Ang Biblia Nagapabag-o Sang Kabuhi

PAANO ginbag-o sang isa ka palapamuyayaw, palahubog, kag adik nga bartender ang iya kabuhi? Ngaa ang isa ka pulitiko nga indi interesado sa relihion nangin ministro? Ano nga mga kabudlayan ang gin-atubang sang isa ka combat instructor sa Rusya para mangin isa sa mga Saksi ni Jehova? Basaha ang ila mga eksperiensia.

“Ayuhay na kami ni Nanay.”—NATALIE HAM

NATAWO: 1965

PUNGSOD: AUSTRALIA

KABUHI SANG UNA: NAGADROGA

ANG AKON NAGLIGAD: Nagdaku ako sa Robe, isa ka gamay nga banwa sa Bagatnan nga Australia, nga pangisda ang palangitan-an. Sa amon lugar, sa hotel nagalingawlingaw ang mga tawo. Bangod pirme sila sa hotel, ang ila kabataan nagdaku upod sa mga palainom, palapamuyayaw, kag palasigarilyo.

Dose anyos pa lang ako, nagapanigarilyo na ako, bal-an ko na ang tanan nga pamuyayaw, kag pirme kami nagaaway ni Nanay. Sang 15 anyos ako nagbulagay ang akon mga ginikanan, kag pagligad sang 18 ka bulan, naghalin ako sa balay. Nagdroga ako, nangin palainom, kag imoral. Naugot ako kag indi ako kahibalo sang akon himuon. Lima ka tuig ako nga nag-eskwela sing martial arts kag self-defense, gani pamatyag ko masarangan ko proteksionan ang akon kaugalingon. Pero, kon nagaisahanon, ginasubuan ako kag nagapangamuyo sing bulig sa Dios. “Basta indi lang ako pagpasimbaha,” siling ko sa iya.

Sang ulihi, ginhatagan ako sing Biblia sang akon amigo nga diosnon pero wala sing relihion. Pareho sang iban namon nga abyan, nagadroga man sia. Pero nagapati gid sia sa Dios kag nakumbinse niya ako nga magpabawtismo. Gindala niya ako sa isa ka linaw sa amon lugar kag ginbawtismuhan. Sugod sadto, abi ko maayo na ang akon relasyon sa Dios. Pero wala ko pa gid mabasa ang Biblia.

KON PAANO GINBAG-O SANG BIBLIA ANG AKON KABUHI: Sang 1988, may duha ka Saksi nga nagkadto sa balay. Ang isa sa ila namangkot, “Bal-an mo kon sin-o ang ngalan sang Dios?” Ginbasa sang Saksi ang Salmo 83:18 sa iya Biblia, nga nagasiling: “Agod mahibaluan sang mga tawo nga ang imo ngalan amo si Jehova, ikaw lamang ang Labing Mataas sa bug-os nga duta.” Nakibot gid ako! Paghalin nila, nagmaneho ako sing 56 kilometros pakadto sa isa ka balaligyaan sang libro sang mga Cristiano. Gusto ko tan-awon ang iban nga translation sang Biblia kag tan-awon ang ngalan sa diksionaryo. Nakumbinse ako nga Jehova ang ngalan sang Dios, kag namensar ako kon ano pa ang wala ko mabal-an.

Siling ni Nanay, indi normal ang mga Saksi ni Jehova. Diutay lang ang nabal-an ko parte sa ila, kag abi ko tama sila ka konserbatibo kag mga kill joy. Nagplano ako nga manago kon magbalik sila. Pero nagbag-o ang akon pensar, ginpadayon ko sila, kag nagtuon kami dayon sing Biblia.

Ginasugid ko pirme sa akon nobyo, nga si Craig, ang akon natun-an. Isa ka bes tinak-an sia sa akon, gani gin-agaw niya sa akon ang libro kag ginbasa ini mismo. Pagligad sang tatlo ka semana, nagsiling sia nga amo na ini ang kamatuoran parte sa Dios. Gin-untatan namon ni Craig ang pagdroga kag pagpahubog, kag naghalin ako sa akon obra bilang bartender. Para masunod namon ang Biblia, nagpakasal man kami.

MGA BENEPISYO: Sang magsugod kami ni Craig sa pagtuon sing Biblia upod sa mga Saksi ni Jehova, daw mabulagay na kami. Subong, si Craig isa na ka maayo nga bana, kag may duha kami ka bata. May mga abyan man kami nga pareho sa amon ang pagpati.

Sang primero, naakig si Nanay sang nabal-an niya nga nagaupod ako sa mga Saksi ni Jehova. Pero lain lang ang iya pag-intiende sadto. Subong, ayuhay na kami ni Nanay. Wala na ako nagabatyag nga wala sing pulos. May direksion na ang akon kabuhi, kag matuod gid nga may maayo ako nga relasyon sa Dios.—Mateo 5:3.

