Pulo ka Pamangkot Parte sa Sex Ginsabat

1 Ang pag-sex bala amo ang orihinal nga sala nanday Adan kag Eva sa hardin sang Eden?

▪ Sabat: Madamo ang nagapati nga ang gindumilian nga bunga sa hardin sang Eden nagarepresentar sa pag-sex. Pero, indi amo sini ang ginatudlo sang Biblia.

Binagbinaga: Antes pa gintuga sang Dios si Eva, ginsugo niya si Adan nga indi magkaon sang bunga sang “kahoy sang pagkilala sang maayo kag malaut.” (Genesis 2:15-18) Nagaisahanon pa lang sadto si Adan, gani ini nga pagdumili wala nagapatuhoy sa pag-sex. Isa pa, ginsugo sang Dios sanday Adan kag Eva nga ‘magpamata sing madamo, agod ang ila mga kaliwat maglapta sa bug-os nga duta.’ (Genesis 1:28, Maayong Balita nga Biblia, MB) Suguon ayhan sang mahigugmaon nga Dios ang una nga mag-asawa nga ‘maglapta sa duta’—nga nagakinahanglan sing seksuwal nga relasyon—kag dayon silutan sila sing kamatayon sa pagtuman sini?—1 Juan 4:8.

Dugang pa, isahanon lang si Eva sang “nagkuha sia sang [gindumilian nga] bunga kag nagkaon; kag [“pagkatapos,” NW] ginhatagan man niya ang iya bana kaupud niya, kag nagkaon sia.”—Genesis 3:6.

Wala man ginpakamalaut sang Dios sanday Adan kag Eva sang nag-sex sila kag nagpanganak. (Genesis 4:1, 2) Maathag nga ang bunga nga ginkaon nanday Adan kag Eva wala nagarepresentar sa pag-sex kundi isa ini ka literal nga bunga sang kahoy.

2 Ginadumilian bala sang Biblia ang pag-sex?

▪ Sabat: Suno sa una nga tulun-an sang Biblia, gintuga sang Dios ang mga tawo nga “lalaki kag babayi.” Nagsiling ang Dios nga ang iya mga tinuga “tama gid kaayo.” (Genesis 1:27, 31) Sang ulihi, ginpasulat sang Dios sa isa ka manunulat sang Biblia ini nga sugo para sa mga bana: “Magkalipay sa asawa sang imo pagkapamatan-on . . . Ang iya mga dughan magbusug sa imo sa tanan nga tion.” (Hulubaton 5:18, 19) Ginapakita bala sini nga ginadumilian sang Biblia ang pag-sex?

Ginapakita man sini nga luwas sa pagpanganak, gintuga sang Dios ang mga kinatawo para mapabatyag sang mag-asawa ang ila pagpalangga sa isa kag isa nga nagaresulta sa kalipay. Mahatag sini ang pisikal kag emosyonal nga kinahanglanon sang mag-asawa nga nagahigugmaanay.

3 Ginatugutan bala sang Biblia ang pag-live-in?

▪ Sabat: Maathag nga ginasiling sang Biblia nga “hukman sang Dios ang mga makihilawason.” (Hebreo 13:4) Ang por·neiʹa, nga Griego nga tinaga para sa pagpakighilawas, nagapatuhoy sa sala nga paggamit sang mga kinatawo sang mga wala makasal.a Gani sa pagtamod sang Dios, sala nga mag-live-in ang lalaki kag babayi bisan pa nagaplano na sila nga magpakasal.

Bisan pa nagahigugmaanay ang lalaki kag babayi, ginapatuman gihapon sang Dios nga magpakasal sila antes mag-sex. Gintuga kita sang Dios nga may ikasarang sa paghigugma. Gugma ang panguna nga kinaiya sang Dios. Gani, may rason sia sa pagsugo nga ang sex para lamang sa mag-asawa, nga ipaathag sang masunod nga artikulo.

4 Ginatugutan bala ang pagpangasawa sing madamo?

▪ Sabat: Gintugutan sadto sang Dios ang pagpangasawa sing madamo. (Genesis 4:19; 16:1-4; 29:18–30:24) Pero indi amo sini ang iya orihinal nga katuyuan. Isa lang ka asawa ang ginhatag niya kay Adan.

Ginpatuman liwat sang Dios paagi kay Jesucristo ang Iya orihinal nga sugo nga magpangasawa sing isa lang. (Juan 8:28) Sang ginpamangkot si Jesus parte sa pag-asawahay, nagsiling sia: “Sia nga nagtuga sa ila sa ginsuguran naghimo sa ila nga lalaki kag babayi kag nagsiling, ‘Bangod sini bayaan sang lalaki ang iya amay kag ang iya iloy kag magahiusa sa iya asawa, kag ang duha mangin isa ka unod.’”—Mateo 19:4, 5.

Sang ulihi, ang isa sa mga disipulo ni Jesus gingiyahan sang Dios sa pagsulat: “Ang tagsa ka lalaki magtigayon sang kaugalingon nga asawa kag ang tagsa ka babayi magtigayon sang kaugalingon nga bana.” (1 Corinto 7:2) Ang Biblia nagasiling man nga ang may asawa nga lalaki nga may pinasahi nga responsibilidad sa Cristianong kongregasyon dapat mangin “bana sang isa ka asawa.”—1 Timoteo 3:2, 12.

