Ang Iya Di-makita nga mga Kinaiya “Maathag nga Makita”

Nagapati ka bala sa Dios? Kon amo, may ebidensia ka bala nga nagaluntad gid sia? Ang matuod napalibutan kita sang mga ebidensia nga may isa ka Manunuga nga maalam, gamhanan, kag mahigugmaon. Ano ini nga ebidensia kag daw ano ini ka masaligan? Binagbinagon naton ang ginsiling ni apostol Pablo sa iya sulat sa mga Cristiano sa Roma.

Si Pablo nagsiling: “Ang iya [sang Dios] di-makita nga mga kinaiya, bisan ang iya dayon nga gahom kag pagka-Dios, maathag nga makita kutob sang pagtuga sa kalibutan, bangod mahantop ini sa mga butang nga gintuga, gani wala sila sing ibalibad.” (Roma 1:20) May ginbilin nga ebidensia ang Manunuga sa iya mga ginhimo subong sang ginpakita ni Pablo. Isaisahon naton ang iya ginsiling.

Ang mga kinaiya sang Dios makita “kutob sang pagtuga sa kalibutan,” siling ni Pablo. Sa sini nga mga bersikulo, ang Griego nga tinaga nga “kalibutan” wala nagapatuhoy sa planeta nga duta, kundi sa mga tawo.a Gani, ang buot silingon ni Pablo nga sugod sang pagtuga sang mga tawo, makita na nila ang pamatuod sang mga kinaiya sang Manunuga sa mga butang nga iya ginhimo.

Makita ini nga mga ebidensia sa aton palibot. Wala ini natago sa kinaugali kundi “maathag nga makita.” Halin sa pinakadaku asta sa pinakagamay, maathag nga ginapakita sang mga tinuga nga indi lang may Manunuga kundi may maayo man sia nga mga kinaiya. Indi bala nga ang matahom nga desinyo nga makita naton sa mga tinuga nagapamatuod sang kaalam sang Dios? Indi bala nga ang mga bituon kag dalagku nga mga balod nagapakita sang iya gahom? Indi bala ang manamit nga mga pagkaon kag ang matahom nga pagbutlak kag pagtunod sang adlaw nagapakita sang iya gugma para sa katawhan?—Salmo 104:24; Isaias 40:26.

Daw ano kaathag ang ebidensia? Maathag gid ini nga ang wala nakakita sini kag wala nagapati sa Dios ‘wala sing ibalibad.’ Ginlaragway ini sang isa ka iskolar: Handurawa ang isa ka drayber nga wala nagsapak sa karatula sa dalan nga “Liko sa Wala.” Gindakop sia sang pulis. Nagreklamo ang drayber nga wala niya makita ang karatula. Pero indi ini mapatihan kay kitaon gid ang karatula, kag wala man sing diperensia ang iya mga mata. Kag isa pa, responsibilidad gid sang drayber nga tan-awon kag sundon ang mga karatula sa dalan. Amo man sini ang ebidensia sang Dios sa kinaugali. Ina nga “karatula” kitaon gid. Subong maalam nga mga tinuga, may ikasarang kita nga makita ini. Wala kita sing ibalibad sa indi pagsapak sini.

Paagi sa iya mga tinuga, madamo kita sing mahibaluan parte sa aton Manunuga. Pero mas madamo ang ginasugid sang Biblia parte sa iya. Masabat sini ang importante nga pamangkot: Ano ang katuyuan sang Dios para sa duta kag sa mga tawo? Ang paghibalo sang sabat sa sini makabulig sa imo nga mangin suod sa Dios nga ang iya di-makita nga mga kinaiya “maathag nga makita” sa aton palibot.