Lima ka Dekada nga Bug-os Tion nga Pag-alagad Malapit sa Arctic Circle

NATAWO kami sa isa ka kaumhan sa Northern Ostrobothnia, Finland, kag napulo kami ka mag-utod. Ang amon kabuhi sang bata pa kami apektado gid sang Bug-os Kalibutan nga Inaway II. Bisan pa malayo katama ang inaway sa amon ginaistaran, nahibaluan namon nga nag-antos gid ang mga tawo. Isa ka gab-i, sang ginbombahan ang malapit nga siudad sang Oulu kag Kalajoki, nakita namon nga nagpula ang kalangitan. Ginsilingan kami sang amon mga ginikanan nga magpanago kon makita namon ang nagalinupad nga mga eroplano. Gani sang ginsugiran kami sang amon kamagulangan nga lalaki, nga si Tau­no, parte sa paraiso nga duta nga wala na sing inhustisya, natandog gid kami.

Natun-an ni Tauno ang mga kamatuoran sa Biblia sang 14 anyos sia paagi sa literatura sang mga Estudyante sang Biblia. Sang nagsugod ang Bug-os Kalibutan nga Inaway II, nagpangindi sia nga magsoldado bangod sa iya nahanas sa Biblia nga konsiensia, amo nga ginpriso sia. Mapintas ang pagtratar sa iya sa prisuhan. Nagpalig-on pa gid ini sa iya pamat-od nga alagaron si Jehova, kag sang ginhilway sia nangin makugi pa gid sia sa ministeryo. Ang maayo nga halimbawa sang amon magulang nagpalig-on sa amon nga magtambong sa mga miting sang mga Saksi sa pihak nga baryo. Nagtambong man kami sa mga kombension, bisan pa kinahanglan kami magbakas para makasupot sang amon inugplete. Nagpanahi kami sang mga bayo para sa amon mga kaingod, nagtanom sing bombay, kag nang-ipo sing mga berry. Bangod ­madamo sing trabaho sa amon uma, masami nga indi kami makaupdanay sa pagtambong sa kombension.

Ang mga kamatuoran nga amon natun-an parte kay Jehova kag sa iya mga katuyuan nagpadalom sang amon gugma sa iya, kag nagdesisyon kami nga idedikar ang amon kabuhi sa iya. Sang 1947, ginsimbuluhan namon ang amon dedikasyon paagi sa pagpabawtismo. (Si Annikki sa edad nga 15 kag si Aili sa edad nga 17.) Ang amon magulang nga si Sai­mi ginbawtismuhan sina man nga tuig. Gintun-an man namon sa Biblia ang may bana na namon nga magulang nga si Linnea. Sia kag ang iya pamilya nangin mga Saksi ni Jehova man. Pagkatapos sang bawtismo, nagdesisyon kami nga mangin vacation (ukon, auxiliary) pioneer sa pulupanag-on.

PAGSULOD SA BUG-OS TION NGA MINISTERYO

Sang 1955, nagsaylo kami sa Kemi, isa ka malayo nga siudad sa aminhan. Bisan pa nagatrabaho kami sing full-time, gusto namon gihapon magpayunir pero nahadlok kami kay basi indi namon masuportahan ang amon kaugalingon. Naghunahuna kami nga magsupotsupot anay. Amo ini ang tion nga naistorya namon ang sister nga payunir, nga ginsambit sa umpisa. Nakabulig gid ato sa amon nga mahangpan nga ang pag-alagad kay Jehova sing bug-os tion wala lamang nagadepende sa amon ikasarang sa pinansial ukon sa suporta sang amon pamilya. Ang pinakaimportante amo ang pagsalig sa aton Amay sa langit.

Sina nga tion, bastante na ang amon sinuptan para suportahan ang amon kaugalingon sa duha ka bulan. Gani sang Mayo 1957, nagpayunir kami sing duha ka bulan sa Pello, nga isa ka banwa sa Lapland, sa ibabaw sang Arctic Circle. Ginakulbaan kami, pero pagligad sang duha ka bulan, wala gihapon mabuhinan ang amon sinuptan, gani nag-aplay kami liwat sing duha pa ka bulan. Duha ka bulan sang ulihi, ara gihapon ang tanan namon nga kuarta. Gani napat-od na namon nga atipanon kami ni Jehova. Pagkatapos sang 50 ka tuig nga pagpayunir, ara pa gihapon ang amon sinuptan! Nabatyagan namon nga daw ginauyatan ni Jehova ang amon kamot kag nagasiling: “Dili magkahadluk, magatabang ako sa [inyo].”​—Isa. 41:⁠13.

