Ang Papel sang Balaan nga Espiritu sa Pagtuman sang Katuyuan ni Jehova

“Ang akon polong nga nagagowa sa akon baba . . . magauswag ini sa butang nga akon ginpadal-an sini.”—ISA. 55:11.

1. Iilustrar ang kinatuhayan sang plano kag sang katuyuan.

HUNAHUNAA nga may duha ka tawo nga nagahanda sa pagbiyahe pakadto sa isa ka destinasyon. Ang isa may pat-od kag espesipiko nga ruta nga agyan. Ang isa naman wala sing espesipiko nga ruta apang madamo sing nahibaluan nga dalan nga puede agyan agod makalab-ot sa iya destinasyon. Ini nga halimbawa nagapakita kon ano ang kinatuhayan sang plano kag sang katuyuan. Ang plano amo ang pagpat-od nga sundon ang isa ka espesipiko kag detalyado nga ruta, samtang ang katuyuan amo ang pagpat-od sang isa ka tulumuron apang wala sing ginasunod nga espesipiko nga paagi sa paglab-ot sini.

2, 3. (a) Ano ang nadalahig sa katuyuan ni Jehova, kag ano ang ginhimo niya sang nagpakasala sanday Adan kag Eva? (b) Ngaa kinahanglan nga mahangpan naton kon paano amat-amat nga ginatuman ni Jehova ang iya katuyuan?

² Si Jehova wala sing ginasunod nga espesipiko nga plano sa pagtuman sang iya kabubut-on, kundi may yara sia katuyuan nga amat-amat niya nga ginapahayag. (Efe. 3:11) Ini nga katuyuan nagadalahig sa iya orihinal nga tuyo nga himuon ang duta nga paraiso para puy-an sang himpit nga katawhan nga magakabuhi sa paghidait kag kalipay sing walay katapusan. (Gen. 1:28) Sang nagpakasala sanday Adan kag Eva, naghimo si Jehova sang mga kahimusan agod pat-uron nga matuman ang iya katuyuan. (Basaha ang Genesis 3:15.) Namat-od si Jehova nga ang iya simbuliko nga babayi magapatubas sang isa ka “binhi,” ukon Anak, nga sa ulihi amo ang magalaglag kay Satanas kag magadula sang tanan nga halit nga ginhimo sang Yawa.—Heb. 2:14; 1 Juan 3:8.

³ Wala sing gahom sa langit ukon sa duta nga sarang makapugong sa Dios sa pagtuman sang iya ginpahayag nga katuyuan. (Isa. 46:9-11) Ngaa? Bangod nadalahig sa sini ang balaan nga espiritu ni Jehova. Ining tuman ka gamhanan nga puersa nagagarantiya nga ang katuyuan sang Dios pat-od gid nga “magauswag” ukon magamadinalag-on. (Isa. 55:10, 11) Gani, importante gid nga mahangpan naton kon paano amat-amat nga ginatuman sang Dios ang iya katuyuan bangod ang aton paglaum nga kabuhi nasandig sa katumanan sini. Dugang pa, ang aton pagtuo magabakod kon makita naton kon paano ginagamit ni Jehova ang balaan nga espiritu. Gani, binagbinagon naton ang papel sang espiritu sang una, sa karon, kag sa palaabuton, sa pagtuman sang katuyuan ni Jehova.

Ang Papel sang Balaan nga Espiritu sang Una

4. Paano amat-amat nga ginpahayag ni Jehova ang iya katuyuan?

⁴ Sang panahon sang Biblia, amat-amat nga ginpahayag ni Jehova ang iya katuyuan. Sang una, nagpabilin nga “isa ka sagrado nga likom” kon sin-o ang ginsaad nga Binhi. (1 Cor. 2:7) Pagligad pa sang mga 2,000 ka tuig nga ginsambit liwat ni Jehova ang tuhoy sa binhi. (Basaha ang Genesis 12:7; 22:15-18.) Si Jehova naghatag kay Abraham sing saad nga may masangkad nga katumanan. Ang pinamulong nga “sa imo mga kaliwatan” maathag nga nagapakita nga inang Binhi isa ka tawo, isa nga kaliwat ni Abraham. Pat-od gid nga ginbantayan ni Satanas ang pagpahayag sini nga mga detalye. Luyag niya laglagon ukon halitan ang linya sang kaliwatan ni Abraham agod maupangan ang katuyuan sang Dios. Apang imposible gid ina, bangod ang di-makita nga espiritu sang Dios padayon nga nagapanghikot. Sa ano nga mga paagi?

