Ang Paggahom ni Satanas Pat-od Gid nga Mapaslawan
“Malain ang madangatan sang malauton.”—MAN. 8:13, NW.
1. Ngaa ang nagahilapit nga paghukom sa mga malauton isa ka makalilipay nga balita?
SA INDI madugay ang tanan nga malauton pagahukman. Manabat sila sa ila ginpanghimo. (Hulu. 5:22; Man. 8:12, 13) Makalilipay gid ini nga balita, ilabi na para sa mga tawo nga nagahigugma sa pagkamatarong kag sa mga nagaantos sing inhustisya kag pagpamigos sa kamot sang mga malauton. Ang panguna nga malauton nga pagahukman amo ang amay sang kalautan, si Satanas nga Yawa.—Juan 8:44.
2. Ngaa kinahanglan ang tion agod masolbar ang hulusayon nga nag-utwas sa Eden?
2 Ang natabo sa Eden resulta sang paghatag ni Satanas sing tuman nga importansia sa iya kaugalingon amo nga ginsulay niya ang mga tawo nga sikwayon ang paggahom ni Jehova. Bangod sini ang aton unang mga ginikanan nagbuylog kay Satanas sa paghangkat sa matarong nga awtoridad ni Jehova kag nangin makasasala sila sa panulok sang Dios. (Roma 5:12-14) Sa umpisa pa lang nahibaluan na ni Jehova kon ano ang madangatan sang ila pagrebelde. Apang ang malain nga resulta sini dapat makita sang tanan nga intelihente nga mga tinuga. Gani kinahanglan ang tion agod masolbar ang hulusayon kag mapamatud-an nga sala gid ang ginhimo sang mga rebelde.
3. Paano naton ginatamod ang panguluhan sang tawo?
3 Bangod ginsikway sang mga tawo ang paggahom ni Jehova, kinahanglan sila magtukod sang ila kaugalingon nga panguluhan. Sang nagsulat si apostol Pablo sa iya mga masigkatumuluo sa Roma, ginpatuhuyan niya ang tawhanon nga panguluhan subong “superyor nga mga awtoridad.” Sang panahon ni Pablo, ang superyor nga awtoridad amo ang panguluhan sang Roma nga gingamhan ni Emperador Nero sugod sang 54-68 C.E. Si Pablo nagsiling nga inang superyor nga awtoridad “ginbutang sang Dios sa ila relatibo nga mga posisyon.” (Basaha ang Roma 13:1, 2.) Ginapahangop bala ni Pablo nga ang paggahom sang tawo mas superyor sangsa paggahom sang Dios? Wala. Sa baylo, buot niya silingon nga samtang ginapahanugutan ni Jehova nga magluntad ang panguluhan sang tawo, dapat tahuron sang mga Cristiano ang “kahimusan sang Dios” kag magkooperar sa sining mga gumalahom.
Isa ka Dalan Padulong sa Kalaglagan
4. Ipaathag kon ngaa ang paggahom sang tawo pat-od gid nga mapaslawan.
4 Ang paggahom sang tawo sa idalom sang impluwensia ni Satanas indi gid magmadinalag-on. Ngaa? Ang isa ka rason, bangod wala ini napasad sa diosnon nga kaalam. Si Jehova gid lamang ang may himpit nga kaalam. Gani sia lamang ang masaligan nga giya kon paano magmadinalag-on ang paggahom. (Jer. 8:9; Roma 16:27) Indi pareho sang mga tawo nga masami nagatuon paagi sa pag-eksperimento, si Jehova nakahibalo na kon ano ang pinakamaayo nga himuon. Ano man nga paagi sang paggahom nga wala nagasunod sa panuytoy sang Dios indi gid magmadinalag-on. Bangod sa sina nga rason, kag sa makagod nga motibo ni Satanas, makapat-od gid kita nga ang paggahom ni Satanas paagi sa mga panguluhan sang tawo mapaslawan gid sa umpisa pa lang.
5, 6. Ano ang nagtulod kay Satanas nga pamatukan si Jehova?
5 Ang isa ka mahinantupon nga tawo indi maghimo sang isa ka proyekto nga nahibaluan niya nga mapaslawan lang. Apang kon padayunon niya ang paghimo sini, mapilitan sia nga batunon nga nagsala sia. Napamatud-an na sang kasaysayan nga wala gid sing pulos nga pamatukan ang labing gamhanan nga Manunuga. (Basaha ang Hulubaton 21:30.a) Apang, bangod sa bugal kag tuman nga pagpaimportante ni Satanas sa iya kaugalingon nagtalikod sia kay Jehova. Gani, hungod nga ginpili sang Yawa ang dalan nga magapadulong lamang sa kalaglagan.
