa Natung-an nga Sidlangan. Ginasupot ang tubig sa sini nga mga tangke sa tion sang tingulan, sugod sa Oktubre tubtob Abril. Ginahimuan sing mga kanal ang banglid agod mag-ilig ang tubig pakadto sa sini nga mga tangke. Ang mga Israelinhon naghimo man sing dalagku nga mga tangke sa duta agod makasupot sing tubig.​—2 Cronica 26:10.

Mabudlay ang pagsag-ub sa mga bubon kag mga tangke. Ang mga babayi kaangay ni Rebeca kag sang mga anak ni Jetro nangabudlay gid agod makasag-ub kada adlaw para sa ila mga pamilya kag kasapatan.​—Genesis 24:15-20; Exodo 2:16.

[Piktyur sa pahina 15]

Si Alfonso, nagapaambit sang Pulong sang Dios karon