Ngaa Dapat Mo Usisaon ang Imo Relihion?

Ibutang ta nga kinahanglan ka operahan tungod sa isa ka makatalagam nga balatian. Magasalig ka gid sa doktor bangod yara sa iya mga kamot ang imo kabuhi. Indi bala nagakaigo lang nga usisaon mo ang iya kredibilidad?

Sing kaanggid, maalamon man nga usisaon naton sing maayo ang relihion. Kon miembro ka sang isa ka relihion, daw pareho lang nga ginasalig mo ang imo espirituwal nga kabuhi sa kamot sini. Nagalakip ini sang imo kaluwasan.

Si Jesus naghatag sing prinsipio agod mahibaluan naton kon matuod ang aton relihion. Nagsiling sia: “Ang tagsa ka kahoy makilala sa bunga sini.” (Lucas 6:44) Halimbawa, kon ginausisa mo ang isa ka relihion ukon sekta, ano nga bunga ang ginapatubas sini? Pirme bala ginapadaku sang mga lider sini nga importante gid ang kuarta? Ginasunod bala sang mga miembro sini ang mga prinsipio sa Biblia parte sa inaway kag moral? May relihion pa bala nga masaligan naton? Ginaagda ka namon nga usisaon ang masunod nga mga artikulo.