6 Ang makahas nga panimuot ni Satanas ginpakita man sang gumalahom sang Babilonia nga nagpabugal: “Magasaka ako sa langit; pataason ko ang akon trono labaw sa kabitoonan sang Dios; magalingkod ako sa bukid sang katilingban sa kaukbungan sang aminhan; magasaka ako labaw sa kataason sang mga panganud, magapakaangay ako sa Labing Mataas.” (Isa. 14:13-15) Ining malaut nga plano sang gumalahom napaslawan, kag ang dinastiya sang Babilonia napukan sa makahuluya nga paagi. Sing kaanggid, si Satanas kag ang iya kalibutan pagalaglagon man sing bug-os sa indi madugay.
Ngaa Gintugutan?
7, 8. Ano ang mga benepisyo sang temporaryo nga pagpahanugot ni Jehova sa kalautan?
7 Ang iban mahimo mamangkot kon ngaa wala ginpunggan ni Jehova ang mga tawo nga magdampig kay Satanas kag magtukod sang panguluhan nga pat-od nga mapaslawan lang. Subong Dios nga Labing Gamhanan, sarang niya ini mahimo. (Ex. 6:3, NW) Apang, bangod sa iya kaalam wala niya ini ginhimo kay nahibaluan niya nga ang temporaryo nga pagpahanugot sa pagrebelde sang tawo magaresulta sa kaayuhan. Sa ulihi, magabindikar ini kay Jehova subong ang matarong kag mahigugmaon nga Gumalahom kag magahatag ini sing benepisyo sa matutom nga mga tawo.
8 Wala kuntani naeksperiensiahan sang katawhan ang tuman nga pag-antos kon wala sila nagbuylog kay Satanas kag wala nagtukod sang ila kaugalingon nga paggahom. Apang, ang temporaryo nga pagpahanugot ni Jehova sa tawo nga gamhan ang ila kaugalingon may yara mga benepisyo. Bangod sini nakita sang matarong nga mga indibiduwal nga maalamon gid nga magpamati kag magsalig sa Dios. Sa sulod sang mga siglo gintilawan sang mga tawo ang nanuhaytuhay nga porma sang gobierno, apang wala gid sang bisan isa sa sini ang nagmadinalag-on. Ini nga kamatuoran nagkumbinse sa mga sumilimba sang Dios nga ang paggahom ni Jehova amo lamang ang pinakamaayo. Huo, ang pagpahanugot ni Jehova sa malaut nga paggahom ni Satanas nagresulta sa pag-antos sang katawhan, lakip na sang matutom nga mga sumilimba sang Dios. Pero, ang temporaryo nga pagpahanugot sa kalautan naghatag man sing mga benepisyo sa sining matutom nga mga sumilimba.
Ang Pagrebelde nga Nagdul-ong sa Kahimayaan ni Jehova
9, 10. Ipaathag kon paano ang paggahom ni Satanas nagresulta sa kahimayaan ni Jehova.
9 Ang pagpahanugot ni Jehova sa paggahom sang tawo sa idalom sang impluwensia ni Satanas wala nakabuhin sang Iya kredibilidad sa paggahom kundi nakadugang pa gani ini. Napamatud-an sang kasaysayan nga husto gid ang inspirado nga pinamulong ni Jeremias nga ang tawo wala sing ikasarang nga gamhan ang iya kaugalingon. (Basaha ang Jeremias 10:23.) Dugang pa, ang pagrebelde ni Satanas naghatag sing kahigayunan kay Jehova nga mapakita ang Iya maayo nga mga kinaiya sa mas talalupangdon nga paagi. Paano?
10 Kon wala magrebelde si Satanas wala naton makita sing subong sini ka talalupangdon ang himpit nga mga kinaiya ni Jehova. Paagi sa sini, kapin pa gid sia nga nakilala sang mga nagahigugma sa iya. Daw indi mapatihan, pero ang paggahom ni Satanas nagresulta sa kahimayaan sang Dios. Ginpadaku sini ang pinakamaayo nga paagi ni Jehova sa pag-atubang sa hangkat sa iya pagkasoberano. Agod mahangpan ini nga kamatuoran, binagbinagon naton ang pila sang mga kinaiya ni Jehova kag hibaluon kon paano ang malaut nga paggahom ni Satanas nagpahulag kay Jehova nga ipakita ining mga kinaiya sa mas talalupangdon nga paagi.
