Solusyon sa mga Reklamo

WALA nagasiling ang Biblia nga mahapos ang pag-asawahay. Paagi sa giya sang Dios, si Pablo nagsulat nga ang mga mag-asawa magaatubang sing “adlaw-adlaw nga palaligban.” (1 Corinto 7:28, Maayong Balita nga Biblia, MB) Pero may mahimo sila para mapahaganhagan ang mga problema kag para mangin malipayon pa gid sila. Binagbinaga ang anom ka reklamo nga pirme mabatian sa mga mag-asawa, kag kon paano makabulig ang mga prinsipio sang Biblia.

1

REKLAMO:

“Nagalayuay ang amon buot sa isa kag isa.”

PRINSIPIO SA BIBLIA:

‘Pat-ura ninyo ang mas importante nga mga butang.’—FILIPOS 1:10.

Ang inyo pag-asawahay amo ang isa sa pinakaimportante nga butang sa inyo kabuhi. Dapat ini unahon. Gani usisaa kon bala ang imo kasakuon amo ang rason sang problema. Indi pagtuguti nga maglayuay ang inyo buot bangod sang adlaw-adlaw nga ulubrahon. Siempre, may mga obra kamo kag may mga tion gid nga indi kamo updanay. Pero, may mga butang nga makontrol mo kag dapat mo kontrolon, pareho abi sang tion para sa kalingawan ukon pagpakig-upod sa mga abyan.

Pero ginadugangan sang iban nga asawa ukon bana ang ila obra ukon kalingawan para indi nila makaupod ang ila tiayon. Wala nila ginapalayo ang ila buot sa ila tiayon, kundi ginapalagyuhan nila ang mga problema. Kon amo sini ang nagakatabo sa inyo, dapat ninyo hibaluon kon ano gid ang problema kag solbaron ini. Kon may panahon kamo sa isa kag isa, magasuod pa gid kamo kag “mangin-isa [kamo] ka unud.”—Genesis 2:24.

Kon paano ini ginsunod sang iban: Ang taga-Australia nga sanday Andrewa kag Tanji, pulo ka tuig na nga mag-asawa. Si Andrew nagsiling: “Narealisar ko nga ang sobra kadamo nga obra kag paglingawlingaw makaguba sang pag-asawahay. Gani nagahatag gid kami sing tion para makaistoryahanay sing maayo.”

Sanday Dave kag Jane, nga taga-Estados Unidos, 22 ka tuig na nga mag-asawa. Kada gab-i, may 30 minutos sila nga ginagamit sa pagsugiray sang ila mga eksperiensia kag mga ginapensar. Si Jane nagsiling: “Importante gid ini nga tion kag wala namon ginatugutan nga maupangan ini.”

2

REKLAMO:

“Indi ko na makuha ang gusto ko sa sini nga relasyon.”

PRINSIPIO SA BIBLIA:

“Padayon nga pangitaon sang kada isa, indi ang iya kaugalingon nga kaayuhan, kundi ang iya sang iban nga tawo.”—1 CORINTO 10:24.

Ang tawo nga pirme lang nagapensar kon ano ang makuha niya sa pag-asawahay indi gid magmalipayon, bisan kapila pa sia mamana ukon mangasawa. Magamadinalag-on lamang ang pag-asawahay kon pensaron sang kada isa ang iya mahatag sangsa iya makuha. Ngaa? Si Jesus nagsiling: “May kapin nga kalipay sa paghatag sangsa pagbaton.”—Binuhatan 20:35.

Kon paano ini ginsunod sang iban: Sanday Maria kag Martin, nga taga-Mexico, 39 ka tuig na nga mag-asawa. Pero may mga problema man sila. Nadumduman nila ang isa ka bes nga nag-away sila. “Samtang nagabaisay kami,” siling ni Maria, “may nahambal ako nga nainsulto si Martin. Naakig gid sia. Sang ginsilingan ko sia nga dala lang ato sang akon kaakig, indi sia magpati.” Si Martin nagsiling, “Nagpensar ako sadto nga mas maayo pa nga magbulagay na lang kami.”

Gusto ni Martin nga respetuhon sia. Gusto man ni Maria nga intiendihon sia. Pero wala nila makuha ang ila gusto.

