Watchtower ONLINE NGA LIBRARY
Watchtower
ONLINE NGA LIBRARY
Hiligaynon
  • BIBLIA
  • PUBLIKASYON
  • MITING
  • w13 8/1 p. 3-7
  • Pornograpiya—Makahalalit Gid Bala?

Wala ang video nga ginpili mo.

Sorry, may error sa pag-load sang video.

  • Pornograpiya—Makahalalit Gid Bala?
  • Ang Lalantawan Nagabantala sang Ginharian ni Jehova—2013
  • Mga subtitulo
  • Pareho nga Materyal
  • Ano ang epekto sang pornograpiya sa indibiduwal?
  • Ano ang epekto sang pornograpiya sa pamilya?
  • Ano ang ginasiling sang Biblia parte sa pornograpiya?
  • Paano Ko Malikawan ang Pornograpiya?
    Magmata!—2007
  • Ang Halit nga Tuga sang Pornograpiya
    Magmata!—2003
  • Ngaa Likawan ang Pornograpiya?
    Pamangkot sang mga Pamatan-on
  • Pornograpiya
    Magmata!—2013
Mangita sing Iban Pa
Ang Lalantawan Nagabantala sang Ginharian ni Jehova—2013
w13 8/1 p. 3-7

TOPIKO SA KOBER

Pornograpiya​—Makahalalit Gid Bala?

Lapnag gid subong ang pornograpiya.a Makit-an ini sa mga pasayod, pamayo, pelikula, musika, magasin, telebisyon, video game, mobile device, kag Internet. Ginabaton na ini sang mga tawo. Subong ang pinakamadamo nga nagatan-aw sang pornograpiya sa bug-os nga kasaysayan.—Tan-awa ang kahon nga “Ang Kamatuoran Parte sa Pornograpiya.”

Nagabag-o man ang porma sang pornograpiya. Si Professor Gail Dines nagsulat: “Nagalala na gid ang mga laragway subong amo nga ang ginakabig nga tuman kalala nga pornograpiya sadto kinaandan na lang.”

Ano ang imo pagtamod sa pornograpiya? Kalingawan lang bala ini, makahalalit gid, ukon daw indi gid man tuman ka lain? Si Jesus nagsiling: “Ang tagsa ka maayo nga kahoy nagapatubas sang maayo nga bunga, apang ang tagsa ka malain nga kahoy nagapatubas sang wala pulos nga bunga.” (Mateo 7:17) Ano ang bunga sang pornograpiya? Para mahibaluan ang sabat, binagbinagon naton ang pila ka pamangkot parte sa pornograpiya.

Ano ang epekto sang pornograpiya sa indibiduwal?

ANG GINASILING SANG MGA EKSPERTO: Makaaladik gid ang pornograpiya, kag ginpaanggid pa gani ini sang mga researcher kag therapist sa cocaine.

Si Brian,b nga naadik sa pornograpiya nagsiling: “Wala gid sing makapugong sa akon. Daw wala ako sa akon kaugalingon. Nagakurog ako kag nagasakit ang akon ulo. Gintinguhaan ko ini nga untatan, pero pagligad sang pila ka tuig naadik gihapon ako.”

Masami nga ginasekreto ukon ginatago sang mga naadik sa pornograpiya ang ila ginahimo. Amo nga madamo ang nakabatyag nga nagaisahanon sila, nahuya, nabalaka, nasubuan, kag naakig. Nagahunahuna pa gani ang iban nga maghikog. “Wala ako labot sa iban kag desperado,” siling ni Serge, nga adlaw-adlaw nga naga-download sang pornograpiya sa iya cell phone. “Pamatyag ko wala ako sing pulos, makasasala, nagaisahanon, kag wala sing pasingadtuan. Nahuya gid ako kag nahadlok magpabulig.”

