Ano ang Epekto sa Imo sang Mensahe ni Jesucristo?

“Nagkari ako agod makatigayon sila sang kabuhi kag matigayon nila ini sing bug-os.”—JUAN 10:10.

SI Jesucristo nagkadto sa duta para maghatag sa aton sing isa ka malahalon nga regalo. Ini nga regalo amo ang mensahe nga iya ginwali nga nagaunod sing kamatuoran parte sa Dios kag sa Iya kabubut-on. Kon batunon mo ini nga mensahe, mangin malipayon ka man pareho sang minilyon ka matuod nga Cristiano subong.a Pero ang importante nga bahin sang mensahe ni Jesus amo ang pinakamalahalon nga regalo sa tanan. Ini amo ang paghatag niya sang iya perpekto nga kabuhi para sa aton. Ang aton palaabuton nagadepende kon batunon naton kag sundon ini nga mensahe.

Ano ang ginhatag sang Dios kag ni Cristo? Nahibaluan ni Jesus nga paantuson sia kag patyon sang iya mga kaaway. (Mateo 20:17-19) Pero sa popular nga teksto sa Juan 3:16, nagsiling sia: “Ginhigugma gid sang Dios ang kalibutan amo nga ginhatag niya ang iya bugtong nga Anak, agod ang tagsatagsa nga nagatuo sa iya indi malaglag kundi makatigayon sang kabuhi nga walay katapusan.” Nagsiling man si Jesus nga nagkari sia para “ihatag ang iya kalag [ukon kabuhi] subong gawad nga kabaylo sang madamo.” (Mateo 20:28) Ngaa nagsiling sia nga ang iya kabuhi ihatag sa baylo nga kuhaon?

Bangod daku gid ang gugma sang Dios sa aton, naghimo sia sing kahimusan para luwason ang mga tawo sa ginpanubli nila nga sala kag sa mga resulta sini nga di-kahimpitan kag kamatayon. Ginpadala sang Dios ang iya bugtong nga Anak diri sa duta para ihalad ang iya kabuhi. Matinumanon nga ginhatag ni Jesus ang iya perpekto nga kabuhi para sa aton. Ini nga kahimusan ginatawag nga gawad. Amo ini ang pinakamalahalon nga regalo sang Dios para sa katawhan kay nagadul-ong ini sa kabuhi nga walay katapusan.b

Ano ang dapat mo himuon? Ang gawad bala personal nga regalo sa imo? Depende ini kon batunon mo. Sa pag-ilustrar: Ibutang ta nga may nagdaho sa imo sang isa ka regalo. Siempre mangin imo lang ini kon kuhaon mo kag batunon. Sing kaanggid, gintanyagan ka man ni Jehova sang gawad. Pero ini nga regalo mangin imo lamang kon kuhaon mo ini kag batunon. Paano?

Nagsiling si Jesus nga ang mga “nagatuo” sa iya makabaton sing kabuhi nga walay katapusan. Mapakita mo nga nagatuo ka sa iya paagi sa imo pagkabuhi. (Santiago 2:26) Nagakahulugan ini nga sundon mo ang mga ginsiling kag ginhimo ni Jesus. Pero, dapat mo anay makilala sing maayo si Jesus kag ang iya Amay. Nagsiling si Jesus: “Ini nagakahulugan sang kabuhi nga walay katapusan, ang pagkuha nila sing ihibalo tuhoy sa imo, ang lamang matuod nga Dios, kag tuhoy sa isa nga imo ginpadala, si Jesucristo.”—Juan 17:3.

Mga 2,000 na ka tuig ang nagligad, may mensahe si Jesus nga nagpabag-o sa kabuhi sang madamo nga tawo sa bilog nga kalibutan. Gusto mo bala mahibaluan kon ano ini nga mensahe? Kag paano kamo, sang imo mga pinalangga, makabenepisyo sa sini nga mensahe karon kag sa walay katapusan? Malipay ang mga Saksi ni Jehova nga buligan kamo.

Ang masunod nga mga artikulo makabulig sa imo nga makilala pa gid si Jesucristo, ang nagwali sang mensahe nga makapabag-o sang imo kabuhi.

[Mga Nota]