Sang 1958, ginrekomendar sang amon manugtatap sang sirkito nga magsaylo kami subong mga espesyal payunir sa Sodankylä, Lapland. Sina nga tion, may isa lamang ka Saksi, isa ka sister, sa sina nga lugar. Makawiwili ang iya pagkasapo sang kamatuoran. Ang iya bata nga lalaki may field trip sa Helsinki, nga kapital sang Finland. Samtang nagalakat ang grupo sa siudad, ginhatagan sang may edad na nga sister sang isa ka isyu sang Ang Lalantawan ang bata nga lalaki, nga ara sa ulihi sang linya, kag ginhambalan nga ihatag ini sa iya iloy. Gintuman ini sang bata, kag narealisar dayon sang iya iloy ang kamatuoran.

Nag-arkila kami sing kuarto nga nahamtang sa ibabaw sang isa ka sirahian. Nagahiwat kami didto sing mga miting. Sang primero, kami lang nga duha upod sa sister kag sa iya anak nga babayi ang nagatambong. Ginabasa lang namon ang mga programa sa tagsa ka semana. Sang ulihi, ang isa ka lalaki nga ginatun-an sa Biblia sang mga Saksi nagtrabaho sa sirahian. Sia kag ang iya pamilya nag-upod sa amon grupo. Sang ulihi, nabawtismuhan sila nga duha sang iya asawa. Gindumalahan sini nga utod ang amon mga miting. Luwas sini, ang iban pa nga lalaki nga nagatrabaho sa sirahian nagtambong man sa mga miting kag nagbaton sang kamatuoran. Pagligad sang duha ka tuig, nagdaku na gid ang amon grupo kag nangin kongregasyon.

MGA KABUDLAYAN

Ang malayo nga paglakbay nangin hangkat sa amon pagbantala. Kon tig-ilinit, nagalakat kami, nagabisikleta, kag nagabaruto pa gani para malab-ot ang mga tawo sa amon teritoryo. Daku gid ang nabulig sang amon bisikleta. Ginagamit man namon ini sa pagtambong sa mga kombension kag pagduaw sa amon mga ginikanan, nga mga kinilometro ang kalayuon. Kon tigtulugnaw, nagasakay kami sa bus sa kaagahon pakadto sa isa ka baryo kag dayon nagapamalaybalay. Pagkatapos namon mabantalaan ang isa baryo, nagalakat kami pakadto sa masunod nga baryo. Kadamol gid sang niebe, gani kon kaisa indi namon makita ang mga dalan. Masami namon ginasundan ang banas sang mga karosa nga ginaguyod sang kabayo. Pero kon kaisa, ginatabunan ini sang mga niebe. Kon mag-umpisa ang tigpamulak, nagahumok ang niebe, amo nga ginabudlayan kami maglakat.

Bangod sa niebe kag grabe nga katugnaw, nakatuon kami magpadamol sang amon ginasuksok. Nagasuksok kami sing de-lana nga mga stocking, duha ukon tatlo ka pares nga medyas, kag high-top nga mga botas. Pero sa gihapon, ang amon mga botas masami nga puno sing niebe. Pagsaka namon sa balay, ginauba namon ang amon botas kag ginataktak ang niebe. Subong man, ang sidsid sang amon malaba nga coat nagakabasa kon mag-agi kami sa niebe. Kon magtugnaw na gid, ang sidsid nagatig-a nga daw metal. Ang isa ka tagbalay nagsiling, “Matuod gid ang inyo pagtuo, kay naglakat gid kamo bisan amo sini ang tiempo.” Naglakat kami sing sobra 11 kilometros pakadto sa sina nga balay.

Bangod sa kalayuon, masami nga nagatulog kami sa balay sang mga tawo. Kon daw gab-i na, nagapamangkot na kami sang amon matulugan. Simple lang ang mga balay, pero ang mga tawo mainabyanon kag maabiabihon, kag ginatanyagan nila kami indi lang sing matulugan kundi sing makaon man. Masami nga panit sang usa, moose, ukon uso ang amon ginatulugan. May tion man nga maluho kami. Halimbawa, ang isa ka babayi sa isa ka daku nga balay nagdala sa amon sa guest room sa ibabaw diin may matahom nga katre kag mahamot nga puti nga hapin. Madamo nga beses nga nagahinun-anon kami sa Biblia upod sa tagbalay asta sa tungang gab-i. Sa isa ka lugar, ang mag-asawa nga nagaistar sa isa ka balay nagtulog sa isa ka bahin sang kuarto, kag kami naman sa pihak. Naghambalanay kami parte sa Biblia halin sa gab-i asta sa kaagahon. Nagabulosbulos lang ang mag-asawa sa pagpamangkot.

