Ginakahadlukan Ko ang Kamatayon Sadto, Ginalauman Ko ang Kabuhi Karon

Panugiron ni Piero Gatti

AMAT-AMAT nga nagapalapit ang kagahod. Ginsundan ini sang pag-uwang sang mga sirena nga nagapaandam sa mga tawo nga magpanago. Dayon nagsinigabong na ang makabulungol nga mga bomba nga nagresulta sa grabe nga kagulub-an.

Amo sini ang kahimtangan sa Milan, Italya sang 1943/1944. Subong pamatan-on nga soldado nga nadestino didto, pirme ako ginasugo nga tipunon ang bangkay sang mga tawo nga nagkalapintalan sa ila ginpanaguan. Tungod nagbululag na ang ila lawas, indi na sila makilal-an. Indi lang ang kamatayon sang iban ang akon nakita, kay bisan ako ara man pirme sa bibi sang kamatayon. Sa sini nga mga sitwasyon, nagapangamuyo ako sa Dios nga kon maluwas ako sa sining patag-awayan, himuon ko ang iya kabubut-on.

Pagkadula sang Akon Kahadlok sa Kamatayon

Nagdaku ako sa isa ka baryo nga mga napulo ka kilometro halin sa Como, Italya, malapit sa dulunan sang Switzerland. Bata pa ako, naeksperiensiahan ko na ang tuman nga kasubo kag kahadlok sa kamatayon. Napatay ang akon duha ka utod nga babayi sa trangkaso Espanyola. Sang 1930, sang anom ka tuig pa lang ako, napatay man ang akon iloy nga si Luigia. Bangod nagdaku ako nga Katoliko, nangin debotado ako kag nagatambong sa Misa kada semana. Nagligad pa ang tinuig antes nadula ang akon kahadlok sa kamatayon, indi sa bulig sang simbahan kundi sa isa ka barberya.

Sang 1944, madamo ang napatay sa Bug-os Kalibutan nga Inaway II. Isa ako sang linibo ka soldado sang Italya nga nagpalagyo pa Switzerland. Gindala kami sa mga kampo nga balakwitan. Ginbutang ako sa isa sini malapit sa Steinach, sa aminhan-sidlangan sang pungsod. Puede kami makalagawlagaw. Ang barbero sa Steinach nagapangita sing kabulig sa iya barberya. Gani nag-istar ako didto kag nag-obra sa iya. Isa lang ako ka bulan sa barberya pero may nakilala ako nga nagpabag-o sang akon kabuhi.

Isa sa mga kostumer sa barberya ang Italyano nga si Adolfo Tellini, nga sa Switzerland na nagaistar. Saksi ni Jehova sia. Wala gid ako sing ideya kon ano ini nga grupo, kag indi man katingalahan kay sadto mga 150 pa lang ang Saksi sa Italya. Ginsugiran niya ako nga may saad ang Biblia nga paghidait kag ‘bug-os nga kabuhi.’ (Juan 10:10; Bug. 21:3, 4) Nalipay gid ako nga magaabot ang tion nga madula na ang inaway kag kamatayon. Pagbalik ko sa amon balakwitan, ginsugid ko ini nga paglaum sa pamatan-on nga Italyano nga si Giuseppe Tubini, kag nanamian man sia. Kon kaisa, ginaduaw kami ni Adolfo kag sang iban pa nga Saksi sa kampo.

Gindala ako ni Adolfo sa Arbon, nga mga dies kilometros halin sa Steinach, diin nagamiting ang diutay nga grupo sang mga Saksi sa Italyano nga lenguahe. Nanamian gid ako sa akon nabatian, gani pagkadason nga semana ginlakat ko lang pakadto didto. Sang ulihi, nagtambong ako sa asembleya sang mga Saksi nga ginhiwat sa Zurich. Ginsubuan gid ako sang nakita ko sa slide show ang nagatinangkas nga mga bangkay sa mga kampo nga palatyan. Diri ko nahibaluan nga madamo gali nga Aleman nga Saksi ang ginpatay bangod sang ila pagtuo. Diri ko man nakilala si Maria Pizzato nga ginbilanggo sing 11 ka tuig sang Pasista nga gobierno sang Italya bangod sang iya hilikuton subong Saksi.

Pagkatapos sang inaway, nagbalik ako sa Italya kag nag-upod sa gamay nga kongregasyon sa Como. Wala ako matudluan sing maid-id sa Biblia, pero maathag sa akon ang panguna nga mga kamatuoran. Magkakongregasyon kami ni Maria Pizzato. Nagsiling sia nga kinahanglan ko magpabawtismo kag ginpakadto niya ako kay Marcello Martinelli, nga taga-Castione Andevenno, sa probinsia sang Sondrio. Si Marcello hinaplas nga utod nga nabilanggo man sing 11 ka tuig sa diktador nga gobierno. Nagbisikleta ako sing 80 kilometros para magkitaay kami.

