Nagmatutom Sia kay Jehova

MAY nagsiling na bala sa imo nga magmatutom ka?—a Ang mga ginikanan kag maestra mahimo magsiling sa mga kabataan nga magmatutom sa ila pagtuon. Buot silingon, kabigon nila ini nga importante. Istoryahan naton ang isa ka tawo nga ginsiling sang Biblia nga nangin matutom sa matuod nga Dios nga si Jehova. Sia amo si Ezequias. Hibaluon naton kon ano ang aton matun-an sa iya.

Masubo ang inagihan ni Ezequias sang bata pa sia. Ang iya amay nga si Ahaz, nga hari sang Juda, nag-untat sa pagsimba kay Jehova. Sang bata pa si Ezequias, ginpangunahan ni Ahaz ang pagsimba sa butig nga mga dios. Ginpapatay pa gani ni Ahaz ang isa niya ka bata—ang utod ni Ezequias—kag ginhalad ini sa iya dios.

Bisan pa nagpadayon si Ahaz sa paghimo sing malain, nagtuman si Ezequias kay Jehova. Sa banta mo, ginbudlayan bala sia sa paghimo sini?— Huo. Pero wala sia nag-untat! Hibaluon naton kon paano sia nagmatutom kay Jehova kag kon paano naton sia mailog.

Nakatuon si Ezequias sa iban nga nagmatutom kay Jehova. Isa sa ila amo si David. Si David nagkabuhi ginatos ka tuig antes sang panahon ni Ezequias, pero nakatuon si Ezequias parte sa iya paagi sa Kasulatan. “Kon magbiya sa akon ang akon amay kag akon iloy,” sulat ni David, “ang GINOO magasapopo sa akon.”

Nahibaluan mo bala kon ano ang nagbulig kay David nga tumanon si Jehova?— Ang iya pagtuo! Nahibaluan ni David nga kon matinumanon sia, buligan sia ni Jehova. Ang pagtuon parte kay David nakabulig kay Ezequias nga mangin matutom kag matinumanon kay Jehova. Makasalig ka man nga buligan ka ni Jehova kon magpabilin ka nga matutom kag matinumanon sa iya.

Pero paano kon ang imo amay ukon iloy wala nagasimba kay Jehova?— Ang Dios nagsiling nga dapat mo tumanon ang imo mga ginikanan. Pero kon ginasugo ka nila nga himuon ang ginadumilian sang Dios, puede mo ipaathag sa ila kon ngaa indi mo ini paghimuon. Indi ka dapat magbutig, mangawat, ukon maghimo sang iban pa nga butang nga ginasiling sang Dios nga malain, bisan sin-o pa ang magsugo sini sa imo. Dapat mo tumanon ang Dios!

May iban pa nga maayo nga halimbawa nga puede naton mailog. Luwas kay David, nakatuon man si Ezequias sa iya lolo nga si Jotam. Bisan pa napatay si Jotam antes natawo si Ezequias, nakatuon gihapon si Ezequias parte sa iya, nga mahimo man naton kon nagatuon kita sa Biblia. Sin-o pa ang kilala mo nga puede naton mailog?—

Matuod, ginsambit sang Biblia ang mga sala nanday Ezequias, David, Jotam kag iban pa nga indi perpekto nga tawo. Pero ginhigugma nila si Jehova, ginbaton ang ila sala, kag gintinguhaan nga himuon ang husto. Dumduma nga si Jesus lamang, nga Anak sang Dios, ang perpekto. Magtuon kita sing maayo parte sa iya kag ilugon naton sia.