5 Sala bala nga maggamit ang mga mag-asawa sang mga contraceptive?

▪ Sabat: Wala ginsugo ni Jesus ang iya mga sumulunod nga dapat sila magpanganak, kag wala man ini ginsugo sang iya mga disipulo sang una. Wala ginsambit ukon ginpakamalaut sang Biblia ang birth control.

Gani, makadesisyon ang mga mag-asawa kon bala mabata sila ukon indi. Depende man sa ila kon pila ka bata ang gusto nila kag kon san-o nila gusto magbata. Kon maggamit ang mag-asawa sang contraceptive nga indi makapahulog sang bata, ila ina personal nga desisyon kag salabton.b Indi sila dapat paghukman.—Roma 14:4, 10-13.

6 Sala bala nga ipahulog ang bata?

▪ Sabat: Ang kabuhi sagrado sa Dios, kag para sa iya, ang ginabusong nga lapsag isa na ka buhi nga tinuga. (Salmo 139:16) Nagsiling ang Dios nga manabat ang isa ka tawo kon mahalitan niya ang wala pa matawo nga lapsag. Gani para sa Dios, ang pagpatay sini isa ka krimen.—Exodo 20:13; 21:22, 23.

Pero, ano abi kon may emerhensia sa tion sang pagbata kag kinahanglan magdesisyon ang mag-asawa kon sin-o ang salbaron—ang iloy ukon ang bata? Sa sini nga sitwasyon, ang mag-asawa dapat ang magdesisyon.c

7 Ginatugutan bala sang Biblia ang pagbulagay?

▪ Sabat: Huo. Pero nagsiling si Jesus nga may isa lamang ka makatarunganon nga rason sa pagbulagay: “Ang bisan sin-o nga magdiborsio sa iya asawa, luwas lamang kon nakighilawas ang iya asawa [pag-sex sa indi tiayon], kag magpangasawa sang iban nagapanghilahi.”—Mateo 19:9.

Ginadumtan sang Dios ang pagluib. Hukman niya ang mga nagabulag sa ila tiayon nga wala sing mabakod nga rason, ilabi na kon himuon nila ini bangod may naluyagan sila nga iban.—Malaquias 2:13-16; Marcos 10:9.

8 Ginatugutan bala sang Dios ang homoseksuwalidad?

▪ Sabat: Maathag nga ginapakamalaut sang Biblia ang pagpakighilawas, nga nagalakip sang homoseksuwalidad. (Roma 1:26, 27; Galacia 5:19-21) Ginapakita sang Biblia nga wala nahamuot ang Dios sa sini nga pagkabuhi, pero nahibaluan man naton nga “ginhigugma gid sang Dios ang kalibutan amo nga ginhatag niya ang iya bugtong nga Anak, agod ang tagsatagsa nga nagatuo sa iya indi malaglag kundi makatigayon sang kabuhi nga walay katapusan.”—Juan 3:16.

Bisan pa wala ginakunsinti sang matuod nga mga Cristiano ang homoseksuwalidad, mainayuhon sila sa tanan nga tawo. (Mateo 7:12) Gusto sang Dios nga ‘padunggan naton ang tanan nga sahi sang tawo.’ Gani, wala ginainsulto sang matuod nga mga Cristiano ang mga homoseksuwal.—1 Pedro 2:17.

9 Malain bala ang phone sex, “sexting,” ukon cybersex?

▪ Sabat: Ang phone sex amo ang malaw-ay nga pag-istoryahanay parte sa sex ukon pagpamati sang binastos nga mga mensahe sa telepono. Ang “sexting” naman amo ang pagpadala sing binastos nga mga piktyur ukon mensahe paagi sa cell phone. Ang cybersex amo ang binastos nga pag-istoryahanay sa Internet.

Ini nga mga buhat wala ginbinagbinag sing espesipiko sa Biblia. Pero nagasiling ini: “Ang pagpakighilawas kag ang tanan nga sahi sang kahigkuan ukon kakagod indi gid paghinambitan sa tunga ninyo, subong nga nagakaigo sa mga tawo nga balaan; ukon ang makahuluya nga paggawi ukon ang binuang nga hambal ukon ang malaw-ay nga linahog, mga butang nga indi nagakaigo.” (Efeso 5:3, 4) Ginapatiko sang phone sex, “sexting,” kag cybersex ang pagtamod sang mga tawo parte sa sex kag ginaganyat sila nga makigrelasyon sa indi nila tiayon. Sa baylo nga buligan ang mga tawo nga kontrolon ang ila seksuwal nga balatyagon, ginaganyat sila sini nga paayawan ang ila kailigbon.

10 Ano ang pagtamod sang Biblia sa masturbasyon?

▪ Sabat: Wala ginasambit sang Biblia ang masturbasyon, ukon ang hungod nga paghimas sang kinatawo para malab-ot ang seksuwal nga kalipay. Pero, ginasugo sang Biblia ang mga Cristiano: “Patya ninyo ang mga bahin sang inyo lawas nga yara sa duta may kaangtanan sa pagpakighilawas, kahigkuan, [kag indi nagakaigo nga] kailigbon sa sekso.”—Colosas 3:5.

Ginapatiko sang masturbasyon ang pagtamod sang isa ka tawo sa sex kag nangin maiyaiyahon sia. Ginapasalig kita sang Biblia nga hatagan sang Dios sing “gahom nga labaw sa kinaandan” ang mga sinsero nga nagatinguha nga untatan ini nga buhat.—2 Corinto 4:7; Filipos 4:13.

[Mga Nota]