Ngaa Mangin Interesado sa mga Milagro?

“Ang mga milagro, suno sa kahulugan sini, nagasumpakil sa mga prinsipio sang siensia.”—RICHARD DAWKINS, ANAY PROPESOR SA PUBLIC UNDERSTANDING OF SCIENCE.

“Makatarunganon gid ang pagpati sa mga milagro. Wala ini nagasumpakil sa relihioso nga pagpati, kundi mga tanda ini sang gugma kag padayon nga pagsakdag sang Dios sa mga tinuga.”—ROBERT A. LARMER, PROPESOR SANG PILOSOPIYA.

“NAGAPATI ka bala sa mga milagro?” Pareho sa ginapakita sa ibabaw, lainlain ang mga opinyon. Pero ano ang imo sabat sa sina nga pamangkot?

Mahimo magpangalag-ag ka sa pagsabat, “Huo, nagapati ako.” Mahimo magbatyag ka nga kon magpati ka sa sini, daw pareho lang nga nagapati ka sa disparatis ukon wala ka sing tinun-an. Amo man sina ang ginabatyag sang madamo.

Sa pihak nga bahin, mahimo makumbinsi ka nga nagakatabo gid man ang mga milagro. Mahimo nagapati ka sa mga milagro sa Biblia, pareho sang pagtunga ni Moises sang Pula nga Dagat. Mahimo nagapati ka man nga may mga milagro subong. Ang matuod, ginapakita sang isa ka report sining karon lang nga ‘kalabanan nga pumuluyo sa Nakatundan—mga 75 porsiento sa Estados Unidos kag 38 porsiento sa Britanya—ang nagapati gihapon sa mga milagro.’ (The Cambridge Companion to Miracles, gin-edit ni Graham H. Twelftree) Dugang pa, indi lamang mga Cristiano ang nagapati sa mga milagro. Suno sa Britannica Encyclopedia of World Religions, “halos tanan nga relihion” nagapati sa mga milagro.

Ukon mahimo isa ka sa magasiling: “Ambot, indi ako interesado! Wala sing milagro sa akon kabuhi!” Pero ngaa dapat ka mangin interesado sa mga milagro?

Binagbinaga ini: Imadyina nga may balatian ka nga indi mabulong. Kon nabasahan mo sa isa ka respetado nga balasahon sa medisina ang parte sa bag-o nga bulong nga mahimo makapaayo sa imo, indi bala nagakabagay lang nga usisaon mo kon matuod ini? Sing kaanggid, ang Biblia nagapromisa nga sa indi madugay, matabo ang pila ka makatilingala nga milagro. Makaapektar ini sa kabuhi sang tanan nga tawo sa duta. Indi bala nagakabagay lang nga usisaon mo kon masaligan ini nga promisa?

Pero antes naton usisaon kon ano ining ginpromisa nga mga milagro, sabton naton anay ang tatlo ka kinaandan nga pagpamatok sa mga milagro.

[Kahon sa pahina 3]

ANO ANG MILAGRO?

Isa ini ka hitabo nga labaw sa mahimo sang tawo kag kinaugali, kag sa masami ang ginhalinan amo ang labaw sa kinaugali nga gahom.