5, 6. Paano gingamit ni Jehova ang iya espiritu sa pag-amlig sa mga indibiduwal sa linya sang kaliwatan nga pagahalinan sang Binhi?

⁵ Gingamit ni Jehova ang iya espiritu sa pag-amlig sa mga indibiduwal sa linya sang kaliwatan nga pagahalinan sang Binhi. Si Jehova nagsiling kay Abram (Abraham): “Ako ang imo taming.” (Gen. 15:1) Ini nga pasalig gintuman gid sang Dios. Halimbawa, binagbinaga ang natabo sang mga 1919 B.C.E. sang temporaryo nga nag-istar sanday Abraham kag Sara sa Gerar. Si Abimelec nga hari sang Gerar wala makahibalo nga si Sara asawa ni Abraham, gani ginkuha niya ini agod mangin iya asawa. Indi ayhan nga ginmaniobra ni Satanas ini nga hitabo para indi makabun-ag si Sara sang binhi ni Abraham? Wala kita sang mabasa sa Biblia. Apang ginasugid sini sa aton nga nagpasilabot si Jehova. Ginpaandaman niya si Abimelec paagi sa damgo nga indi pagtandugon si Sara.—Gen. 20:1-18.

⁶ Indi lamang ini isa ka bes nga natabo. Madamo nga tion nga ginluwas ni Jehova si Abraham kag ang iya pamilya. (Gen. 12:14-20; 14:13-20; 26:26-29) Gani ang salmista nakasiling tuhoy kay Abraham kag sa iya mga kaliwat: “Wala sia [si Jehova] magtugut sing tawo sa paghimo sing malain sa ila; ginsabdong niya ang mga hari tungud sa ila, nga nagasiling, ‘Dili pagtanduga ang akon mga hinaplas, dili paghaliti ang akon mga manalagna!’”—Sal. 105:14, 15.

7. Sa ano nga mga paagi gin-amligan ni Jehova ang pungsod sang Israel?

⁷ Paagi sa iya espiritu, si Jehova nag-amlig sa dumaan nga pungsod sang Israel, sa diin magagikan ang ginsaad nga Binhi. Paagi sa iya espiritu, ginhatag ni Jehova sa Israel ang iya Kasuguan, nga amo ang nagtipig sa matuod nga pagsimba kag nag-amlig sa mga Judiyo gikan sa espirituwal, moral, kag pisikal nga halit. (Ex. 31:18; 2 Cor. 3:3) Sang panahon sang mga Hukom, ang espiritu ni Jehova nagpabaskog sa pila ka lalaki agod luwason ang Israel gikan sa ila mga kaaway. (Huk. 3:9, 10) Mga siniglo pa antes mabun-ag si Jesus, ang panguna nga bahin sang binhi ni Abraham, pat-od nga nadalahig ang balaan nga espiritu sa pag-amlig sa Jerusalem, sa Betlehem, kag sa templo. Ini nga mga duog may importante nga papel sa katumanan sang mga tagna tuhoy kay Jesus.

8. Ano ang nagapakita nga ang balaan nga espiritu may direkta nga papel sa kabuhi kag ministeryo sang Anak sang Dios?

⁸ Ang balaan nga espiritu may direkta nga papel sa kabuhi kag ministeryo ni Jesus. Nanghikot ang balaan nga espiritu sa taguangkan sang birhen nga si Maria kag nakahimo ini sang butang nga wala pa gid anay natabo. Ang isa ka di-himpit nga babayi nagpanamkon kag nagbun-ag sang isa ka himpit nga Anak nga wala maapektuhan sang silot nga kamatayon. (Luc. 1:26-31, 34, 35) Ang espiritu nag-amlig man kay Jesus agod indi sia mapatay sang lapsag pa sia. (Mat. 2:7, 8, 12, 13) Sang mga 30 anyos si Jesus, ginhaplasan sia sang Dios sang balaan nga espiritu. Gintangdo sia nga mangin manunubli sang trono ni David kag ginsugo nga magbantala. (Luc. 1:32, 33; 4:16-21) Paagi sa balaan nga espiritu nakahimo si Jesus sang mga milagro, subong sang pag-ayo sa mga nagamasakit, pagpakaon sa kadam-an, kag pagbanhaw sa mga patay. Ining gamhanan nga mga buhat nagapakita sang mga pagpakamaayo nga maagom naton kon si Jesus na ang magahari.

