Ang Akon Tubtob-buhi nga Kalipay sa Paghimo sang Kabubut-on sang Dios

Panugiron ni Bill Yaremchuk

Sang Marso 1947, pila pa lang ka semana nga naggradwar ako bilang misyonero sa ikawalo nga klase sang Watchtower Bible School of Gilead nga nahamtang sadto sa South Lansing, New York, U.S.A., naglakbay ako pakadto sa akon asaynment​—ang Singapore.

UPOD ko sa sini nga asaynment ang taga-Canada man nga si Dave Farmer, nga naggradwar sa ikapito nga klase sang Gilead. Naglakbay kami halin sa San Francisco, California sakay sa Marine Adder nga isa anay ka barko sang militar.

Ang amon una nga gindungkaan sa Sidlangan amo ang Hong Kong. Grabe gid ang amon naabtan didto. Makita bisan diin ang halit sang Bug-os Kalibutan nga Inaway II. Ang mga tawo nagahuray-ad sa higad sang dalan nga gutom kag daw nagahulat na lang nga mapatay. Nagbalik man kami dayon sa barko kag nagpadulong sa Manila.

Makita man diri ang makakilibang nga resulta sang inaway. Nagalinapta lang sa pantalan ang mga palo sang nalunod nga mga barko nga ginbombahan sang puersa militar sang mga Alyado. Puraot gid ang kahimtangan sa palibot. Nasugilanon namon ang pila ka mga kauturan kag ginhagad nila kami sa Kingdom Hall. Malipayon sila bisan pa madamo sila sing problema.

Ang masunod nga ginhapitan namon amo ang Batavia (Jakarta subong) sa Indonesia. Wala kami gintugutan nga manaug sa barko bangod sang inaway sibil, kag may engkuentrohanay malapit lang sa amon. Samtang nagapadulong kami sa Singapore, ginahunahuna ko kon ano ang maabtan namon didto. Amo na lang bala ini ang nabilin sa matahom nga Sidlangan nga ginalaragway sang mga magasin tuhoy sa paglakbay?

Pagligad sang pila ka adlaw, nadula ang akon mga pangduhaduha. Ang masunod nga mga hitabo nagpamatuod nga kami ni Dave ginpadala sang Dios sa sini nga pungsod.

Kon Paano Kami Gintugutan nga Magpabilin

Mga isa ka bulan halin sang ginsugdan namon ang paglakbay, nakaabot gid man kami sa isla sang Singapore nga St. John. Diri ginakuarentina ukon ginapain anay ang mga barko tubtob mahatagan na ini sing pahanugot nga makadungka. Nagsaka sa barko ang mga opisyales sang imigrasyon agod usisaon ang mga dokumento sang mga pasahero, kag gintatakan ang amon mga pasaporte nga puede na kami makasulod sa pungsod. Pagkadason nga aga nagdungka na ang barko sa pantalan. Nagpanaug kami dayon pagkatapos nga mausisa sang opisyal sang barko ang amon mga dokumento.

Pagkaaga, nagbalik kami sa pantalan agod magpaalam sa kaupod namon nga mga misyonero. Malakbay pa sila pakadto sa ila mga asaynment sa India kag Ceylon (Sri Lanka subong). Sang makita kami sang kapitan sang barko, nanaug sia kag ginkomprontar niya kami. Naakig sia kag nagsinggit nga dapat wala kami nanaug sa barko. Sang yara pa gali kami sa lawod, ginmanduan sia sang mataas nga opisyal sang imigrasyon nga si Mr. Haxworth nga indi kami pagpapanaugon kon magdungka na ang barko. Apang wala kami makahibalo tuhoy sa sini nga mando lakip na ang opisyal nga nagpahanugot sa amon.

Gin-akigan kami ni Mr. Haxworth sang gindala kami sa iya. Ginsinggitan niya kami nga wala kami ginatugutan nga magsulod sa Singapore. Bangod wala kami kahibalo sini, ginpakita namon ang amon mga pasaporte nga may tatak nga puede kami makasulod sa pungsod. Gin-agaw niya ini kag ginkurisan ang tatak. Apang, wala na sia sing mahimo kay nakahalin na ang barko! Wala niya gin-uli ang amon pasaporte. Apang, pagligad sang isa ka tuig, gin-uli gid man niya ini nga may tatak na liwat nga nagapahanugot sa amon nga magpabilin sa pungsod.

Mabungahon nga Pagpanudlo sang Biblia sa Singapore

Sang mag-abot kami sa Singapore sang Abril 1947, si Joshua lang ang Saksi didto. Isa sia ka payunir, nga amo ang tawag sa ministro sang mga Saksi ni Jehova nga nagahinguyang sing madamo nga tion sa pagpanudlo tuhoy sa Biblia. Napatay sia sang maaga nga bahin sang katuigan 1970. Wala magdugay, ang pila nga gintudluan sang mga kamatuoran sa Biblia nagpaambit man sini sa iban. Ginsabat ang amon mga pangamuyo para sa dugang nga mga mangangani ukon mga manunudlo sang Biblia.​—Mateo 9:37, 38.

