Panudlo 6: Luyag sang Dios nga Maggamit Kita sing mga Imahen sa Pagsimba

Diin ini naghalin?

“Sang una, wala ginasimba sang mga Cristiano ang mga imahen . . . Pero sang ikap-at kag ikalima nga siglo, gingamit sang simbahan ang mga imahen kay nagapati sila nga paagi sini, mas mahapos matun-an sang mga ignorante ang panudlo sang Cristianismo sangsa mga sermon kag mga libro.”— Cyclopedia of Biblical, Theological, and Ecclesiastical Literature, ni McClintock kag Strong, Volume 4, pahina 503 kag 504.

Ano ang ginasiling sang Biblia?

“Indi ka maghimo para sa imo kaugalingon sang isa ka diosdios ukon isa ka larawan sang bisan ano nga tinuga sa langit, ukon sa duta, ukon sa tubig nga yara sa idalom sang duta. Indi ka magluhod ukon magsimba sa bisan ano nga diosdios.” (Exodo 20:4, 5, Maayong Balita nga Biblia) Ginsulatan ni apostol Juan ang mga Cristiano sang unang siglo: “Mga anak, maglikaw kamo sa mga dios-dios.”—1 Juan 5:21, Ang Pulong sang Dios.

Ang simbahan nagasiling nga ang mga imahen paagi lamang para makapalapit kita kag mapakita ang aton pagtahod sa ginarepresentar sini. Husto bala sila? Suno sa The Encyclopedia of Religion, “Sang primero, ginagamit lang ang mga imahen sa pagtudlo kag ginadekorar sa mga simbahan; amo sini ang ila ginbalibad. Pero sang ulihi, gin-aku sang simbahan nga ginasimba na nila ini. Amo gid sini ang ginahimo sa mga imahen sang Eastern Orthodoxy.” Apang, si propeta Isaias namangkot: “Kay sin-o bala ninyo ipaanggid ang Dios? Sa ano bala nga larawan ipaangay ninyo sia?”—Isaias 40:18, Biblia sang Katilingban sang mga Kristiano.

Basaha ini nga mga teksto: Isaias 44:13-19; Binuhatan 10:25, 26; 17:29; 2 Corinto 5:7