Bisan ang dali lang ukon di-hungod nga pagtan-aw sang pornograpiya may malain nga mga resulta. Sang nagtestigo sa komite sang Senado sang U.S. si Dr. Judith Reisman, ang nagapanguna sa pag-research sa pornograpiya, nagsiling sia: “Ang mga laragway sang pornograpiya nagapabilin kag nagapabag-o sa utok, nga nagaresulta sa pagdumdom sini sing hinali, indi hungod, pero mabudlay ukon imposible na malipatan.” Ang 19 anyos nga si Susan, nga nagalantaw sang pornograpiya sa Internet, nagsiling: “Ang mga laragway nagapabilin sa akon hunahuna. Gulpi ko lang ini madumduman. Pamatyag ko indi ko na gid ini malipatan.”

ANG LEKSION: Ang pornograpiya nagaulipon kag nagahalit sa mga biktima sini.—2 Pedro 2:19.

Ano ang epekto sang pornograpiya sa pamilya?

ANG GINASILING SANG MGA EKSPERTO: “Ginaguba sang pornograpiya ang pag-asawahay kag pamilya.”—The Porn Trap, ni Wendy kag Larry Maltz.

Ginaguba sang pornograpiya ang pag-asawahay kag pamilya bangod

  • Ginabuhinan sini ang pagsalig, kasuod, kag gugma sang mag-asawa.—Hulubaton 2:12-17.

  • Ginapabaskog sini ang pagkamaiyaiyahon, ginapatahaw ang emosyon, kag ginapalas-ay ang balatyagon sa tiayon.—Efeso 5:28, 29.

  • Ginadabukan sini ang pagpantasya kag indi maayo nga handum sa sekso.—2 Pedro 2:14.

  • Ginasulay sini ang mga naadik sa pornograpiya nga piliton ang ila tiayon nga maghimo sing kwestionable nga pagpakigsekso.—Efeso 5:3, 4.

  • Ginapabaskog sini ang handum nga magluib.—Mateo 5:28.

Ang Biblia nagasiling sa mag-asawa nga ‘indi magluib’ sa isa kag isa. (Malaquias 2:16) Ang pagluib nagaguba sang pag-asawahay kag nagadul-ong sa pagbulagay kag diborsio, kag ang pagbulagay makahalit sa kabataan.

Ang pornograpiya makahalit man sa kabataan sa direkta nga paagi. Si Brian, nga ginsambit kaina, nagsiling: “Sang mga dies anyos ako, nakit-an ko sing indi hungod ang mga magasin sang pornograpiya sang akon amay sang nagahampang kami sing panaguay. Halin sadto, sekreto ko nga ginatan-aw ini, bisan pa wala ko maintiendihan kon ngaa nanamian gid ako sa mga laragway. Didto nagsugod ang akon makahalalit nga bisyo asta sang naghamtong ako.” Ginapakita sang pagtuon nga ang pornograpiya makaimpluwensia sa mga pamatan-on nga mangin aktibo sa sekso samtang bata pa, kag makigsekso sa kay bisan sin-o lang, mangin bayolente sa sekso, kag magbag-obag-o ang emosyon kag hunahuna.

ANG LEKSION: Ang pornograpiya nagaguba sang maayo nga relasyon kag nagadul-ong sa kasakit.—Hulubaton 6:27.

Ano ang ginasiling sang Biblia parte sa pornograpiya?

ANG BIBLIA NAGASILING: “Patya ninyo ang mga bahin sang inyo lawas nga yara sa duta may kaangtanan sa pagpakighilawas, kahigkuan, kailigbon sa sekso, makahalalit nga handum, kag pagkamahamkunon, nga isa ka idolatriya.”—Colosas 3:5.

Maathag nga ginadumtan ni Jehovac nga Dios ang pornograpiya. Indi bangod tuman sia ka estrikto parte sa sekso. Sia ang nagtuga sang aton seksuwal nga ikasarang kag katuyuan niya nga gamiton ini sang mag-asawa para magmalipayon, mangin suod, kag magbata.—Santiago 1:17.

Ngaa makasiling kita nga ginadumtan gid ni Jehova ang pornograpiya? Binagbinaga ang pila ka rason.

  • Nakahibalo sia nga ang pornograpiya makaguba sang kabuhi.—Efeso 4:17-19.

  • Ginahigugma kag ginaproteksionan niya kita.—Isaias 48:17, 18.

