Nakita ni Eliseo ang Nagakalayo nga mga Kangga​—Nakita Mo Man Bala?

Ginapangita sang hari sang Siria ang manalagna sang Dios nga si Eliseo, kag nabal-an nga nagkadto sia sa napaderan nga siudad sang Dotan. Pagkagab-i, nagpadala ang hari sang mga kabayo, mga kangga, kag mga soldado sa Dotan. Sang nagapamanagbanag na, ginalikupan na sang iya hangaway ang siudad.—2 Hari 6:13, 14.

Sang nagbangon ang alagad ni Eliseo kag naggua, nakita niya ang mga magadakop sa manalagna. “Abaw, agalon ko! Ano bala ang himoon ta?” singgit niya. “Dili ka magkahadluk,” siling ni Eliseo, “kay ang mga nagaupud sa aton madamu pa sa mga nagaupud sa ila.” Dayon nangamuyo ang manalagna: “O GINOO, ginaampo ko sa imo, buksi ang iya mga mata agud nga makakita sia.” Ang Biblia nagpadayon: “Gani ginbuksan sang GINOO ang mga mata sang pamatan-on nga lalaki, kag nakakita sia; kag yari karon, ang bukid hil-ob sang mga kabayo kag sang mga kangga nga kalayo sa palibut ni Eliseo.” (2 Hari 6:15-17) Ano ang matun-an naton sa sini kag sa iban pa nga hitabo sa kabuhi ni Eliseo?

Kalmado si Eliseo bisan pa salakayon sia sang mga Sirianhon bangod nagasalig sia kay Jehova kag nakita niya ang nagaamlig nga gahom sang Dios. Wala kita nagapaabot sing mga milagro sa karon, pero nahangpan naton nga ginaamligan ni Jehova ang iya katawhan subong isa ka grupo. Pareho lang nga ginalibutan kita sang nagakalayo nga mga kabayo kag mga kangga. Kon ‘nakita’ naton ini paagi sa aton mga mata sang pagtuo kag magsalig pirme sa Dios, ‘magapuyo kita sa kalig-onan’ kag pakamaayuhon ni Jehova. (Sal. 4:8) Binagbinagon naton kon paano kita makabenepisyo sa iban pa nga hitabo sa kabuhi ni Eliseo.

SI ELISEO NAG-ALAGAD KAY ELIAS

Isa ka adlaw samtang nagaarado si Eliseo, ginpalapitan sia ni Elias kag gintaklap ang iya kunop kay Eliseo. Nahibaluan ni Eliseo kon ano ang buot silingon sini. Naghiwat sia sing salosalo, nagpaalam sa iya mga ginikanan, kag nagbiya sa iya puluy-an para mag-alagad kay Elias. (1 Hari 19:16, 19-21) Bangod handa si Eliseo nga mag-alagad sa Dios sa iya bug-os nga masarangan, gingamit sia ni Jehova kag sang ulihi nagbulos kay Elias subong manalagna.

Si Eliseo nag-alagad kay Elias sing mga anom ka tuig. Sa sina nga mga tinion, si Eliseo ang “[nagabubo] sing tubig sa mga kamut ni Elias.” (2 Hari 3:11) Sadto nga panahon, kinaandan na nga nagakinamot ang mga tawo kon magkaon. Pagkatapos kaon, ginabubo sang alagad ang tubig sa kamot sang iya agalon para makapanghinaw ini. Gani kon kaisa, nagahimo si Eliseo sing kubos nga mga hilikuton. Pero, ginakabig niya nga pribilehiyo nga mangin alagad ni Elias.

Sa karon, madamo nga Cristiano ang nagaalagad sing bug-os tion. Ginahimo nila ini bangod sang ila pagtuo kag handum nga gamiton ang ila bug-os nga kusog sa pag-alagad kay Jehova. Bangod sang ila mga asaynment, ang iban nagakinahanglan nga magbiya sa ila puluy-an kag maghimo sing mga buluhaton sa Bethel, konstruksion, kag iban pa, nga mahimo ginakabig sang madamo nga kubos. Indi dapat pagkabigon sang mga Cristiano nga ini nga pag-alagad wala sing pulos ukon nagapakanubo, kay ginapabaloran gid ini ni Jehova.—Heb. 6:10.

SI ELISEO NAGPABILIN SA IYA ASAYNMENT

Antes “bayawon sang GINOO si Elias pa langit paagi sa buhawi,” ginpadala niya ang manalagna halin sa Gilgal pakadto sa Betel. Ginsilingan ni Elias ang iya alagad nga indi na lang ini mag-upod sa iya, pero si Eliseo nagsiling: “Indi ako magbiya sa imo.” Samtang padayon sila nga nagalakat, duha pa ka beses nga nagpamilit si Elias nga magpabilin na lang si Eliseo pero wala ini nagpasugot. (2 Hari 2:1-6) Subong nga nag-unong si Rut kay Noemi, gin-unungan man ni Eliseo si Elias. (Rut 1:8, 16, 17) Ngaa? Bangod ginpabaloran ni Eliseo ang ginhatag sa iya sang Dios nga pribilehiyo nga mag-alagad kay Elias.

Isa gid ka maayo nga halimbawa sa aton si Eliseo. Kon makabaton kita sing isa ka pribilehiyo sa organisasyon sang Dios, mapabaloran gid naton ini kon dumdumon naton nga ginaalagad naton si Jehova. Wala na sing mas dungganon pa sa sini.—Sal. 65:4; 84:10.

