Ngaa Ginapatuman sang Dios nga ang Iya mga Sumilimba Magminyo Lamang sa Ila Masigkatumuluo?

▪ Ang Kasuguan sang Dios sa pungsod sang Israel nagalakip sini nga sugo may kaangtanan sa pungsod sa palibot nila: “Dili ka magpangasawa sa ila, dili ka maghatag sang imo anak nga babayi sa iya anak nga lalaki, kag dili ka magkuha sang iya anak nga babayi nga sa imo anak nga lalaki.” (Deuteronomio 7:3, 4) Ano ang rason sa sini nga pagdumili?

Una sa tanan, nahibaluan ni Jehova nga luyag ni Satanas nga dagtaan ang Iya katawhan paagi sa pagpaliso sa ila sa pagsimba sa butig nga mga dios. Gani nagpaandam ang Dios nga “patalikdon [sang mga di-tumuluo] ang imo anak gikan sa pagsonod sa akon, agud nga mag-alagad sila sa iban nga mga dios.” Daku ang nadalahig sa sini. Kon ang pungsod sang Israel magsimba sa iban nga dios, madula nila ang kahamuot kag pangamlig sang Dios, sa amo mahapos lang sila malutos sang mga kaaway. Kon matabo ina, paano maggikan sa pungsod sang Israel ang ginpromisa nga Mesias? Maathag nga may rason gid si Satanas nga sulayon ang mga Israelinhon sa pagminyo sa mga di-tumuluo.

Isa pa, dumduma nga nagaulikid ang Dios sa iya katawhan subong indibiduwal. Nakahibalo sia nga ang kalipay kag kaayuhan sang kada isa nagadepende sa ila suod nga kaangtanan sa iya bilang ila Dios. Makatarunganon bala ang pag-ulikid ni Jehova parte sa malain nga impluwensia sang di-tumuluo nga tiayon? Binagbinaga ang halimbawa ni Hari Solomon. Nahibaluan niya ang paandam ni Jehova parte sa di-tumuluo nga mga asawa: “Patalangon nila ang inyo tagiposoon sa pagsonod sa ila mga dios.” Bangod maalam gid sia, mahimo nga nagbatyag sia nga indi na niya kinahanglan ang laygay sang Dios. Ginsikway niya ini. Ano ang resulta? “Ang iya mga asawa nagpatalang sang iya tagiposoon sa pagsonod sa iban nga mga dios.” Makapasubo gid ini! Nadula mismo ni Solomon ang kahamuot ni Jehova, kag ang iya katawhan natunga bangod sang iya pagkadimatutom.—1 Hari 11:2-4, 9-13.

Ang pila mahimo mangatarungan nga indi gid man tanan amo sina. Halimbawa, ang Israelinhon nga si Malon nangasawa sa Moabita nga si Rut, nga nangin huwaran nga tumuluo. Pero ang pagpangasawa sa mga Moabita isa ka makatalagam nga desisyon. Wala gindayaw si Malon sang nangasawa sia sang isa ka Moabita; lamharon pa sia napatay, mahimo antes pa ginkilala ni Rut si Jehova bilang iya Dios. Ang utod ni Malon nga si Kilion nangasawa sa Moabita nga si Orpa, nga nagpabilin nga sumilimba sa “iya dios.” Sa pihak nga bahin, sang ginpangasawa ni Boaz si Rut, madugay na sia nga nangin tumuluo. Ang matuod, ginkabig sia sang mga Judiyo sang ulihi bilang “perpekto nga proselita.” Ang pag-asawahay nanday Rut kag Boaz isa ka pagpakamaayo para sa ila.—Rut 1:4, 5, 15-17; 4:13-17.

Gani, nagakaigo bala nga magsiling nga base sa halimbawa sang pag-asawahay nanday Malon kag Rut, puede man naton supakon ang laygay ni Jehova nga magminyo lamang sa masigkatumuluo? Kon amo sina, indi bala nga daw pareho lang ina sa pagsiling nga puede himuon nga palangabuhian ang pagpanahor kay may isa ka tahor nga nagdaug sing jackpot?

Ang Biblia nagapalig-on sa mga Cristiano subong nga magminyo “lamang sa Ginuo.” Nagapaandam ini nga indi “magpagota sing sampihakan upod sa mga di-tumuluo.” Ini nga laygay para gid sa matuod nga mga Cristiano nga nagapangita subong sang tiayon. Para naman sa mga nagminyo sang di-tumuluo, ang Biblia nagalaygay kon ano ang maayo nga himuon. (1 Corinto 7:12-16, 39; 2 Corinto 6:14) Ini nga mga laygay nagapakita nga gusto ni Jehova nga Dios, ang Tagtukod sang pag-asawahay, nga mangin malipayon kita bilang iya mga sumilimba—minyo man ukon indi.