  • Ginaamligan ni Jehova ang pag-asawahay kag pamilya.—Mateo 19:4-6.

  • Luyag niya nga mangin matinlo kita sa moral kag tahuron ang kinamatarong sang iban.—1 Tesalonica 4:3-6.

  • Gusto niya nga tahuron naton ang aton ikasarang nga magbata kag gamiton ini sing husto.—Hebreo 13:4.

  • Nakahibalo si Jehova nga ang pornograpiya nagapakita sang tiko, maiyaiyahon, kag sataniko nga pagtamod sa sekso.—Genesis 6:2; Judas 6, 7.

ANG LEKSION: Ginaguba sang pornograpiya ang kaangtanan sang isa sa Dios.—Roma 1:24.

Pero may daku nga kaluoy si Jehova sa mga tawo nga luyag magpanginpadlos sa higot sang pornograpiya. Ang Biblia nagasiling: “Ang GINOO maloloy-on kag mainayohon, makuli sa pagpangakig kag bugana sa malig-on nga paghigugma. Kay nakilala niya ang aton kahimtangan; nagadumdum sia nga kita yab-ok.” (Salmo 103:8, 14) Ginaagda niya ang mga mapainubuson nga magpalapit sa iya para “matigayon naton ang kaluoy kag ang wala tupong nga kaayo sa tion nga nagakinahanglan kita sang bulig.”—Hebreo 4:16; tan-awa ang kahon nga “Pagpanginpadlos sa Pornograpiya.”

Madamo ang nagbaton sang bulig sang Dios. Epektibo bala ini? Talupangda kon ano ang ginasiling sang Biblia sa mga nakalandas sang ila bisyo: “Ginhugasan na kamo, . . . ginpakabalaan na kamo, . . . ginpahayag na kamo nga matarong sa ngalan sang aton Ginuong Jesucristo kag sang espiritu sang aton Dios.” (1 Corinto 6:11) Kaangay ni apostol Pablo, mahimo man sila makasiling: “Sa tanan nga butang may kusog ako paagi sa iya nga nagapabakod sa akon.”—Filipos 4:13.

Si Susan, nga nakalandas sang iya pagkaadik sa pornograpiya, nagsiling: “Si Jehova lang ang makabulig sa imo nga malandas ang pornograpiya. Kon magpabulig ka kag magpagiya sa iya, mangin matinlo ka sa iya atubangan. Indi ka gid niya pagpabay-an.”

Pagpanginpadlos sa Pornograpiya

May kilala ka bala nga nagapaninguha gid nga makapanginpadlos sa pagkaadik sa pornograpiya? Talupangda ang pila ka paagi nga nakabulig sa madamo nga makapanginpadlos sa sini.

1. Pagpangamuyo sa Dios.

“Ang pinakaimportante nga paagi para makapanginpadlos sa siod sang pornograpiya amo ang pagpangamuyo kay Jehova.”—Franz.

Mahatagan ni Jehova ang isa sang iya balaan nga espiritu agod ‘magbuot kag manghikot.’ (Filipos 2:13) Kon ang isa magpagiya sa sini, mabatuan niya ang sala nga “mga balatyagon kag mga kailigbon.”—Galacia 5:16, 24.

2. Pagpangayo sing bulig.

“Kon naadik ka sa pornograpiya, ginatago mo ini kag nahuya ka magpabulig. Ginapensar mo nga masarangan mo ini nga ikaw lang. Pero indi ina matuod. Kinahanglan mo gid sing bulig. Gani gintulon ko ang akon bugal kag ginsugid ini sa akon asawa. Nagpangayo man ako sing bulig sa akon masaligan nga abyan. Amo ini ang pinakamabudlay nga ginhimo ko, pero nakabulig gid ini sa akon.”—Yoshi.

Ang pagsugid sa iban nagakinahanglan sing kaisog kag determinasyon. Pero importante ini para malandas ang pagkaadik sa pornograpiya kag mapanumbalik ang imo kaangtanan sa imo mga hinigugma. Si Susan, nga ginsambit kaina, nagsiling: “Pagkatapos sini, daw nahaw-asan gid ako. Mabudlay gid yadto, pero nakabatyag ako nga husto na ang akon ginahimo kag malinong ang akon hunahuna.”—Santiago 5:16.