11. Paano ginpakita ni Jehova ang iya gugma?
11 Gugma. Ang Kasulatan nagasiling sa aton nga “ang Dios gugma.” (1 Juan 4:8) Ang gugma sang Dios ginpakita niya paagi sa pagtuga sa mga tawo. Dugang pa, ang makahalangawa kag makatilingala nga paagi sang pagtuga sa aton nagapamatuod sang gugma sang Dios. Si Jehova mahigugmaon man nga nag-aman sing matahom nga puluy-an para sa mga tawo kag sang tanan nila nga kinahanglanon agod mangin malipayon. (Gen. 1:29-31; 2:8, 9; Sal. 139:14-16) Apang sang nagpakasala ang tawo, ginpakita ni Jehova ang iya gugma sa tuhay nga paagi. Paano? Ginkutlo ni apostol Juan ang ginsiling ni Jesus: “Kay ginhigugma gid sang Dios ang kalibutan amo nga ginhatag niya ang iya bugtong nga Anak, agod ang tagsatagsa nga nagatuo sa iya indi malaglag kundi makatigayon sang kabuhi nga walay katapusan.” (Juan 3:16) May labaw pa bala nga paagi nga mapakita sang Dios ang iya gugma sangsa ipadala ang iya bugtong nga Anak sa duta agod gawaron ang makasasala? (Juan 15:13) Ining daku nga gugma nga ginpakita sang Dios nangin huwaran para sa mga tawo. Mahimo nila mailog ining masinakripisyuhon nga gugma sang Dios sa ila adlaw-adlaw nga pagkabuhi, kaangay sang ginhimo ni Jesus.—Juan 17:25, 26.
12. Sa ano nga mga paagi ginpakita ni Jehova ang iya gahom?
12 Gahom. Ang Dios lamang nga “Labing Gamhanan,” ang may gahom sa pagtuga sang kabuhi. (Bug. 11:17; Sal. 36:9) Sa tion nga mabun-ag ang isa ka tawo, kaangay pa lang sia sa isa ka blangko nga papel. Kon mapatay na sia, ini nga papel puno na sang iya mga hinimuan, mga desisyon kag mga eksperiensia nga nagdihon sang iya bug-os nga pagkatawo. Ina nga mga impormasyon sarang matago ni Jehova sa iya memorya. Pag-abot sang tion, sarang ni Jehova banhawon inang tawo kag ibalik ang iya pinasahi nga personalidad. (Juan 5:28, 29) Gani, bisan pa ang kamatayon indi bahin sang orihinal nga katuyuan sang Dios para sa mga tawo, naghatag ini sing kahigayunan kay Jehova nga ipakita nga may gahom sia sa pagbanhaw sa mga patay. Huo, si Jehova amo ang Dios nga “Labing Gamhanan.”
13. Paano ginpakita sang halad ni Jesus ang himpit nga katarungan ni Jehova?
13 Katarungan. Si Jehova wala nagabutig ukon nagahimo sing pagkadimatarong. (Deut. 32:4; Tito 1:2) Ginasunod gid sang Dios ang iya mataas nga talaksan sang kamatuoran kag katarungan bisan pa ang paghimo sini daw disbentaha sa iya. (Roma 8:32) Daw ano gid kasakit para kay Jehova nga makita ang iya pinalangga nga Anak nga mapatay sa usok sang pag-antos subong isa ka manugpasipala! Pero, bangod sang iya gugma sa di-himpit nga mga tawo, gintugutan ni Jehova nga matabo ini agod matuman ang iya himpit nga talaksan sang katarungan. (Basaha ang Roma 5:18-21.) Ang pagluntad sang kalibutan nga wala sing katarungan naghatag kay Jehova sing kahigayunan nga ipakita nga ang iya katarungan wala sing tupong.
14, 15. Ano ang pila ka paagi nga ginpakita ni Jehova ang iya wala tupong nga kaalam kag pagpailob?
14 Kaalam. Sa tapos nagpakasala sanday Adan kag Eva, ginpahibalo gilayon sang Dios kon paano niya dulaon ang malain nga epekto sang ila pagrebelde. (Gen. 3:15) Ang iya madasig nga pagpanghikot kag amat-amat nga pagpahayag sang mga detalye sang iya katuyuan sa iya mga alagad nagapamatuod sang wala tupong nga kaalam ni Jehova. (Roma 11:33) Wala gid sing may makaupang sa ikasarang sang Dios sa pagsolbar sa mga problema. Sa kalibutan nga puno sang imoralidad, inaway, pagkadimakatarunganon, pagkamalinapason, pagkawalay-kaluoy, pagpasulabi, kag pagkasalimpapaw, madamo sang kahigayunan si Jehova nga ipakita sa iya mga tinuga kon ano ang matuod nga kaalam. Si disipulo Santiago nagsiling: “Ang kaalam nga gikan sa hitaas una sa tanan putli, dayon mahidaiton, makatarunganon, handa sa pagtuman, puno sang kaluoy kag maayong mga bunga, wala sing ginapasulabi, indi salimpapaw.”—Sant. 3:17.
