SABAT SA MGA PAMANGKOT SA BIBLIA

Mapatawad bala ang aton mga sala?

Suno sa Biblia, makasasala ang tanan nga tawo. Napanubli naton ini sa una nga tawo nga si Adan. Gani nagahimo kita kon kaisa sang malain kag mahimo hinulsulan naton ini sa ulihi. Ang Anak sang Dios, si Jesucristo, napatay para bayaran ang aton mga sala. Paagi sa iya halad gawad mapatawad kita. Regalo ini halin sa Dios.—Basaha ang Roma 3:23, 24.

Ang pila nakahimo sing mabug-at nga mga sala kag nagapalibog kon bala mapatawad sila sang Dios. Makalilipay nga ang Pulong sang Dios nagasiling: “Ang dugo ni Jesus nga iya Anak nagatinlo sa aton gikan sa tanan nga sala.” (1 Juan 1:7) Handa si Jehova magpatawad bisan sang mabug-at nga mga sala kon matuod kita nga nagahinulsol.—Basaha ang Isaias 1:18.

Ano ang dapat naton himuon para mapatawad?

Kon gusto naton nga patawaron kita ni Jehova nga Dios, dapat magtuon kita parte sa iya—hangpon ang iya mga dalanon, ang iya laygay, kag ang iya mga ginapatuman. (Juan 17:3) Bugana nga ginapatawad ni Jehova ang mga nagahinulsol sa ila mga sala kag nagatinguha nga magbag-o.—Basaha ang Binuhatan 3:19.

Indi tuman kabudlay para sa aton nga mabaton ang kahamuot sang Dios. Nahibaluan ni Jehova ang aton mga kaluyahon. Maluluy-on sia kag mainayuhon. Napahulag ka bala sang iya kaayo nga hibaluon ang dugang pa parte sa kon paano mo sia mapahamut-an?—Basaha ang Salmo 103:13, 14.