3. Paghibalo kag paglikaw sang makapukaw sang pagkaadik.

Ano nga mga sitwasyon, panghunahuna, ukon emosyon ang nagapukaw sang malain nga handum? Pag-surf sa Internet? Pagtan-aw sing TV kon gab-i na gid? Pagbasa sing mga magasin? Pagkadto sa beach? Kon gutom, akig, nagaisahanon, ukon kapoy? “Hibalua ang imo mga kaluyahon, kag likawi ini nga daw pareho sa makalalaton nga balatian,” siling ni Sven. Si Jesus nagsiling: “Karon, kon ang imo tuo nga mata nagapasandad sa imo, lukata ini kag ihaboy.”—Mateo 5:29.

“Kon nasulay ako nga magpasiplat nga may malisya sa isa ka babayi, nagapangamuyo dayon ako kay Jehova kag ginalikaw ko ang akon panulok,” siling ni Franz. Ang matutom nga si Job nagsiling: “Nagpromisa ako sa akon kaugalingon nga indi gid magtulok nga may kailigbon sa mga dalaga.”—Job 31:1, Ang Pulong sang Dios.

4. Pagpabakod sang kaangtanan sa Dios.

“Hunahunaa pirme ang maayo nga mga butang kag mangin masako sa mga hilikuton para sa Dios,” siling ni Franz.

Ang Biblia nagasiling: “Bisan ano nga butang nga matuod, bisan ano nga butang nga serioso, bisan ano nga butang nga matarong, bisan ano nga butang nga putli, bisan ano nga butang nga hiligugmaon, bisan ano nga butang nga dungganon, bisan ano nga labing maayo kag bisan ano nga dalayawon nga butang, padayon nga hunahunaa ini nga mga butang . . . , kag ang Dios sang paghidait mangin kaupod ninyo.”—Filipos 4:8, 9.

a Ang termino nga “pornograpiya” nagapatuhoy sa mga butang nga gindesinyo para pukawon ang gana sa sekso sang mga nagatan-aw, nagabasa, kag nagapamati sini. Nagalakip ini sang mga piktyur, balasahon, kag mapamatian nga mga butang.

b Gin-islan ang mga ngalan sa sini nga artikulo.

c Si Jehova ang ngalan sang Dios sa Biblia. Sa Maayong Balita nga Biblia, ang footnote sang Genesis 2:4 nagasiling: “Ang GINOO sa Hebreo nga teksto Yahweh. Sa iban nga pagbadbad ginagamit ang Jehova.”

ANG KAMATUORAN PARTE SA PORNOGRAPIYA

KADA SEGUNDO:

Mga 30,000 ka tawo ang nagatan-aw sing pornograpiya sa Internet.

KADA MINUTO:

Ang mga nagagamit sing Internet nagapadala sang sobra sa 1.7 KA MILYON nga e-mail nga nagaunod sing pornograpiya.

KADA ORAS:

Mga DUHA ka hard-core nga video nga pornograpiya ang ginapagua sa Estados Unidos.

KADA ADLAW:

Mga DUHA KA MILYON ka pelikula nga pornograpiya ang ginaarkilahan sa Estados Unidos lamang.

KADA BULAN:

Mga 9 sa kada 10 ka pamatan-on nga lalaki kag 3 sa kada 10 ka pamatan-on nga babayi sa Estados Unidos ang nagatan-aw sing pornograpiya.

KADA TUIG:

Ang bug-os kalibutan nga industriya sang pornograpiya nagaganar sing mga $100 KA BILYON (U.S.).

    Hiligaynon Publications (1980-2025)
    Mag-log Out
    Mag-log In
    • Hiligaynon
    • I-share
    • Mga preference
    • Copyright © 2025 Watch Tower Bible and Tract Society of Pennsylvania
    • Mga Kasugtanan sa Paggamit
    • Privacy Policy
    • Privacy Settings
    • JW.ORG
    • Mag-log In
    I-share