Mapinasalamaton Bisan Pa May mga Trahedya—Kon Paano Ako Ginbuligan sang Biblia nga Makabatas

Panugiron ni Enrique Caravaca Acosta

Sang Abril 15, 1971, nagpauli ako para bisitahan ang akon pamilya nga nagaistar sa uma. Nalipay gid ako nga makita sila liwat kay madugay na nga wala ako nakapauli. Wala ako makahibalo kon yara sila tanan sa balay kag kon sin-o ayhan ang una ko nga makita. Pag-abot ko sa balay, nakibot gid ako sang nakita ko ang apat ka tawo nga patay—lakip sa ila amo si Nanay!

DAW tinakluban ako sang langit. Wala ako sing ideya kon ngaa natabo ini. Ano ang himuon ko? Wala sing tawo sa palibot, kag indi ako kahibalo kon ano ang akon himuon. Antes ko padayunon ang akon istorya, isugid ko anay sing malip-ot ang akon nagligad para mahangpan pa gid ninyo ang akon ginbatyag sa sini nga hitabo kag sa iban pa nga trahedya sa akon kabuhi.

Nasapwan Namon ang Kamatuoran

Natawo ako sa Quirimán, malapit sa Nicoya, Costa Rica. Sang 1953, sang 37 anyos ako, nag-istar ako upod sa akon mga ginikanan sa amon uma. Bisan pa ginpadaku kami nga Katoliko, indi kami kontento sa pila ka doktrina kag madamo kami sing pamangkot nga wala nasabat.

Isa ka aga, nagbisita sa amon balay ang isa ka lalaki nga si Anatolio Alfaro, kag ginsilingan niya kami nga magtuon sa Biblia. Ginsugiran niya kami sang madamo nga bersikulo sa Biblia kag sang mga ginatudlo sini. Si Tatay, si Nanay, ang isa ko ka utod nga lalaki, ang manghod ko nga babayi kag ang amiga niya nga nagaistar sa balay, kag ako nagpulungko kag nagpamati gid sa iya. Bilog nga adlaw kami nga nag-istoryahanay kag naglampas pa sa tungang-gab-i. Madamo gid kami sing pamangkot.

Nagtulog sa amon si Anatolio kag nagpabilin asta sang masunod nga adlaw. Nakibot kami sa amon nabatian kag nalipay gid kami sang nasabat mismo sing direkta sa Biblia ang amon mga pamangkot. Yadto nga pag-istoryahanay may daku gid nga epekto sa amon. Ginhunahuna namon ang amon natun-an, kag narealisar nga nasapwan na namon ang kamatuoran. Ginbilinan kami ni Anatolio sang mga magasin kag mga libro parte sa Biblia. Kon gab-i, ginabasa kag ginatun-an namon nga pamilya ini nga mga balasahon. Mabudlay gid ini para sa amon kay wala kami sing koryente. Antes kami magtuon, ang kada isa sa amon nagakuha sing daku nga sako sang patatas kag ginatabon sa amon tiil para indi malamukan.

Pagligad sang anom ka bulan, lima sa amon pamilya ang ginbawtismuhan, lakip na ako kag ang akon mga ginikanan. Nalipay kami sa pagpamalaybalay kag sa pagsugid sa iban sang amon natun-an. Nagalakat kami sing mga duha ka oras kag kon kaisa nagasakay sa kabayo pakadto sa banwa sang Carrillo para mag-upod sa grupo sang mga Saksi ni Jehova didto. Padayon nga nagakadto si Anatolio sa amon balay para tudluan kami sa Biblia. Dayon ginhiwat ang pagtinipon sa amon balay kag mga walo ka tawo ang nagatambong. Tanan sila nabawtismuhan sang ulihi. Nag-uswag ini nga grupo kag nangin kongregasyon nga may 20 ka miembro.

Bug-os Tion nga Pag-alagad sa Dios

Ang sanga talatapan sang mga Saksi ni Jehova sa Costa Rica nag-agda sa mga Saksi nga gusto magsulod sa bug-os tion nga pagbantala. Sang 1957, ginbaton ko ini nga pangagda. Makalilipay gid ini nga hilikuton. Sa masami, isahanon ako nga nagalakat sing mga inoras para makadtuan ang mga tawo sa kaumhan. Kon kaisa wala ako ginabaton sang mga tawo. Madumduman ko nga mga tatlo ka beses ako nga ginlagas sang mga tawo sang ila talibong kay luyag nila mahibaluan kon sin-o ako kag kon ano ang akon ginahimo.