9, 10. (a) Paano nakita ang pagpanghikot sang balaan nga espiritu sa unang siglo nga mga disipulo ni Jesus? (b) Anong pagbag-o sa katumanan sang katuyuan ni Jehova ang ginpahayag sang unang siglo C.E.?

⁹ Sugod sang Pentecostes 33 C.E., gingamit ni Jehova ang iya espiritu sa paghaplas sa segundaryo nga bahin sang binhi ni Abraham, nga madamo sa ila indi niya kaliwat. (Roma 8:15-17; Gal. 3:29) Nakita man ang pagpanghikot sang balaan nga espiritu sa unang siglo nga mga disipulo ni Jesus. Nagbulig ini sa ila sa pagbantala sing makugi kag sa paghimo sang gamhanan nga mga buhat. (Binu. 1:8; 2:1-4; 1 Cor. 12:7-11) Ang pagbaton nila sang milagruso nga mga dulot sang espiritu nagapakita nga may daku nga pag-uswag sa katumanan sang katuyuan ni Jehova. Ang kahimusan sa pagsimba nga ginahimo sa templo sa Jerusalem sa sulod sang mga siglo wala na ginakahamut-an ni Jehova. Ang iya kahamuot yara na sa bag-o natukod nga Cristianong kongregasyon. Sugod sadto, ginagamit ni Jehova ang hinaplas nga kongregasyon sa pagtuman sang iya katuyuan.

¹⁰ Pag-amlig, pagpabaskog, paghaplas—amo ini ang pila ka paagi nga gingamit ni Jehova ang iya balaan nga espiritu sang panahon sang Biblia para sa katumanan sang iya katuyuan. Kamusta naman sa aton panahon? Paano ginagamit ni Jehova ang iya espiritu sa pagtuman sang iya katuyuan? Dapat naton ini mahibaluan bangod luyag naton manghikot suno sa espiritu. Gani, binagbinagon naton ang apat ka paagi sa diin ginagamit ni Jehova ang iya espiritu sa karon.

Ang Papel sang Balaan nga Espiritu sa Karon

11. Ano ang nagapakita nga ang balaan nga espiritu nagabulig para mangin matinlo ang katawhan sang Dios, kag paano mo mapakita nga nagapatuytoy ka sa espiritu?

¹¹ Una, ang balaan nga espiritu nagabulig nga mangin matinlo ang katawhan sang Dios. Ang katawhan nga may yara papel sa katuyuan ni Jehova dapat mangin matinlo sa moral. (Basaha ang 1 Corinto 6:9-11.) Ang pila nga nangin matuod nga mga Cristiano nagahimo anay sang imoral nga mga buhat subong sang pagpakighilawas, pagpanghilahi, kag homoseksuwalidad. Ining makasasala nga mga handum mahimo nanggamot na sa ila. (Sant. 1:14, 15) Apang, ina nga mga indibiduwal “ginhugasan na.” Ginapakita sini nga naghimo na sila sing kinahanglanon nga mga pagbag-o sa ila kabuhi agod kahamut-an sang Dios. Ano ang nagabulig sa isa nga nagahigugma sa Dios nga mabatuan sing madinalag-on ang sayop nga mga kailigbon? Amo ang “espiritu sang aton Dios,” siling sang 1 Corinto 6:11. Kon magpabilin ka nga matinlo sa moral, ginapakita mo nga nagapatuytoy ka sa sina nga espiritu.

12. (a) Suno sa palanan-awon ni Ezequiel, paano ginatuytuyan ni Jehova ang iya organisasyon? (b) Paano mo mapakita nga nagapanghikot ka nahisuno sa espiritu?

¹² Ikaduha, ginagamit ni Jehova ang iya espiritu sa pagtuytoy sa iya organisasyon sa direksion nga luyag niya. Sa palanan-awon ni Ezequiel, ang langitnon nga bahin sang organisasyon ni Jehova ginalaragway subong langitnon nga kangga nga indi mapunggan sa pagpanghikot agod tumanon ang katuyuan ni Jehova. Ano ang nagapahulag sa kangga nga magkadto sa isa ka partikular nga direksion? Ang balaan nga espiritu. (Ezeq. 1:20, 21) Dumdumon naton nga ang organisasyon ni Jehova may yara duha ka bahin, langitnon kag dutan-on. Kon ang langitnon nga bahin ginatuytuyan sang balaan nga espiritu, ginatuytuyan man sini ang dutan-on nga bahin. Kon matinumanon ka kag mainunungon sa panuytoy nga imo nabaton sa dutan-on nga bahin sang organisasyon sang Dios, ginapakita mo nga nagalakat ka sing dungan sa langitnon nga kangga ni Jehova kag nagapanghikot nahisuno sa iya balaan nga espiritu.—Heb. 13:17.