Ginpaathag sa akon ni Marcello paagi sa Biblia ang mga kalipikasyon sang bawtismo. Dayon nangamuyo kami, nagkadto sa suba sang Adda, kag nagpabawtismo ako. Septiembre 1946 sadto kag espesyal gid ini nga adlaw sa akon! Sa kalipay ko nga maalagad ko na si Jehova kag may masaligan na ako nga paglaum, wala ko na matalupangdan nga 160 kilometros gali ang ginbisikleta ko sina nga adlaw!

Sang Mayo 1947, ang una nga asembleya sa Italya pagkatapos sang inaway ginhiwat sa Milan. Mga 700 ang nagtambong, lakip ang madamo nga nakalampuwas sa paghingabot sang mga Pasista. May pinasahi nga hitabo sa sini nga asembleya. Si Giuseppe Tubini nga ginpanaksihan ko sa balakwitan, amo ang nagpamulongpulong para sa bawtismo—dayon lakip man sia sa mga ginbawtismuhan!

Diri ko man nakilala si Utod Nathan Knorr, nga halin sa Brooklyn Bethel. Ginpalig-on niya kami ni Giuseppe nga gamiton ang amon kabuhi sa pag-alagad sa Dios. Gani, nagdesisyon ako nga sugdan ang bug-os tion nga pag-alagad pagkadason bulan. Pagpauli ko, ginsugid ko sa akon pamilya ang akon desisyon, kag ginpalas-ay nila ako. Pero determinado gid ako. Pagligad sang isa ka bulan, nangin Bethelite ako sa Milan. Apat ka misyonero ang nagaalagad didto: Si Giuseppe (Joseph) Romano kag ang iya asawa nga si Angelina; si Carlo Benanti kag ang iya asawa nga si Costanza. Ang ikalima kag bag-uhan nga Bethelite amo si Giuseppe Tubini, kag ako ang ikan-om.

Pagligad sang isa ka bulan sa Bethel, gintangdo ako nga mangin-C.O. Ako ang una nga Italyano nga manugtatap. Ang una nga misyonero sa Italya nga halin sa Estados Unidos sang 1946 nga si George Fredianelli amo ang manugtatap sa sirkito sadto. Ginhanas niya ako sing pila ka semana, kag nagkadto na ako sa akon asaynment. Indi ko gid malipatan ang una nga kongregasyon nga ginduaw ko—ang Faenza. Wala pa gid ako makapamulongpulong sa kongregasyon, kag amo ini ang una. Pero gintinguhaan ko nga mapalig-on ang mga tumalambong, lakip ang madamo nga pamatan-on nga magpayunir. Sang ulihi, ang iban sining mga pamatan-on nakabaton sing mabug-at nga mga responsibilidad sa pagbantala nga hilikuton sa Italya.

Makalilipay gid ang mangin-C.O. Ang akon kabuhi puno sing sorpresa, pagpasibu, kabudlayan, kalipay, kag pagpalangga sang mga kauturan.

Ang Kahimtangan sang Relihion sa Italya Pagkatapos sang Inaway

Sang una, mabaskog gid ang impluwensia sang Iglesia Katolika sa Italya. Sang 1948 may bag-o na nga konstitusyon, pero sang 1956 lang ginkuha ang pagdumili sang Pasista nga kasuguan sa pagbantala sang mga Saksi. Bangod sa pagsulsol sang klero, pirme ginagamo ang mga asembleya. Pero kon kaisa nagakapaslawan man sila, pareho sang natabo sang 1948 sa Sulmona, isa ka gamay nga banwa sa sentro sang Italya.

Ang asembleya ginhiwat sa teatro. Sang Domingo sang aga, ako ang tsirman kag si Giuseppe Romano ang namulongpulong. Mga 2,000 ang nagtambong bisan wala pa 500 ang manugbantala sa bug-os nga pungsod sadto. Sang nagahingapos na ang pamulongpulong, ginsugo sang duha ka pari nga nagtambong man, ang isa ka lalaki nga magsaka sa plataporma. Nagsinggitan sia para manggamo. Ginsilingan ko sia, “Kon may gusto ka ihambal, mag-arkila ka sing lugar, para makapagusto ka.” Naaburido ang mga tumalambong sa ginhimo niya amo nga nagginahod sila agod indi na sia mabatian. Gani, nagpanaug ang lalaki kag naglakat na lang.

Ang akon hilikuton sadto madamo sing hangkat. Kon kaisa nagalakat lang ako pakadto sa mga kongregasyon, nagabisikleta, nagasakay sa tren ukon sa gubaon kag nagaginutok nga mga bus. May mga tion nga nagatulog ako sa kuadra ukon bodega. Bag-o lang natapos ang inaway kag pigado gid ang kalabanan nga Italyano. Diutay lang ang mga kauturan kag mga pigado pa. Pero makalilipay gihapon ang pag-alagad kay Jehova.