Sang katuigan 1950, indi maayo ang kalabanan nga dalan, kag mabudlay gid kadtuan ang mga tawo. Kinahanglan pa nga magsakay kami sa kabayo para makadtuan namon ang pila ka lugar. Ginasubay namon ang mga suba kag kon kaisa nagatulog kami sa wayang. Nabudlayan pa gid kami kay kadamo sang lamok. Kinahanglan man mag-andam kami sa mga man-ug kag buaya. Bisan pa sini tanan, nalipay ako nga buligan ang mga tawo nga makatuon parte kay Jehova nga Dios. Pagpauli ko, nalipay gid ako bangod nasugid ko sa iban ang kamatuoran sa Biblia. Samtang nagabantala ako kag nagatuon sing Biblia kada adlaw, nagadugang ang akon gugma kay Jehova nga Dios kag nangin suod ako sa iya.

Sang ulihi, ginhatagan pa gid ako sang mga pribilehiyo. Sobra napulo ka tuig nga nag-alagad ako subong nagalakbay nga manugtatap, nga nagabisita kag nagapalig-on sa lainlain nga mga kongregasyon kada semana. Sang ulihi, nag-untat ako sa sini nga pribilehiyo sa pag-alagad bangod sa indi maayo nga panglawas, pero malipayon gihapon ako nga nagaalagad sa Dios sing bug-os tion sa ministeryo.

Nag-abot ang mga Trahedya

Sang yara ako sa Nicoya sang 1971, nagpauli ako para bisitahan ang akon pamilya. Pagsulod ko sa amon balay, nakita ko ang akon 80 anyos nga iloy nga nagahigdaon sa salog. Gintiro sia kag ginbuno. Sang gin-uyatan ko sia, nagaginhawa pa sia. Pero wala madugay, napatay sia sa akon mga butkon. Gin-usisa ko ang palibot, kag didto sa kusina nagahigdaon man ang kusinera nga walo ka bulan nga nagabusong. Patay naman sia. Indi lang ina, nakita ko man nga patay na ang isa pa ka miembro sang kongregasyon nga nagahigdaon sa pasilyo kag ang bata nga lalaki sang kusinera sa banyo. Sila tanan wala kaluoy nga ginbuno kag gintiro. Wala ako makahibalo kon sin-o ang naghimo sining makasiligni nga krimen kag kon ano ang rason.

Sang naggua ako, nakita ko ang akon amay. Gintiro man sia sa ulo pero nabuhi sia! Nagdalidali ako kadto sa balay sang manghod ko nga lalaki, nga mga 15 minutos nga lalakton, kag didto ko nahibal-an nga may isa pa ka mag-iloy nga ginpatay man. Daw indi ako makapati nga ang nagpamatay sa ila amo ang akon 17 anyos nga hinablos nga lalaki, nga indi Saksi ni Jehova kag may diperensia sa panghunahuna! Ginpangita sia sang mga pulis kay nakapalagyo sia. Amo ini ang pinakamasangkad nga pagpangita sang isa ka kriminal sa maragtas sang Costa Rica.

Ini nga krimen ginbalita sa bug-os nga pungsod. Pagligad sang pito ka adlaw, nakita sang mga pulis ang akon hinablos nga may daku nga kutsilyo kag .22 kalibre nga pistola. Ini nga mga armas ginbaligya sa iya bisan pa may diperensia sia sa hunahuna. Natiruhan sia kag napatay sang dalakpon na sia.

Sang ginapangita pa lang sia, madamo ang nagsiling sa akon nga maghalin sa amon lugar kay basi balikan ako sang akon hinablos kag patyon man. Ginpangamuyo ko ini kay kinahanglan ko pa nga magpabilin para buligan ang iban nga miembro sang amon pamilya kag ang mga kauturan sa kongregasyon. Gani wala ako naghalin.

Iban Pa Gid nga mga Trahedya

Makapasubo gid nga napatay man si Tatay pagligad sang isa ka tuig. Pagkasunod nga tuig, ang akon manghod nga babayi, nga matutom nga nagaalagad kay Jehova nga Dios, ginpatay sa lain naman nga insidente. Daw indi liwat makapati ang tanan ko nga paryente nga may napatay naman nga isa ka miembro sang amon pamilya. Indi mapaathag ang kasubo namon kag sang amon mga abyan. Sa sini nga mga kabudlayan, nagasalig gid ako kay Jehova kag padayon nga nagapangayo sang iya kusog.