13, 14. (a) Sin-o ang “kaliwatan” nga ginpatuhuyan ni Jesus? (b) Maghatag sing halimbawa nga nagapakita nga ang balaan nga espiritu nagabulig sa aton nga mahangpan ang mga kamatuoran sa Biblia. (Tan-awa ang kahon nga “Nagadungan Ka Bala sa Nagasanag nga Kapawa?”)

¹³ Ikatlo, ang balaan nga espiritu nagabulig sa aton nga mahangpan ang mga kamatuoran sa Biblia. (Hulu. 4:18) Ini nga magasin madugay na nga ginagamit sang “matutom kag mainandamon nga ulipon” subong panguna nga paagi sa pagpahayag sang dugang nga kapawa. (Mat. 24:45) Halimbawa, binagbinaga ang aton paghangop sa “kaliwatan” nga ginsambit ni Jesus. (Basaha ang Mateo 24:32-34.) Ano nga kaliwatan ang ginapatuhuyan niya? Ang artikulo nga “Ano ang Kahulugan sang Presensia ni Cristo sa Imo?” nagpaathag nga ang ginpatuhuyan ni Jesus, indi ang mga malauton, kundi ang iya mga disipulo nga pagahaplasan sang balaan nga espiritu.a Ang hinaplas nga mga sumulunod ni Jesus, sang unang siglo kag sa karon, indi lamang makakita sang mga tanda kundi makahangop man sang kahulugan sini, nga si Jesus “malapit na . . . sa mga ganhaan.”

¹⁴ Ano ang kahulugan sini para sa aton? Bisan pa indi naton mahibaluan ang eksakto nga kalawigon sining “kaliwatan,” maayo nga dumdumon naton ang pila ka butang tuhoy sa tinaga nga “kaliwatan”: Sa masami nagapatuhoy ini sa mga tawo nga may nanuhaytuhay nga edad nga nag-abtanay ang kabuhi sa isa ka partikular nga hut-ong sang tion; ini nga hut-ong sang tion mahimo nga indi tuman kalawig; kag may yara ini katapusan. (Ex. 1:6) Nian, paano naton hangpon ang pinamulong ni Jesus tuhoy sa sining “kaliwatan”? Maathag nga ginapahangop niya nga ang mga hinaplas nga nakakita sang mga tanda nga natuman sang 1914, maabtan pa sang mga hinaplas nga makakita sang pag-umpisa sang dakung kapipit-an. Ina nga kaliwatan may ginsuguran, kag pat-od nga may katapusan. Ang katumanan sang nanuhaytuhay nga bahin sang tanda maathag nga nagapakita nga ang kapipit-an malapit na gid. Paagi sa pagbatyag sang pagkahilingagawon kag padayon nga pagbantay, mapakita mo nga nagadungan ka sa nagasanag nga kapawa kag nagasunod sa panuytoy sang balaan nga espiritu.—Mar. 13:37.

15. Ano ang nagapakita nga ang balaan nga espiritu amo ang nagapabaskog sa aton sa pagbantala sang maayong balita?

¹⁵ Ikap-at, ginapabaskog kita sang balaan nga espiritu sa pagbantala sang maayong balita. (Binu. 1:8) Mabantala ayhan ang maayong balita sa bug-os nga kalibutan kon wala ang bulig sang balaan nga espiritu? Hunahunaa ini. Mahimo isa ka anay sa mga sobra ka mahuluy-on ukon nagapangalag-ag sa pagbantala, nga naghunahuna, ‘Indi ko gid mahimo ang pagpamalaybalay!’ Apang, makugi ka na karon nga nagapakigbahin sa sina nga hilikuton.b Madamo sang matutom nga Saksi ni Jehova ang padayon nga nagabantala bisan pa ginapamatukan sila ukon ginahingabot. Ang balaan nga espiritu lamang sang Dios ang makapabaskog sa aton sa paglandas sa dalagku nga mga balagbag kag sa paghimo sang mga butang nga indi naton masarangan sa aton lamang kaugalingon nga kusog. (Miq. 3:8; Mat. 17:20) Paagi sa pagpakigbahin sing bug-os sa pagbantala nga hilikuton, mapakita mo nga nagakooperar ka sa sina nga espiritu.