Paano nila ginsolbar ang ila problema? “Ginpatawhay ko anay ang akon pensar,” siling ni Martin, “kag ginkasugtan namon nga sundon ang laygay sang Biblia nga magpakita sing respeto kag kaayo. Sa sulod sang mga tinuig, natun-an namon nga bisan daw ano kadamo ang problema, masolbar namon ini kon mangamuyo kami sa Dios kag tumanon ang laygay sang Biblia.”—Isaias 48:17, 18; Efeso 4:31, 32.

3

REKLAMO:

“Wala ginahimo sang akon bana (ukon asawa) ang iya obligasyon.”

PRINSIPIO SA BIBLIA:

“Ang kada isa sa aton manabat sang iya kaugalingon sa Dios.”—ROMA 14:12.

Sigurado nga indi gid magmadinalag-on ang pag-asawahay kon isa lang ang nagahimo sang iya obligasyon. Pero mas malala ini kon duha na gid ang nagapabaya, kag nagabasulay pa.

Kon pirme mo ginapensar ang dapat himuon sang imo tiayon, indi ka gid magmalipayon. Ilabi na kon irason mo ang iya kakulangan para magpabaya man sa imo obligasyon. Pero kon tinguhaan mo nga mangin maayo nga bana ukon asawa, magamalipayon ang inyo pag-asawahay. (1 Pedro 3:1-3) Labaw sa tanan, ginapakita mo sa Dios nga ginasunod mo ang iya kahimusan sa pag-asawahay, kag magapahalipay ini sa iya.—1 Pedro 2:19.

Kon paano ini ginsunod sang iban: Sanday Kim kag ang iya bana, nga taga-Korea, 38 ka tuig na nga mag-asawa. Si Kim nagsiling: “May mga bes nga naugot sa akon ang akon bana kag wala niya ako ginabugno. Wala gani ako kabalo sang rason. Pamatyag ko indi na niya ako palangga. Kon kaisa nagapensar ako, ‘Ngaa abi intiendihon ko sia, kay wala niya gani ako ginaintiende?’”

Pero wala na lang gintan-aw ni Kim ang kakulangan sang iya bana. “Sa baylo nga mangakig,” siling ni Kim, “natun-an ko nga mas maayo kon ako ang una nga mangita sing paagi nga mag-ayuhay kami. Sa ulihi, maumpawan na kami kag makaistoryahanay sing maayo.”—Santiago 3:18.

4

REKLAMO:

“Wala nagapasakop ang akon asawa.”

PRINSIPIO SA BIBLIA:

“Ang ulo sang tagsa ka lalaki amo ang Cristo.”—1 CORINTO 11:3.

Kon pamatyag sang bana wala nagapasakop ang iya asawa, dapat niya anay usisaon kon bala handa sia nga magpasakop sa iya Ulo nga si Jesucristo. Mapakita ini sang bana kon ginailog niya si Jesus.

“Mga bana,” sulat ni apostol Pablo, “padayon nga higugmaa ang inyo asawa, subong nga si Cristo naghigugma man sang kongregasyon kag nagtugyan sang iya kaugalingon tungod sa sini.” (Efeso 5:25) Si Jesus wala “nagapakaginuo” sa iya mga disipulo. (Marcos 10:42-44) Ginatudluan niya sing maayo ang iya mga sumulunod kag ginatadlong sila kon kinahanglan. Pero indi gid sia mapintas. Mainayuhon sia kag naintiendihan niya ang ila mga limitasyon. (Mateo 11:29, 30; Marcos 6:30, 31; 14:37, 38) Pirme gid niya ginauna ang ila kaayuhan.—Mateo 20:25-28.

Dapat pamangkuton sang bana ang iya kaugalingon, ‘Ang akon bala pagtamod sa pagkaulo kag sa mga babayi nabase sa kustombre imbes nga sa laygay kag mga halimbawa sa Biblia?’ Halimbawa, ano ang imo pagtan-aw sa babayi nga indi ugyon sa mga ideya sang iya bana, pero matinahuron nga nagahambal sang iya opinyon? Sa Biblia, ang asawa ni Abraham nga si Sara maayo gid nga halimbawa sang mapinasakupon nga asawa. (1 Pedro 3:1, 6) Pero ginhambal niya ang iya opinyon kon kinahanglan, pareho sang tion nga wala mapensaran ni Abraham nga mabutang sa katalagman ang ila pamilya.—Genesis 16:5; 21:9-12.

