Pamangkot 3: Ngaa Ginapaantos Ako sang Dios?

PALAHUBOG ang amay ni Ian. Bisan pa wala ginakulang si Ian sang iya materyal nga kinahanglanon, kulang sia sa pagpalangga sang iya amay. “Palahubog si Tatay kag pirme niya ginasakit si Nanay. Wala gid ako nakabatyag sang iya pagpalangga,” siling ni Ian. Samtang nagahamtong sia, nagapalibog sia kon bala nagaluntad gid man ang Dios. “‘Kon may Dios gid man,’ pamangkot ko, ‘ngaa ginatugutan niya nga mag-antos ang mga tawo?’”

Ngaa natural lang nga ipamangkot ina?

Bisan pa daw wala ka sang problema, mahimo magbatyag ka sing inhustisya kon makita mo nga nagaantos ang mga inosente. Pero kon ikaw mismo ang makaeksperiensia sang kabudlayan, pareho kay Ian, ukon ang imo pinalangga magmasakit ukon mapatay, natural lang nga mamangkot ka kon ngaa nagaantos kita.

Ano ang sabat sang iban?

Ang iban nagapati nga ginapaantos kita sang Dios para tudluan kita nga mangin mapainubuson kag maluluy-on. Ang iban nagapati nga nagaantos kita subong bangod sang mga sala nga nahimo naton sang una naton nga kabuhi.

Ano ang ginapahangop sang ila sabat?

Wala nagaulikid ang Dios sa pag-antos sang mga tawo amo nga mabudlay sia higugmaon. Mapintas ang Dios.

Ano ang ginatudlo sang Biblia?

Maathag nga ginasiling sang Biblia nga ang Dios indi balasulon sa pag-antos sang tawo. “Kon ang isa ka tawo ginasulay, indi sia magsiling, ‘Ini nga pagsulay nagahalin sa Dios.’ Kay ang Dios indi masulay sa paghimo sing malain, kag wala sia nagasulay sa kay bisan sin-o.” (Santiago 1:13, Maayong Balita nga Biblia) Ang matuod, ang ideya nga ang Dios ang balasulon sa pag-antos nagakontradik sa ginasiling sang Biblia parte sa personalidad sang Dios. Ngaa?

Isa sa panguna nga kinaiya sang Dios amo ang gugma. (1 Juan 4:8) Para ipadaku ina nga punto, ginpaanggid sang Biblia ang Dios sa isa ka mapinalanggaon nga iloy. “Magakalipat bala ang babayi sa iya bata nga nagasoso, nga indi sia magkalooy sa anak sang iya tiyan?” pamangkot sang Dios. “Bisan ini sila malipat, apang ako indi malipat sa imo.” (Isaias 49:15) Hungod ayhan nga sakiton sang mahigugmaon nga iloy ang iya bata? Indi gid. Sa baylo, ginapahaganhagan sang mapinalanggaon nga ginikanan ang pag-antos sang iya bata. Amo man ang Dios, wala niya ginapaantos ang mga inosente.—Genesis 18:25.

Bisan pa nagaulikid ang Dios, nagaantos gihapon ang mga inosente. Mahimo mamangkot ka, ‘Kon nagaulikid ang Dios sa aton kag sia ang labing gamhanan, ngaa wala niya gindula ang mga kabangdanan sang pag-antos?’

May maayo nga mga rason ang Dios kon ngaa ginatugutan niya ang pag-antos. Binagbinaga ang isa ka rason: Masami nga mga tawo man ang nagapaantos sa iban. Madamo nga malain nga tawo nga nagapamigos sa iban ang indi gusto magbag-o. Gani para madula sang Dios ang panguna nga kabangdanan sang pag-antos, dapat niya laglagon ina nga mga tawo.

Ginpaathag ni apostol Pedro kon ngaa wala pa ginlaglag sang Dios ang mga nagahimo sing malain: “Si Jehova indi mahinay may kaangtanan sa iya saad, subong sang paghangop sang iban nga mga tawo sa kahinayon, kundi mapailubon sia sa inyo bangod indi niya luyag nga ang bisan sin-o malaglag kundi luyag niya nga ang tanan makadangat sa paghinulsol.” (2 Pedro 3:9) Mapinasensiahon si Jehova nga Dios bangod mahigugmaon sia kag maluluy-on.

Pero sa indi madugay, may himuon si Jehova nga Dios. “Balusan [niya] sing kapipit-an ang mga nagahatag sang kapipit-an” sa mga inosente. Batunon sang mga nagapaantos ang “silot nga wala katapusan nga kalaglagan.”—2 Tesalonica 1:6-9.

Nasapwan ni Ian nga ginsambit sa umpisa, ang mga sabat sa iya pamangkot parte sa pag-antos. Ang iya natun-an nagpabag-o sang iya pagtamod sa kabuhi. Basaha ang iya sugilanon sa masunod nga artikulo nga natig-uluhan “Ang Biblia Nagapabag-o sang Kabuhi”.