Nagaulikid Bala ang Dios sa Akon?
Kinaandan nga mga Sabat:
▪ “Ang Dios wala nagaulikid sa akon mga problema kay mataas sia katama.”
▪ “Sa banta ko, ang Dios wala nagakabalaka sa akon.”
Ano ang ginsiling ni Jesus?
▪ “Ang lima ka maya ginabaligya sa duha ka sensilyo nga diutay sing balor, indi bala? Apang wala sing isa sa ila ang malipatan sang Dios. Apang bisan ang mga buhok sa inyo ulo naisip na tanan. Indi kamo magkahadlok; mas importante pa kamo sangsa madamo nga maya.” (Lucas 12:6, 7) Wala duhaduha nga gintudlo ni Jesus nga ang Dios nagaulikid sa aton.
▪ “Indi gid kamo magkabalaka kag magsiling, ‘Ano ang aton kaunon?’ ukon, ‘Ano ang aton imnon?’ ukon, ‘Ano ang aton ipanapot?’ Kay ini tanan amo ang mga butang nga maukod nga ginatinguhaan nga maagom sang mga pungsod. Bangod nahibaluan sang inyo langitnon nga Amay nga kinahanglan ninyo ini tanan nga butang.” (Mateo 6:31, 32) Nagapati si Jesus nga nahibaluan sang Dios ang aton mga kinahanglanon.
ANG Biblia maathag nga nagasiling nga ang Dios nagaulikid sa aton. (Salmo 55:22; 1 Pedro 5:7) Apang kon matuod nga nagaulikid sia, ngaa naeksperiensiahan naton karon ang madamo nga pag-antos? Kon mahigugmaon kag makagagahom sia, ngaa wala sia sing ginahimo agod madula ang pag-antos?
Ang sabat sa sini nga mga pamangkot nagadalahig sa kamatuoran nga wala nahibaluan sang madamo nga tawo—si Satanas nga Yawa amo ang manuggahom sining malaut nga kalibutan. Sang ginsulay ni Satanas si Jesus, gintanyag niya kay Jesus ang tanan nga ginharian sini nga kalibutan, nga nagasiling: “Ihatag ko sa imo ini tanan nga awtoridad kag ang ila himaya, bangod natugyan ini sa akon, kag ihatag ko ini bisan kay sin-o nga luyag ko.”—Lucas 4:5-7.
Paano si Satanas nangin manuggahom sang kalibutan? Sang nagtuman kay Satanas kag wala nagsunod sa Dios ang aton una nga mga ginikanan nga sanday Adan kag Eva, daw pareho lang nga ginpili nila si Satanas subong ila manuggahom. Sugod sadto nga pagrebelde, si Jehova nga Dios mapailubon nga naghulat sing tion tubtob mapamatud-an nga wala sing maayo nga resulta ang paggahom ni Satanas. Wala ginapilit ni Jehova ang mga tawo nga simbahon sia, apang ginhatagan niya kita sing kahigayunan nga magbalik sa iya.—Roma 5:10.
Bangod nagaulikid ang Dios sa aton, naghimo sia sing kahimusan paagi kay Jesus agod hilwayon kita sa paggahom ni Satanas. Sa indi madugay, ‘laglagon ni Jesus ang isa nga may ikasarang sa pagpahanabo sing kamatayon, nga amo ang Yawa.’ (Hebreo 2:14) Paagi sa sini, ‘malaglag niya ang mga binuhatan sang Yawa.’—1 Juan 3:8.
Mangin paraiso liwat ang duta. Sa sina nga tion, “pahiran [sang Dios] ang tagsa ka luha sa . . . mga mata [sang mga tawo], kag wala na sing kamatayon, ukon paglalaw ukon paghibi ukon kasakit pa. Ang mga butang sang una nagtaliwan na.”—Bugna 21:4, 5.a
[Nota]
a Para sa dugang pa nga impormasyon kon ngaa ginatugutan sang Dios ang pag-antos, tan-awa ang kapitulo 11 sang libro nga Ano Gid ang Ginatudlo Sang Biblia? nga ginabalhag sang mga Saksi ni Jehova.
[Blurb sa pahina 8]
Mangin paraiso liwat ang duta