Sang 1949, samtang nagabakasyon si Mr. Haxworth sa Inglaterra, anom ka misyonero nga naggradwar sa ika-11 nga klase sang Gilead ang nag-abot sa Singapore. Pero si Dave nga kaupod ko sing pila ka tuig nagmasakit, amo nga kinahanglan sia magbiya sa Singapore. Nagkadto sia sa Australia kag napatay nga matutom sang 1973. Ang isa sa anom ka misyonero nga nag-abot amo si Aileen Franks nga nangin asawa ko sang 1956.

Sa sulod sang mga tinuig, madamo sa amon mga ginatun-an sa Biblia upod sa ila mga kabataan ang nangin mga Saksi. Bisan pa sa karon, ang pila sa ila nagahinguyang sing madamo nga tion sa pagtudlo tuhoy sa Biblia sa iban nga mga pungsod. Halimbawa, isa ka makalilipay nga eksperiensia ang natabo sa Amerikano nga mag-asawa nga sanday Lester kag Joanie Haynes nga nagaistar sa Singapore. Gintun-an namon sila sing Biblia sang katuigan 1950. Gilayon nila nga gin-aplikar ang kamatuoran kag ginbawtismuhan sila pagbalik nila sa Estados Unidos. Nangin mabungahon gid ang ila pagpanudlo sing Biblia. Madamo sila sing nabuligan nga mangin Saksi, lakip na ang ila tatlo ka kabataan.

Si Joanie nagsulat: “Kon ginahanduraw ko ang natabo sadto sa Singapore, ginbag-o gid sini ang direksion sang amon kabuhi. Kon wala ninyo kami gin-ulikdan kag gintudluan sa Biblia, mahimo nga ginalakbay gihapon namon ang bilog nga kalibutan. Nalipay gid ako nga kamo ang nagtudlo kay Les sang kamatuoran, bangod halin sang ginsugdan ninyo ang pagtuon, ginpatudok na ninyo sa iya ang gugma kay Jehova nga Dios kag sa Cristiano nga mga kauturan. Wala gid niya ini malimtan.”

Pag-alagad Bilang Pamilya sa Singapore

Sang 1962, may wala ginapaabot nga hitabo nga nagpabag-o sing daku sa amon kabuhi. Ginpahibalo kami sang doktor nga nagabusong si Aileen. Luyag namon nga magpabilin nga misyonero, apang paano namon mahimo ini nga may ginaatipan nga bata? Nagsulat sa amon si Nathan H. Knorr, ang nagadumala sadto sang hilikuton sang mga Saksi ni Jehova sa bug-os nga kalibutan, kag ginpalig-on niya ako nga mangita sing trabaho agod makapabilin kami sa Singapore. Mabudlay gid ini para sa akon.

Kalabanan nga mga dumuluong sa Singapore may mataas nga posisyon sa mga kompanya. Wala man ako sing eksperiensia sa patag sang negosyo bangod pagkatapos ko eskwela mga 23 ka tuig na ang nagligad, nagsugod ako dayon bilang bug-os tion nga manunudlo sing Biblia. Gani nagbayad ako sa ahensia para sa mga nagapangita sing trabaho sa London kag nagpahimo sing résumé pasad sa akon trabaho nga ministro sang relihion sa iban nga pungsod. Ginpadala nila ini sa dalagku nga mga kompanya sa Singapore.

Ang pirme nga sabat sa akon, “Ginakasubo namon nga wala kami sing trabaho nga bagay sa imo kalipikasyon.” Ginakabig nila nga ang akon ikasarang sobra sa ila ginapangita! Pagligad sang mga binulan, nabun-ag ang amon bata nga si Judy. Si Utod Knorr nga nagabisita sadto sa Singapore, nagduaw sa akon mag-iloy sa ospital. Ginpasalig niya kami, “Makapabilin kamo sa puluy-an sang mga misyonero tubtob makakita si Bill sing trabaho.”

Pila ka bulan sang ulihi, nakaobra ako bilang ahente sa internasyonal nga kompanya sang eroplano. Haluson makaigo ang akon sueldo para sa amon. Pagligad sang duha ka tuig, gintanyagan ako sing trabaho sang lain naman nga kompanya sang eroplano, nga nagdoble sang akon sueldo. Sang ulihi, nakilala ako sa sini nga trabaho, gani nakahinguyang ako sing mas madamo nga tion sa akon pamilya kag sa Cristianong hilikuton.

Ang amon kabuhi nasentro sa pagsimba kay Jehova nga Dios, nga ginauna ang pag-alagad sa iya. Amo nga natigayon ko ang madamo nga pribilehiyo sa pag-alagad sa Dios. Nagpayunir liwat si Aileen. Samtang padayon naman nga nagauswag ang pagwali sing maayong balita sa Singapore. Sang tungatunga sang katuigan 1960, nagbakal kami sing duha ka panalgan nga tinukod nga yara sa sentro sang siudad kag ginhimo ini nga Kingdom Hall. Apat ka kongregasyon ang nagatipon diri.