“Madamo ako sing bag-o nga natun-an sa Biblia.”—ISAKALA PAENIU

NATAWO: 1939

PUNGSOD: TUVALU

KABUHI SANG UNA: PULITIKO

ANG AKON NAGLIGAD: Natawo ako sa Nukulaelae, nga isa ka matahom nga isla sa Pasipiko, nga bahin na subong sang Tuvalu. Sa mga isla, ang mga pastor nga nakaeskwela parte sa relihion sa kolehiyo sa Samoa amo gid ang ginasunod. Obligado ang mga tawo nga saguron ang mga pastor kag ang ila pamilya, hatagan sing ilistaran kag sang tanan nga pinakamaayo. Bisan pa ginakulang sa pagkaon ang mga tagaisla, obligado gihapon sila nga pakan-on ang mga pastor.

Ang pastor sa amon isla amo ang nagadumala sang eskwelahan kag nagatudlo sing relihion, math, kag geograpiya. Madumduman ko nga ginkastigo sang pastor ang mga estudyante asta nga nagpaligo na sila sang dugo. Pero wala gid sing may nagreklamo, bisan ang ila mga ginikanan. Ginapakadios nila ang pastor.

Sang dies anyos ako, naghalin ako sa balay para mag-eskwela sa eskwelahan sang gobierno sa lain nga isla. Paggradwar ko, nag-obra ako sa gobierno. Sadto, ang mga isla sakop pa sang kolonya sang Britanya nga ginatawag Gilbert and Ellice Islands. Nag-obra ako sa sarisari nga departamento asta nga nangin editor ako sang semanal nga pamantalaan sang gobierno. Katawhay lang sang tanan, pero isa ka bes ginbalhag ko ang sulat sang isa ka bumalasa nga nagabuyagyag sang kuarta nga gingasto para sa pagbisita sang Prince of Wales. Naggamit sing alyas ang nagsulat, kag ginpilit ako sang akon superyor nga isugid ang matuod nga ngalan. Wala ako nanugid, kag nagbantog ang amon komprontahanay.

Gani, naghalin ako sa akon obra kag nag-entra sa pulitika. Nagdaug ako sa Nukulaelae kag ginpadumala ako sa departamento sang komersio kag duna nga manggad. Sang ang mga isla sang Kiribati (Gilbert sadto) kag Tuvalu (Ellice sadto) nagatinguha nga magbulag sa Britanya, gintanyagan ako sang gobernador nga magdumala sa administrasyon sang Tuvalu. Pero, indi ko gusto nga mangin konektado sa kolonyalismo. Gani ginbalibaran ko ini kag nagpadalagan sa pinakamataas nga posisyon sa gobierno bisan wala ang ila suporta. Sang napierde ako, nagpauli kami nga mag-asawa sa amon isla kag nangin ordinaryo nga mga pumuluyo.

KON PAANO GINBAG-O SANG BIBLIA ANG AKON KABUHI: Sa mga isla, Adlaw nga Inugpahuway ang Domingo kag ginakabig ini sang tanan nga balaan magluwas sa akon. Amo ini ang akon adlaw sa paglayaglayag kag pagpangisda. Indi ko gusto nga makilala nga relihioso. Gani, bisan pa nagsiling si Tatay nga wala gid sila nalipay sa akon ginahimo, wala ako mag-entra sa relihion.

Ang kapital sang Tuvalu nahamtang sa isla sang Funafuti. Sang magkadto ako didto, ginhagad ako sang akon manghod nga magtambong sa pagtilipon sang mga Saksi ni Jehova. Sang ulihi, ginhatagan ako sang isa ka Saksi nga misyonero sang madamo nga Lalantawan kag Magmata! nga mga magasin. Ginhatagan man niya ako sing libro nga nagabuyagyag sang pagano nga ginhalinan sang mga panudlo sang mga relihion nga nagapangangkon nga Cristiano. Kapila ko ini ginbasa. Madamo ako sing bag-o nga natun-an sa Biblia, kag ang mga Cristiano gali indi obligado nga tumanon ang Adlaw nga Inugpahuway kada semana.a Ginsugid ko ini sa akon asawa, kag wala na sia nagsimba liwat.

Indi ko gihapon gusto nga mag-entra sa relihion. Pero, bisan duha na ka tuig ang nagligad, indi ko malipatan ang akon natun-an. Gani, ginsulatan ko ang misyonero sa Funafuti kag ginsilingan sia nga gusto ko na magbag-o. Nagsakay sia dayon sa masunod nga biyahe sang sakayan kag nagkadto sa akon para tun-an ako sa Biblia. Naakig gid si Tatay sang nabal-an niya nga gusto ko mangin Saksi ni Jehova. Pero ginsilingan ko sia nga madamo ako sing natun-an sa mga Saksi parte sa Biblia kag nakadesisyon na ako.