Ginapakita sini nga indi dominante nga bana si Abraham kay wala nakulbaan si Sara nga makighambal sa iya. Pareho sa iya, ang bana nga nagasunod sa laygay sang Biblia wala nagapilit sa iya asawa nga tumanon ang tanan niya nga gusto. Kon ginapakita niya ang iya pagkaulo sa mainayuhon nga paagi, tahuron sia sang iya asawa.

Kon paano ini ginsunod sang iban: Si James nga taga-England, walo ka tuig na nga may asawa. Nagsiling sia: “Ginapamangkot ko anay ang akon asawa antes maghimo sing importante nga mga desisyon. Indi lang kaugalingon ko ang akon ginapensar, kundi ginauna ko ang iya mga kinahanglanon.”

Si George nga taga-Estados Unidos, 59 ka tuig na nga may asawa. Nagsiling sia: “Wala ko ginatratar ang akon asawa nga mas manubo sa akon, kundi bilang isa ka maalam kag maayo nga kaupod.”—Hulubaton 31:10.

5

REKLAMO:

“Pabaya ang akon bana.”

PRINSIPIO SA BIBLIA:

“Ang tagsa ka babayi nga maalam nagapatindug sang iya balay, apang ang buangbuang nagaguba sini sa iya kaugalingon nga kamut.”—HULUBATON 14:1.

Kon ang imo bana pabaya sa pagdesisyon kag wala nagapanguna sa pamilya, may tatlo ikaw ka puede himuon. (1) Pirme mo munuhon ang iya mga kakulangan ukon (2) ikaw na lang ang manguna sa inyo pamilya ukon (3) dayawon mo ang iya maayo nga hinimuan. Kon himuon mo ang una ukon ikaduha, ikaw ang makaguba sang inyo pamilya. Pero kon himuon mo ang ikatlo, magabakod ang inyo pag-asawahay.

Mas kinahanglan sang kalabanan nga lalaki ang pagrespeto sangsa gugma. Gani, kon ginarespeto mo ang imo bana, ipabatyag sa iya nga epektibo ang iya pagpanguna kag ginaapresyar mo sia. Paagi sa sini, mahimo nga mangin mas maayo sia nga bana. Siempre, may mga tion gid nga indi ka ugyon sa iya. Dapat ninyo ini istoryahan sing maayo. (Hulubaton 18:13) Pero, depende sa imo mga tinaga kag tono kon bala maguba ukon magabakod ang inyo pag-asawahay. (Hulubaton 21:9; 27:15) Kon ipakita mo ang pagrespeto, mahimo gid nga manguna ang imo bana kag mangin malipayon ka.

Kon paano ini ginsunod sang iban: Ang taga-Estados Unidos nga si Michele 30 ka tuig na nga may bana. Nagsiling sia: “Si Nanay lang ang nagpadaku sa amon nga mag-ulutod. Bangod wala sing bana nga nagasuporta, maisog sia kag wala nagasalig sa iban. Nailog ko man sia, gani nabudlayan ako magpasakop. Halimbawa, narealisar ko nga dapat ko anay pahibaluon ang akon bana antes ako magdesisyon.”

Si Rachel nga taga-Australia 21 ka tuig na nga kasal kay Mark. Daku man ang epekto sa iya sang iya gindak-an. “Si Nanay wala gid nagapasakop kay Tatay,” siling niya. “Pirme lang sila nagaaway. Sang bag-o pa lang ako makasal, gin-ilog ko man si Nanay. Pero, natun-an ko nga sundon ang laygay sang Biblia parte sa pagrespeto. Subong, mas malipayon kami ni Mark.”

6

REKLAMO:

“Indi na ako kaagwanta sang iya batasan.”

PRINSIPIO SA BIBLIA:

“Padayon nga batasa ninyo ang isa kag isa kag patawaron sing kinabubut-on ang isa kag isa kon may reklamo ang isa batok sa isa.”—COLOSAS 3:13.

