“Isa Na Lang Gid”

SI Allen nagtilaw-tilaw sa pag-inom sang 11 anyos sia sang nagahampang sila sang iya mga amigo sa kakahuyan.a Ginasunod nila ang ginahimo sang mga karakter sa pelikula. Lahoglahog lang ini pero ang alkohol nga ila ginainom tuodtuod.

Sang 40 anyos na si Tony, amat-amat sia nga nagpalainom, halin sa isa ukon duha ka baso kada gab-i, asta nga nangin lima ukon anom. Sang ulihi, indi na niya maisip kon daw ano kadamo ang iya mainom sa isa ka adlaw.

Si Allen nangayo sing bulig para mauntat ang iya bisyo. Gani, buhi pa sia subong kag nakaistorya pa sia sang natabo sa iya. Si Tony naman wala magbaton sang bulig sang iya pamilya kag mga abyan. Sang ulihi, napatay sia sa aksidente sa motor sa sobra nga kahulugbon.

Ang pagpahubog may malain nga epekto indi lamang sa nagainom kundi sa iban man. Pirme ini nagaresulta sa pagbuyayaw, pagpanakit, pagbalatian, aksidente, ukon kamatayon pa gani. Bangod sini, binilyon ka dolyar ang nauyang nga kuarta kada tuig, wala labot sa mga problema nga mahatag sini sa mga tawo, sa pamilya, kag sa kabataan.

“Indi tanan nga nagainom adlaw-adlaw palahubog,” siling sang U.S. National Institutes of Health, “kag indi tanan nga palahubog, nagainom adlaw-adlaw.” Madamo nga tawo ang indi man palahubog pero wala nila matalupangdan nga sobra na sila mag-inom. Ang iban naman talagsa lang nagainom pero sobra lima ka baso ang ila maubos sa isa lang ka pungko.

Kon nagainom ka, paano mo masiling nga sobra na ang imo nainom? Paano mo mahibal-an nga dapat indi ka na magsiling nga “isa na lang gid”? (Hulubaton 23:29, 30, Contemporary English Version) Binagbinagon sang masunod nga artikulo ini nga topiko.

[Nota]