Paghanas sa Gilead

Sang 1950, kami ni Giuseppe Tubini gin-agda nga mag-eskwela sa ika-16 nga klase sang Gilead. Halin sang primero, nabudlayan gid ako sang Ingles. Gintinguhaan ko nga magtuon, apang kabudlay gid. Dapat namon basahon ang bug-os nga Biblia sa Ingles. Kon kaisa, wala ako nagapanyaga agod magpraktis sa pagbasa sing matunog. Sang ulihi, turno ko na nga mamulongpulong. Madumduman ko pa ang komento sang amon instruktor, “Makita gid ang imo kapagsik kag kanami sa imo magkumpas, ugaling indi gid maintiendihan ang imo Ingles!” Wala sapayan sini, natapos ko ang kurso. Kami ni Giuseppe ginpabalik sa Italya. Bangod sining dugang nga paghanas, labi kami nga nangin kalipikado sa pagbulig sa mga kauturan.

Sang 1955, ginpakaslan ko si Lidia. Pito ka tuig antes kami ginkasal, ako pa ang namulongpulong sang ginbawtismuhan sia. Ang iya amay nga si Domenico mabuot gid. Gintudluan niya ang iya pito ka bata kag sila tanan nagbaton sang kamatuoran. Ginhimo niya ini bisan pa ginahingabot sia sang Pasista nga gobierno kag ginsentensiahan nga itapok sing tatlo ka tuig. Matutom man sa kamatuoran si Lidia. Tatlo ka kaso ang naatubang niya antes ginkilala ang aton kinamatarong sa pagbantala. Pagligad sang anom ka tuig, natawo ang amon subang, nga si Beniamino kag sang 1972, ang amon ikaduha nga si Marco. Nalipay gid ako nga sila kag ang ila mga pamilya matutom nga nagaalagad kay Jehova.

Aktibo Gihapon sa Pag-alagad kay Jehova

Makalilipay gid ang mag-alagad sa iban, kag madamo ako sing indi malipatan nga mga eksperiensia. Halimbawa, sang mga dekada 1980, ang akon ugangan nagsulat sa presidente sang Italya nga si Sandro Pertini. Sang tion sang diktador nga Pasista, gintapok sila nga duha sa isla sang Ventonene, nga ginabutangan sang mga ginakabig nga kaaway sang gobierno. Nangabay si Ugangan nga makigkita sa presidente sa tuyo nga makapanaksi. Sang ginpasugtan sia, nag-upod ako. Wala namon ginpaabot nga abiabihon kami sing maayo. Ginhakos si Ugangan sang presidente. Dayon nag-istoryahanay kami parte sa aton mga ginapatihan kag ginhatagan namon sia sing literatura.

Nalibot ko na ang mga kongregasyon sa Italya. Sang 1991, pagkatapos sang 44 ka tuig, nag-untat ako subong nagalakbay nga manugtatap. Sa sulod sang apat ka tuig, nangin manugtatap ako sang Assembly Hall, pero sang ulihi kinahanglan ko ini bayaan bangod sang malubha nga balatian. Maayo na lang sa kaluoy ni Jehova, nakapabilin ako sa bug-os tion nga pag-alagad. Ginatinguhaan ko gid nga makabantala, kag bisan subong may mga Bible study ako. May mga kauturan nga nagasiling nga “mapagsik” gihapon ako magpamulongpulong. Nagapasalamat gid ako kay Jehova nga mabaskog gihapon ako bisan tigulang na.

Sang pamatan-on ako, nahadlok gid ako sa kamatayon, apang ang sibu nga ihibalo sa Biblia naghatag sa akon sing masaligan nga paglaum nga kabuhi nga dayon—‘bug-os nga kabuhi’ suno kay Jesus. (Juan 10:10) Ginalauman ko gid ang kabuhi nga mahidaiton, may kalig-on, malipayon, kag may bugana nga pagpakamaayo ni Jehova. Kabay nga ang tanan nga kadungganan magkadto sa aton mahigugmaon nga Manunuga, nga ang iya ngalan ginadala naton.—Sal. 83:18.

[Mapa sa pahina 22, 23]

(Para sa aktual nga pormat, tan-awa ang publikasyon)

SWITZERLAND

BERN

Zurich

Arbon

Steinach

ITALYA

ROMA

Como

Milan

Suba Adda

Castione Andevenno

Faenza

Sulmona

Ventotene

[Retrato sa pahina 22]

Manugpakadto kami sa Gilead

[Retrato sa pahina 22]

Upod kay Giuseppe sa Gilead

[Retrato sa pahina 23]

Sang ginkasal kami

[Retrato sa pahina 23]

Ang akon pinalangga nga asawa 55 anyos na nga nagaunong sa akon