Sang 1985, nagtambong ako sa tatlo ka adlaw nga paghanas para sa manugtatap sang kongregasyon sang mga Saksi ni Jehova sa kapital nga siudad sang San José. Pagkatapos sang klase, nabatyagan ko nga nagbakod ang akon relasyon kay Jehova nga Dios. Pagka-Lunes, aga pa ako naghalin para makasakay sa bus pauli. Samtang nagalakat ako pakadto sa terminal sang bus, ginlambatan ako sang mga hurong. Ginkuga nila ako kag ginkawatan. Madasig ini katama nga natabo, amo nga wala ko na mahimutaran ang ila hitsura. Bangod sini, indi ko na mahimo nga magtamyaw sa kinaandan nga kustombre sang Costa Rica. Kay diri sa probinsia sang Guanacaste, nagasinggit ang mga lalaki kon magkit-anay kag magtamyawanay sila. Amo man sini ang ila ginahimo kon ipahibalo nila nga ara sila. Antes ini natabo makasinggit pa ako sing maayo, pero pagkatapos sini indi ko na ini mahimo.

Sang 1979, ginpangasawa ko si Celia, isa man ka Saksi sa malapit nga kongregasyon. Ginhigugma gid ni Celia ang Biblia. Ginbasa kag gintun-an namon ini adlaw-adlaw. Makapasubo nga napatay sia bangod sa kanser sang Hulyo 2001. Kon kaisa, ginasubuan gid ako, apang ang paglaum nga pagkabanhaw nagapabakod sa akon.—Juan 5:28, 29.

Malipayon Bisan Pa May mga Pagtilaw

Bisan pa nakaeksperiensia ako sing madamo nga makasiligni nga hitabo sangsa iban nga tawo, ginkabig ko ini nga mga kahigayunan para mapamatud-an ko ang akon pagtuo kag pagkamainunungon kay Jehova. (Santiago 1:13) Para mabuligan ako nga indi magnegatibo bangod sa akon mga inagihan, padayon ko nga ginapahanumdom ang akon kaugalingon nga “ang tion kag ang kahigayonan” nagakahanabo sa aton tanan. (Manugwali 9:11) Ginadumdom ko man nga yari na kita karon sa “makahalanguyos nga mga tion nga mabudlay atubangon,” kay ang mga tawo mabangis, masingki, kag wala sing pagpugong sa kaugalingon. (2 Timoteo 3:1-5) Ginadumdom ko man ang halimbawa ni Job. Bisan pa sang tanan niya nga pag-antos—pagkadula sang iya pamilya, kapagros, kag palangabuhian—si Job malig-on nga nagsiling: “Padayon nga pakamaayuhon ang ngalan ni Jehova.” Gani, ginpakamaayo sing bugana ni Jehova si Job bangod sa iya integridad. (Job 1:13-22; 42:12-15, NW) Ini tanan nga ihibalo sa Biblia nagabulig sa akon nga magpabilin nga malipayon bisan pa may madamo nga mga pagtilaw.

Ginabuligan ako pirme ni Jehova nga padayon nga unahon sia sa akon kabuhi. Ang pagbasa sang Biblia adlaw-adlaw naghatag sa akon sing daku nga kaumpawan kag kabakod nga makabatas. Paagi sa pagdangop kay Jehova sa pangamuyo, nabatyagan ko “ang paghidait sang Dios nga nagalabaw sa tanan nga panghunahuna.” (Filipos 4:6, 7) Amo ini ang naghatag sa akon sang kalinong. Ang pagtambong kag pagpakigbahin sa Cristiano nga mga pagtililipon nagpalig-on man sang akon pagtuo.—Hebreo 10:24, 25.

Bisan tigulang na, nagapasalamat ako kay Jehova nga makasarang gihapon ako sa pag-alagad upod sa akon mga kauturan nga Cristiano, sa pagtudlo sing Biblia sa iban, kag sa pagpakigbahin sa ministeryo. Ang pag-alagad sa iban sa sini nga mga paagi nagahatag sa akon sing kusog nga maatubang ang kalisod. Daku gid ang akon pagpasalamat kay Jehova bisan pa naagihan ko ang madamo nga trahedya sa akon kabuhi.a

[Nota]

[Blurb sa pahina 20]

Ang pagbasa sang Biblia adlaw-adlaw naghatag sa akon sing daku nga kaumpawan kag kabakod nga makabatas

[Retrato sa pahina 19]

Sang bag-uhan pa lang ako nga nagahatag sing pamulongpulong sa Biblia

[Retrato sa pahina 20]

Samtang nagabantala sang bataon pa ako