MAKAPALADYA NGA MINISTERYO

Ang Lapland kigas pero matahom nga lugar, kag nagabag-obag-o ang katahom sini depende sa panag-on. Pero para sa amon, mas matahom pa sa sini ang mga tawo nga nagaapresyar kay Jehova. Nalakip sa sinsero nga mga tawo nga amon napanaksihan amo ang mga manugtroso nga nagkadto sa Lapland para mamulod sing kahoy. Kon kaisa, madamo sing lalaki sa isa ka payag kon magsulod kami. Ining mabukod nga mga lalaki namati sa mensahe sang Biblia kag malipayon nga nagkuha sang mga literatura.

Madamo kami sing makalilipay nga eksperiensia. Isa ka adlaw, ang relo sa estasyon sang bus abanse sing lima ka minuto, gani nabayaan kami sang bus. Nagdesisyon na lang kami nga magsakay sa isa pa ka bus pakadto sa lain nga baryo. Wala pa gid namon mabantalaan yadto nga lugar. Sa una nga balay, nakilala namon ang isa ka pamatan-on nga babayi nga nagsiling, “Siling ko gid nga maabot kamo.” Ginatun-an namon sa Biblia ang iya magulang nga babayi, kag ginpangabay niya ini nga silingon kami nga magbisita sa iya sina mismo nga adlaw. Pero wala kami napahibalo parte sini. Nasugdan namon ang pagtuon sa iya kag sa iya mga paryente sa kaingod nga mga balay. Wala madugay pagkatapos sini, gintingob namon ini sa isa na lang ka pagtuon nga ginatambungan sang mga 12 ka tawo. Sugod sadto, madamo sa sini nga pamilya ang nangin Saksi ni Jehova.

Sang 1965, gin-asayn kami sa amon karon kongregasyon sa Kuusamo, nga ara lang sa ubos sang Arc­tic Circle. Sina nga tion, diutay lamang ang manugbantala sa sini nga kongregasyon. Sang primero, daw mabudlay ang amon bag-⁠o nga teritoryo. Relihioso katama ang mga tawo kag wala nanamian sa amon hilikuton. Pero madamo ang nagarespeto sa Biblia, kag sa sini nga butang kami makasugod sing paghambalanay. Gani, amat-amat namon nga ginkilala ang mga tawo, kag mga duha ka tuig sang ulihi, mahapos na magsugod sing mga pagtuon sa Biblia.

AKTIBO GIHAPON SA MINISTERYO

Sa karon, indi na kami makapadugay sa pag-alagad sa latagon, pero halos kada adlaw gihapon kami nagapakigbahin sa ministeryo. Nangin mahapos ang pagbantala sa amon malapad nga teritoryo sang napalig-on si Aili sang amon hinablos nga magpraktis sa pagmaneho kag magkuha sing lisensia sang 1987 sa edad nga 56. Nakabulig pa gid sa amon sang may gintukod nga bag-o nga Kingdom Hall, kag nagsaylo kami sa apartment nga palayas sini.

Nalipay gid kami sa pag-uswag nga amon nakita. Sang nagsugod kami sa bug-os tion nga pag-alagad sa naaminhan sang Finland, diutay pa lang ang manugbantala sa sining malapad nga lugar. Sa karon, may pila na ka kongregasyon sa isa ka sirkito. Sa tion sang mga asembleya kag kombension, masami nga may magpakilala sa amon kag mamangkot kon madumduman pa namon sia. Sa pila ka kahimtangan, nakadumala kami sing pagtuon sa Biblia sa ila puluy-an sang gamay pa sia. Ang binhi nga nasab-og sang nagligad nga mga tinuig ukon dekada pa gani nagbunga!​—1 Cor. 3:⁠6.

Sang 2008, nalab-ot namon ang 50 ka tuig nga pag-alagad subong espesyal payunir. Nagapasalamat kami kay Jehova nga nakapalig-unay kami sa isa kag isa para makapadayon sa iya hamili nga buluhaton. Simple lang ang amon kabuhi, pero wala kami ginakulang. (Sal. 23:⁠1) Indi gid husto ang amon pagpangalag-ag sang primero! Sa sulod sang nagligad nga mga tuig, ginpalig-on kami ni Jehova suno sa iya saad sa Isaias 41:10: “Palig-onon ko ikaw, buligan ko ikaw, alay-ayon ko ikaw sang too nga kamut sang akon pagkamatarung.”