Ang Papel sang Balaan nga Espiritu sa Palaabuton

16. Ngaa makasalig kita nga amligan ni Jehova ang iya katawhan sa tion sang dakung kapipit-an?

¹⁶ Sa palaabuton, gamiton ni Jehova ang iya balaan nga espiritu sa talalupangdon nga mga paagi agod matuman ang iya katuyuan. Una, binagbinaga kon paano sia nagaamlig. Subong sang natun-an na naton, gingamit ni Jehova ang iya espiritu sang una sa pag-amlig sa mga indibiduwal kag subong man sa bug-os nga pungsod sang Israel. Bangod sini, makasalig gid kita nga gamiton man niya ang iya gamhanan nga espiritu agod amligan ang iya katawhan sa nagahilapit na nga dakung kapipit-an. Indi na kita dapat magpalibog kon paano kita amligan ni Jehova sa sina nga tion. Kundi, nagahulat kita nga may pagsalig sa palaabuton bangod nahibaluan naton nga wala sing mga nagahigugma kay Jehova ang malipdan sa iya panan-aw ukon indi sarang malab-ot sang iya balaan nga espiritu.—2 Cron. 16:9; Sal. 139:7-12.

17. Paano gamiton ni Jehova ang iya balaan nga espiritu sa bag-ong kalibutan?

¹⁷ Paano gamiton ni Jehova ang iya balaan nga espiritu sa nagapakari nga bag-ong kalibutan? Ina nga espiritu amo ang puersa sa likod sang paghimo sang bag-o nga mga linukot nga pagabuksan sa sina nga tion. (Bug. 20:12) Ano ang kaundan sini? Maathag nga magaunod ini sang detalyado nga mga butang nga ipatuman ni Jehova sa aton sa sulod sang isa ka libo ka tuig. Ginakalangkagan mo bala ang pag-usisa sa kaundan sinang mga linukot? Nalangkag gid kita samtang ginapaabot naton inang bag-ong kalibutan. Indi naton sarang mahanduraw kon daw ano katahom ang kabuhi sa tion nga gamiton na ni Jehova ang iya balaan nga espiritu sa pagtuman sang iya katuyuan sa duta kag sa katawhan nga magapuyo sa sini.

18. Ano ang imo malig-on nga determinasyon?

¹⁸ Dumdumon naton pirme nga ang katuyuan ni Jehova nga amat-amat niya nga ginapahayag pat-od gid nga matuman. Ngaa? Bangod ginagamit niya ang iya balaan nga espiritu—ang pinakagamhanan nga puersa sa uniberso—sa pagtuman sini. Nadalahig ka sa sina nga katuyuan. Gani, dapat mangin determinado ka nga mangabay kay Jehova sang iya balaan nga espiritu kag manghikot nahisuno sa mga panuytoy sini. (Luc. 11:13) Sa paghimo sina, maagom mo ang kabuhi nga gintuyo ni Jehova para sa katawhan—ang kabuhi nga walay katapusan sa Paraiso nga duta.

[Mga Nota]

Madumduman Mo Bala?

• Sa ano nga mga paagi gingamit ni Jehova ang iya balaan nga espiritu sa panahon sang Biblia sa pagtuman sang iya katuyuan?

• Paano ginagamit ni Jehova ang iya espiritu sa karon?

• Paano gamiton ni Jehova ang iya espiritu sa palaabuton sa pagtuman sang iya katuyuan?

[Kahon sa pahina 10]

Nagadungan Ka Bala sa Nagasanag nga Kapawa?

Padayon nga ginapasanag ni Jehova ang kapawa sa iya katawhan. Ano ang pila sa bag-o nga paghangop nga ginbalhag sa Ang Lalantawan?

▪ Ano ang positibo nga leksion tuhoy sa espirituwal nga pagtubo ang matun-an naton sa ilustrasyon ni Jesus tuhoy sa lebadura? (Mat. 13:33)—Hulyo 15, 2008, pahina 19-20.

▪ San-o matapos ang pagtawag sa mga Cristiano para sa langitnon nga paglaum?—Mayo 1, 2007, pahina 30-31.

▪ Ano ang buot silingon sang pagsimba kay Jehova “sa espiritu”? (Juan 4:24)—Hulyo 15, 2002, pahina 15.

▪ Sa ano nga luwang nagaalagad ang dakung kadam-an? (Bug. 7:15)—Mayo 1, 2002, pahina 30-31.

▪ San-o mahanabo ang pagpainpain sa mga karnero kag mga kanding? (Mat. 25:31-33)—Oktubre 15, 1995, pahina 18-28.