Sang nobyahanay pa lang kamo, mahimo nga ang ginatan-aw mo lang sa imo nobyo ukon nobya amo ang maayo niya nga mga kinaiya. Gani wala mo makita ang iya mga kakulangan. Mahimo mo bala ini gihapon? Bisan pa madamo ka sing ginareklamo sa imo tiayon, pamangkuta ang imo kaugalingon, ‘Ano ang dapat ko tan-awon sa iya—ang maayo ukon ang malain?’

Naggamit si Jesus sing isa ka ilustrasyon para ipakita kon ngaa dapat naton pasensiahan ang kakulangan sang iban. “Ngaa ginatan-aw mo ang dagami sa mata sang imo utod, apang wala mo ginasapak ang balayanon sa imo mismo mata?” (Mateo 7:3) Ang dagami gamay lang, samtang daku nga kahoy ang ginahimo nga balayan sang balay. Ano ang iya buot silingon? “Kuhaa anay ang balayanon sa imo mata, agod makita mo sing maathag kon paano kuhaon ang dagami sa mata sang imo utod.”—Mateo 7:5.

Gin-umpisahan ni Jesus ini nga ilustrasyon paagi sa paandam. “Untati ninyo ang paghukom,” siling niya, “agod indi kamo paghukman; kay hukman kamo suno sa inyo paghukom.” (Mateo 7:1, 2) Kon gusto mo nga pasensiahon sang Dios ang imo mga kakulangan, ukon ang balayanon sa imo mata, dapat pasensiahon mo man ang mga kakulangan sang imo tiayon.—Mateo 6:14, 15.

Kon paano ini ginsunod sang iban: Sanday Jenny kag Simon nga taga-England siam ka tuig na nga mag-asawa. Si Jenny nagsiling: “Naugot gid ako pirme sa akon bana kay wala sia nagaplano nga daan. Mahulag lang sia kon lukpan na sia. Daw makahalam-ot kay sang nobyahanay pa lang kami, nanamian ako sa iya bisan amo sia sina. Pero narealisar ko nga may mga kakulangan man ako, kay gusto ko nga ako lang pirme ang masunod. Natun-an namon nga pasensiahan ang mga kakulangan sang isa kag isa.”

Si Curt nga bana ni Michele, nga ginsambit kaina, nagsiling: “Kon ang tan-awon mo lang amo ang makaulugot nga batasan sang imo tiayon, magadaku ini nga magadaku. Gani ang ginatan-aw ko kay Michele amo ang mga batasan niya nga nagpaluyag sa akon.”

Sekreto Para Magmadinalag-on

Ginapakita sini nga mga halimbawa nga normal lang ang mga problema sa pag-asawahay. Pero may mga solusyon ini. Ano ang sekreto? Higugmaa ang Dios kag sunda ang laygay sang iya Pulong, ang Biblia.

Natun-an ini sang taga-Nigeria nga sanday Alex kag Itohan, nga sobra 20 ka tuig na nga mag-asawa. Si Alex nagsiling: “Napamatud-an ko nga kon sundon sang mag-asawa ang mga prinsipio sa Biblia, masolbar sini ang halos tanan nila nga problema.” Ang iya asawa nagsiling: “Natun-an namon nga importante gid nga mangamuyo pirme sing magkaupod kag sundon ang laygay sang Biblia nga magpalanggaanay kag magpasensiahanay. Mas diutay ang amon problema subong sangsa bag-o kami kasal.”

Gusto mo bala matun-an pa kon paano mabuligan ang imo pamilya sang mga laygay sang Pulong sang Dios? Kon amo, pangabaya ang mga Saksi ni Jehova nga binagbinagon ninyo ang kapitulo 14 sang libro nga Ano Gid ang Ginatudlo Sang Biblia?b

[Mga Nota]

[Retrato sa pahina 4]

Ginahatagan bala namon sing tion ang isa kag isa?

[Retrato sa pahina 5]

Mas ginapensar ko bala ang akon mahatag sangsa akon makuha?

[Retrato sa pahina 6]

Ako bala ang una nga nagapangita sing paagi para masolbar ang problema?

[Retrato sa pahina 7]

Ginabinagbinag ko bala ang opinyon sang akon asawa antes magdesisyon?

[Retrato sa pahina 9]

Ginatan-aw ko bala ang maayo nga mga kinaiya sang akon tiayon?