4 Ang Dios Indi Makatarunganon—Matuod Bala Ini?

Ang mahimo nabatian mo: “Kontrolado sang Dios ang kalibutan, kag pagbuot niya ang tanan nga nagakatabo. Sia ang balasulon sang diskriminasyon, inhustisya, kag pagpamigos.”

Ang ginatudlo sang Biblia: Indi ang Dios ang ginhalinan sang inhustisya sa kalibutan. Parte kay Jehova, ang Biblia nagasiling: “Ang iya binuhatan himpit; kay ang tanan niyang dalanon katarungan.”—Deuteronomio 32:4.

Ang Dios maalwan sa tanan, pati na sa mga indi bagay pakitaan sing kaayo. Halimbawa, “ginapabutlak niya ang iya adlaw sa mga tawo nga malaut kag sa mga maayo kag nagapaulan sa mga tawo nga matarong kag di-matarong.” (Mateo 5:45) Alalangay ang pagtamod niya sa tanan nga tawo ano man ang ila rasa kag kultura. Ang Binuhatan 10:34, 35 nagasiling: “Ang Dios wala sing ginapasulabi, apang sa tagsa ka pungsod ang tawo nga nagakahadlok sa iya kag nagahimo sang pagkamatarong kalahamut-an sa iya.”

Gani, diin naghalin ang inhustisya? Sa baylo nga sundon ang Dios, ginpili sang madamo nga tawo nga maghimo sing malain. (Deuteronomio 32:5) Ginapakita man sang Biblia nga ginatugutan sang Dios nga maggahom sa kalibutan ang iya kaaway, ang Yawa.a (1 Juan 5:19) Pero malapit na lang tapuson sang Dios ining indi makatarunganon nga paggahom. Nahanda na niya ang iya gamiton sa “paglaglag sa mga binuhatan sang Yawa.”—1 Juan 3:8.

Kon paano makabulig sa imo ang paghibalo sang kamatuoran: Mahimo nabalaka ka sa mga balita parte sa korapsion, pagpamigos, kag inhustisya. Ang paghibalo sa ginhalinan sini nga mga problema makabulig sa imo nga maintiendihan kon ngaa malain gid ang kahimtangan sang kalibutan kag kon ngaa nagakapaslawan ang mga panikasog sang tawo sa pagsolbar sini. (Salmo 146:3) Sa baylo nga panikasugan ang temporaryo nga pagbag-o, mahimo mo matigayon ang mabakod nga paglaum kon magsalig ka sa mga promisa sang Dios.—Bugna 21:3, 4.

Mas maintiendihan naton ang matuod nga ginhalinan sang inhustisya kon kita mismo ang biktima sini. Mahimo makasiling kita pareho sa alagad sang Dios nga si Habacuc: “Wala na ginatuman ang kasuguan kag wala na sing hustisya.” (Habacuc 1:4, NW) Wala ginsilutan sang Dios si Habacuc sang ginsiling niya ini. Sa baylo, ginpasalig sang Dios ang Iya alagad nga may ginpat-od Sia nga tion sa pagtadlong sini. Ginbuligan Niya si Habacuc nga magkalipay sa pihak sang mga kabudlayan. (Habacuc 2:2-4; 3:17, 18) Mapahamtang man ang imo pensar kon magsalig ka sa promisa sang Dios nga dulaon ang inhustisya sa sini nga kalibutan.

[Nota]

[Blurb sa pahina 7]

Ang Dios gid bala ang balasulon sa pag-antos kag inhustisya?

[Picture Credit Line sa pahina 7]

© Sven Torfinn/Panos Pictures