15 Pagpailob kag Pagkamapinasensiahon. Ang pagkamapailubon kag pagkamapinasensiahon ni Jehova mahimo nga wala kuntani makita sing subong sini kaathag kon wala nagluntad ang di-kahimpitan, sala kag kakulangan sang mga tawo nga kinahanglan niya pakig-angutan. Ang kahanda ni Jehova sa paghimo sini sa sulod sang linibo ka tuig nagapamatuod nga himpit ang iya pagpailob kag pagkamapinasensiahon. Bangod sini, dapat gid kita mangin mapinasalamaton. Nagakaigo gid nga nagsiling si apostol Pedro nga kabigon naton “ang pagpailob sang aton Ginuo subong kaluwasan.”—2 Ped. 3:9, 15.
16. Ngaa ang kahanda ni Jehova sa pagpatawad nagahatag sa aton sing daku nga kalipay?
16 Handa sa Pagpatawad. Kita tanan makasasala kag nagakasandad sing madamong beses. (Sant. 3:2; 1 Juan 1:8, 9) Dapat gid kita magpasalamat nga si Jehova nagapatawad “sing bugana.” (Isa. 55:7) Binagbinaga ini: Bangod natawo kita nga makasasala, sarang naton mabatyagan ang daku gid nga kalipay kon patawaron sang Dios ang aton mga sala. (Sal. 51:5, 9, 17) Bangod kita mismo nakaeksperiensia sang pagpatawad ni Jehova, labi nga nagalig-on ang aton gugma sa iya kag nagapahulag ini sa aton nga ilugon ang iya halimbawa sa aton pagpakig-angot sa iban.—Basaha ang Colosas 3:13.
Kon Ngaa ang Kalibutan Nagabalatian
17, 18. Sa ano nga mga paagi napaslawan ang paggahom ni Satanas?
17 Ang mga panguluhan sa kalibutan nga ginagamhan ni Satanas sulitsulit kag padayon nga nagakapaslawan sa sulod sang mga siglo. Sang 1991, ang pamantalaan nga The European nagsiling: “Ang kalibutan bala nagabalatian? Huo, apang . . . indi ang Dios ang kabangdanan sini kundi ang mga tawo.” Matuod gid ina. Bangod sa impluwensia ni Satanas, ginpili sang aton unang mga ginikanan ang paggahom sang tawo sangsa paggahom ni Jehova. Sa amo, ginsugdan nila ang isa ka sahi sang paggahom nga pat-od gid nga mapaslawan. Ang kasakit kag pag-antos nga naeksperiensiahan sang mga tawo sa bug-os nga kalibutan nagapakita nga ang paggahom sang tawo may depekto.
18 Ang paggahom ni Satanas nagapasanyog sang pagkamaiyaiyahon. Apang indi madaug sang pagkamaiyaiyahon ang gugma nga amo ang basihan sang paggahom ni Jehova. Ang paggahom ni Satanas wala nakahatag sing kalig-unan kag kalipay. Gani, napamatud-an gid nga ang paggahom ni Jehova amo ang pinakamaayo! May yara bala kita pamatuod sini sa karon? Huo, binagbinagon naton ini sa masunod nga artikulo.
[Nota]
a Hulubaton 21:30 (NW): “Wala sing kaalam, wala sing paghangop, wala sing laygay kon ginapamatukan si Jehova.”
Ano ang Aton Natun-an Tuhoy sa Paggahom sa Pagbasa sang . . .
• Roma 13:1, 2?
• Colosas 3:13?
[Mga Retrato sa pahina 25]
Wala gid sing nahatag nga benepisyo sa katawhan ang paggahom ni Satanas
[Credit Lines]
U.S. Army photo
WHO photo by P. Almasy
[Retrato sa pahina 26]
Si Jehova may gahom sa pagbanhaw sa mga patay
[Retrato sa pahina 27]
Ang gugma kag katarungan ni Jehova nangin hayag paagi sa halad sang iya Anak