MGA BENEPISYO: Sang 1986, nabawtismuhan ako bilang isa sa mga Saksi ni Jehova, kag pagkadason tuig, ang akon naman asawa. Nagtuon man sa Biblia ang amon duha ka bata nga babayi kag nangin Saksi ni Jehova man sila.

Subong, nalipay gid ako kay bahin ako sang isa ka relihion nga wala sing mga klero kag lego pareho sang unang siglo nga mga Cristiano. (Mateo 23:8-12) Ginailog man nila ang halimbawa ni Jesus kag nagawali sing maayong balita parte sa Ginharian sang Dios. (Mateo 4:17) Nagapasalamat gid ako kay Jehova nga Dios kay gintudluan niya ako sing kamatuoran parte sa iya kag sa iya katawhan!

“Wala ako ginsilingan sang mga Saksi kon ano ang patihan ko.”—ALEXANDER SOSKOV

NATAWO: 1971

PUNGSOD: RUSYA

KABUHI SANG UNA: COMBAT INSTRUCTOR

ANG AKON NAGLIGAD: Natawo ako sa Moscow, nga kapital sadto sang Unyon Sobyet. Nagaistar ang amon pamilya sa isa ka daku nga apartment, kag kalabanan sa amon kaingod nagaobra sa isa lang ka pabrika. Nagareklamo sila nga tama sa akon ka agresibo, kag bata pa kuno ako mapatay ukon sa prisuhan ako matupa. Dies anyos pa lang ako, may rekord na ako sa mga pulis.

Sang 18 anyos ako, nag-entra ako sa army kag nangin border guard. Nagpauli ako pagligad sang duha ka tuig kag nag-obra sa pabrika, pero tinak-an ako. Gani nag-entra ako sa mga pulis sa Moscow nga nagadepensa kon may gamo kag nangin combat instructor. Nagabulig ako sa pagpangdakop sang mga kriminal kag nagkadto sa magamo nga mga lugar sa bilog nga pungsod. Bisan magpauli ako, pamatyag ko ara lang ako gihapon sa misyon. Gani, kon kaisa wala ako nagahulid sa akon asawa kay basi damanon ako kag masakit ko sia.

KON PAANO GINBAG-O SANG BIBLIA ANG AKON KABUHI: Sang magtuon ako sing Biblia upod sa mga Saksi ni Jehova, natun-an ko nga supak sa Biblia ang akon ginahimo. Dapat ko man untatan ang pagpanigarilyo kag haganhaganon ang pag-inom. Pero, nagrason ako nga indi ko mabayaan ang akon obra kay wala ako sing iban nga nabal-an para masagod ang akon pamilya. Isa pa, abi ko indi ko gid mahimo ang pagwali, pareho sa mga Saksi.

Pero, nakumbinse ako nga husto gid ang ginasiling sang Biblia. Napabakod ako sang ginasiling sang Ezequiel 18:21, 22: “Apang kon ang malauton magtalikod sa tanan niyang sala nga nahimo . . . , wala gid sang iya mga paglalis nga nahimo nga dumdumon batok sa iya.”

Nanamian ako kay wala ako ginsilingan sang mga Saksi kon ano ang patihan ko, kundi ginbuligan nila ako nga pamatud-an ang akon ginatun-an. Nagkuha ako sing sobra sa 40 ka magasin nila kag ginbasa ko ini sa sulod sang tatlo ka semana. Ang akon natun-an nagkumbinse sa akon nga nakita ko na ang matuod nga relihion.

MGA BENEPISYO: Antes ako nagtuon sing Biblia, daw mabulagay na kami nga mag-asawa. Subong, mas malipayon ang amon pamilya. Nagtuon man sa Biblia ang akon asawa kag nagdesisyon kami nga mag-alagad kay Jehova. Nakakita man ako sing obra nga indi supak sa prinsipio sang Biblia.

Sang una ko nga pagwali sa mga balay, grabe gid ang akon tension. Pamatyag ko daw makadto ako sa inaway. Pero natun-an ko na nga mangin kalmado, bisan pa may magpaakig sa akon. Amat-amat ko nga natun-an nga pasensiahan ang mga tawo. Bisan pa naghinulsol ako nga gin-usikan ko ang akon kabuhi sadto, may pulos na ini subong. Nalipay ako nga gamiton ang akon kusog sa pag-alagad kay Jehova nga Dios kag sa pagbulig sa iban.

[Nota]