Gindumilian ang Amon Hilikuton!

Sang ulihi, nag-abot ang pagpamatok. Sang Enero 14, 1972, nagkadto kami sa Kingdom Hall nga regular namon nga ginahimo kada semana agod magtambong sa pagtuon sing Biblia. Apang may kadena kag kandado ang ganhaan. Isa ka pahibalo nga natapik ang nagasiling nga ang Kongregasyon sang mga Saksi ni Jehova sa Singapore indi na rehistrado. Gindumilian ang hilikuton!a

Ang pagpasira sang Kingdom Hall wala nagpauntat sa amon pagsimba kay Jehova nga Dios, apang nagahunahuna ako, ‘Ano ang kabubut-on sang Dios para sa akon pamilya?’ Ginahunahuna ko nga kon pahalinon kami sa pungsod, indi na gid kami makabalik kag makabisita sa amon mga abyan. Gani nangabay ako sa amon manedyer kon puede niya ako masaylo sa Kuala Lumpur, Malaysia. Kon matabo, mahimo nga mahapos lang sa amon pamilya nga maggua kag magsulod sa Singapore. Sa akon kakibot, gintanyagan niya ako nga mangin manedyer sang amon opisina sa Kuala Lumpur, sa amo magadoble ang akon sueldo kag may iban pa nga mga benepisyo.

Nian, ginhunahuna ko, ‘Kabubut-on bala sang Dios nga maghalin kami sa Singapore kag biyaan ang amon mga kauturan?’ Ginpangamuyo namon ini subong pamilya kay Jehova nga Dios. Nag-ugyon kami nga kabubut-on ni Jehova kon ngaa yari kami diri. Gani nagdesisyon ako nga magpabilin kami sa Singapore. Daw indi makapati ang akon manedyer nga wala ko ginbaton ang iya makagalanyat nga tanyag.

Makakululba gid ang pagwali sa idalom sang pagdumili, bangod bisan ano nga oras puede kami dakpon kag prisuhon. May mga tion nga nabatyagan gid namon ang ginasiling sang Salmo 34:7: “Ang manugtunda sang GINOO nagpahamtang sing dologan sa palibut sang nagakahadluk sa iya, kag nagluwas sa ila.”

Bag-o nga Asaynment

Sang 1993, pagkatapos sang 46 ka tuig nga pag-alagad sa Singapore, ginsilingan kami nga magsaylo sa New Zealand sa diin hilway kami nga makaalagad. Nasubuan gid kami nga biyaan ang amon pinalangga nga mga abyan sa Singapore. Apang, makapalig-on gid mahibaluan nga bangod sang ila mabakod nga pagtuo, padayon sila nga nagatindog sing malig-on sa mga pagpamatok nga ginabatas nila tubtob subong.​—1 Corinto 3:12-14.

Sa karon, pagligad sang kapin sa 14 ka tuig sa New Zealand, bisan pa nagatigulang na kami ni Aileen, nalipay kami gihapon sa ministeryo nga hilikuton bilang mga espesyal payunir. Duha sa akon mga utod, si Mike nga 94 anyos, kag si Peter nga 90 anyos, ang padayon nga nagaalagad sing matutom kay Jehova nga Dios sa Canada.

Sang 1998, nagbalik sa Sidlangan ang amon anak nga si Judy kag nag-alagad didto sing pila ka tuig. Sa isa sang iya mga sulat sa amon, nagsiling sia: “Adlaw-adlaw ko gid nga ginapasalamatan si Jehova nga Dios bangod sang tumalagsahon nga pribilehiyo nga mag-alagad diri! Salamat man sa inyo mahigugmaon nga paghanas kag mga sakripisyo nga inyo ginhimo kag padayon pa nga ginahimo agod mangin posible ini tanan.” Sang 2003, nagbalik sia sa New Zealand agod atipanon kami ni Aileen.b

Nagapasalamat gid kami kay Jehova nga Dios nga ang amon kahimtangan nagpahanugot sa amon nga mabaton ang pangabay sang Agalon para sa dugang nga mga mangangani. Ang paghimo sini naghatag sa amon sang walay tupong nga kalipay. Kag kon ‘ang kalibutan magtaliwan,’ nga mahanabo gid suno sa Biblia, magakalipay kita sa katumanan sang matahom nga saad sang Dios: “Sia nga nagahimo sang kabubut-on sang Dios nagapabilin sing dayon.”​—1 Juan 2:17.

[Mga footnote]

[Piktyur sa pahina 29]

Si Joshua lang ang Saksi sa Singapore sang mag-abot kami sang 1947

[Piktyur sa pahina 29]

Upod kay Dave Farmer sa Hong Kong, sang nagapakadto kami sa Singapore, 1947

[Piktyur sa pahina 29]

Upod kay Aileen, 1958

[Piktyur sa pahina 31]

Upod sa amon anak nga si Judy

[Credit Line]

Kimroy Photography

[Credit Line sang piktyur sa pahina 28]

Kimroy Photography