Dapat Bala Magtuon ang Kabataan Parte sa Dios?

“Bangod sa relihion, nagadinumtanay kita sa baylo nga maghigugmaanay.”—JONATHAN SWIFT, ENGLISH AUTHOR.

MAHIMO madamo ang magaugyon sa sining ginsiling ni Swift sang ika-18 nga siglo. Nagapati ang iban nga indi dapat pagtudluan sang mga ginikanan ang ila kabataan parte sa Dios. Para sa ila, indi maayo ang epekto kon ang mga bata ginpadaku sa isa ka relihioso nga panimalay.

Ano sa banta mo? Diin sa mga masunod ang husto?

● Indi dapat pagtudluan sang mga ginikanan ang ila kabataan parte sa Dios.

● Dapat tudluan sang mga ginikanan ang ila kabataan parte sa relihion kon daku na sila.

● Dapat itudlo sang mga ginikanan ang ila ginapatihan parte sa Dios samtang bata pa ang ila kabataan. Pero samtang nagadaku sila, dapat sila buligan sang mga ginikanan nga mapaathag ang ila ginapatihan.

● Dapat sundon sang kabataan ang pagtuluuhan sang ila mga ginikanan nga wala na ginausisa kon bala husto ini.

Makahalit Bala sa Kabataan ang Relihion?

Indi gusto sang mahigugmaon nga ginikanan nga mahalitan ang iya bata. Ginapakita bala sang mga pagtuon nga may malain nga epekto sa bata ang pagtudlo parte sa Dios? Madugay na nga ginatun-an sing maayo sang mga researcher kon ano ang epekto sang pagtuluuhan sang ginikanan sa ila kabataan. Ano ang ila nadiskobrehan?

Nadiskobrehan sang mga researcher nga ang relihion may maayo nga epekto sa pagdaku sang bata kag indi ini makahalit. Sang 2008, ang balasahon nga Social Science Researcha nagsiling: “Ang relihion nagapabakod sa relasyon sang bata sa iya iloy kag amay.” Nagsiling pa ini: “Ang relihion kag espirituwalidad importante sa kabuhi sang kabataan kag sa ila kaangtanan sa ila pamilya.” Nagaugyon ini sa ginsiling ni Jesucristo: “Malipayon ang mga mahunahunaon sang ila espirituwal nga kinahanglanon.”—Mateo 5:3.

Kamusta naman ang pagtamod nga dapat tudluan ang kabataan parte sa Dios kag sa relihion kon daku na sila? Wala ini nagaugyon sa kamatuoran nga ang hunahuna sang bata pareho sa isa ka balde nga wala sing unod nga dapat sudlan. Gani, dapat magdesisyon ang mga ginikanan kon bala pun-on nila ang hunahuna sang ila kabataan sing husto nga moral kag pagtuluuhan ukon pabay-an na lang sila nga makatuon sa iban.

Ano ang Sekreto?

Ginapamatud-an sang kasaysayan nga ang relihion mahimo tunaan sang diskriminasyon kag dumot. Gani, paano malikawan sang mga ginikanan nga matabo ang ginsiling ni Jonathan Swift? Paano nila tudluan ang ila kabataan sang pagtuluuhan nga makabulig sa ila nga higugmaon ang iban?

Ang sekreto makita sa sabat sa sining tatlo ka pamangkot: (1) Ano ang dapat matun-an sang kabataan? (2) Sin-o ang dapat magtudlo sa ila? (3) Ano nga pamaagi sa pagtudlo ang pinakaepektibo?

[Nota]