“PANGAYO KA SANG HIMOON KO TUNGUD SA IMO”

Samtang nagalakbay sila, ginsilingan ni Elias si Eliseo: “Pangayo ka sang himoon ko tungud sa imo, sa wala pa ako pagkuhaa sa imo.” Subong nga nangabay sadto si Solomon sing espirituwal nga butang, amo man sini ang ginpangabay ni Eliseo. Nangabay sia nga matigayon niya ‘ang dubli nga bahin sang espiritu ni Elias.’ (1 Hari 3:5, 9; 2 Hari 2:9) Sa Israel, ang kamagulangan nga bata nga lalaki nagabaton sing doble nga bahin sang palanublion. (Deut. 21:15-17) Gani, pareho lang nga ginpangabay ni Eliseo nga kabigon sia ni Elias subong espirituwal nga manunubli. Dugang pa, luyag ni Eliseo nga matigayon man ang maisog nga espiritu ni Elias, nga makugi gid kay Jehova.—1 Hari 19:13, 14.

Ano ang reaksion ni Elias sa pangabay sang iya alagad? “Nagpangayo ka sing butang nga maiwat,” siling sang manalagna. “Kon makita mo ako kon kuhaon ako sa imo, mangin-amo ini sa imo; apang kon indi, indi mangin-amo ini.” (2 Hari 2:10) Ang sabat ni Elias may duha ka importante nga bahin. Una, ang Dios lamang ang makapamat-od kon bala mabaton ni Eliseo ang iya ginapangayo. Ikaduha, para mabaton ini ni Eliseo, kinahanglan unungan gid niya si Elias ano man ang matabo.

KON ANO ANG NAKITA NI ELISEO

Paano gintamod sang Dios ang pangabay ni Eliseo nga hatagan sia sing duha ka bahin sang espiritu ni Elias? Ang Biblia nagsiling: “Kag sang naglakat pa sila kag naghambalanay, yari karon, nagpahayag ang isa ka kangga nga kalayo kag mga kabayo nga kalayo nga nagbulag sa ila nga duha. Kag si Elias nagpaibabaw pa langit paagi sa buhawi. Kag nakita ini ni Eliseo.”a Amo ini ang sabat ni Jehova sa pangabay ni Eliseo. Nakita ni Eliseo nga ginkuha sa iya si Elias, nabaton niya ang duha ka bahin sang espiritu ni Elias, kag nangin espirituwal nga manunubli sang manalagna.—2 Hari 2:11-14.

Ginpulot ni Eliseo ang kunop ni Elias nga nahulog kag ginsuksok ini. Ini nga kunop amo na karon ang nagapakilala sa iya subong manalagna sang Dios. Ang dugang pa nga pamatuod nga manalagna na sia amo ang ginhimo niya nga milagro nga pagtunga sang Suba Jordan.

Pat-od nga may daku gid nga epekto kay Eliseo sang nakita niya si Elias nga nagpaibabaw paagi sa buhawi. Kay man, indi kinaandan nga makakita ang isa ka tawo sing nagakalayo nga kangga kag mga kabayo! Nagapamatuod ini nga ginhatag ni Jehova ang pangabay ni Eliseo. Kon ginasabat sang Dios ang aton mga pangamuyo, wala kita sing makita nga nagakalayo nga kangga kag mga kabayo. Pero nahangpan naton nga ginagamit sang Dios ang iya daku nga gahom para masiguro nga matuman ang iya kabubut-on. Kag kon makita naton nga ginapakamaayo ni Jehova ang dutan-on nga bahin sang iya organisasyon, pareho lang nga ‘nakita’ naton ang paghulag sang iya langitnon nga kangga.—Ezeq. 10:9-13.

Madamo sing naeksperiensiahan si Eliseo nga nagkumbinsi sa iya sang daku nga gahom ni Jehova. Ang matuod, paagi sa balaan nga espiritu sang Dios nakahimo sia sing 16 ka milagro—mas madamo sing duha ka pilo sangsa kay Elias.b Ang ikaduha nga tion nga nakakita si Eliseo sing nagakalayo nga mga kabayo kag mga kangga amo ang natabo sa Dotan nga ginsambit sa umpisa sini nga artikulo.

NAGSALIG SI ELISEO KAY JEHOVA

Bisan pa ginalikupan sang mga kaaway sa Dotan, nangin kalmado si Eliseo. Ngaa? Bangod may mabakod sia nga pagtuo kay Jehova. Kinahanglan man naton ini nga pagtuo. Gani, mangamuyo kita sang balaan nga espiritu sang Dios para mapakita naton ang pagtuo kag ang iban pa nga aspekto sang bunga sang espiritu.—Luc. 11:13; Gal. 5:22, 23.

Ang natabo sa Dotan naghatag man sing rason kay Eliseo nga magsalig kay Jehova kag sa iya di-makita nga manug-amlig nga mga hangaway. Narealisar sang manalagna nga ginpadala sang Dios ang iya mga anghel para maglikop sa siudad kag sa iya mga manugsalakay. Paagi sa pagbulag sa mga kaaway, ginluwas sang Dios si Eliseo kag ang iya alagad. (2 Hari 6:17-23) Sadtong mabudlay nga tion, kag sa iban pa nga sitwasyon, nagpakita si Eliseo sing pagtuo kag nagsalig sing bug-os kay Jehova.

Kaangay ni Eliseo, dapat magsalig kita kay Jehova nga Dios. (Hulu. 3:5, 6) Kon himuon naton ini, “ang Dios magkalooy sa aton kag magpakamaayo sa aton.” (Sal. 67:1) Matuod, indi literal nga ginalikupan kita sang nagakalayo nga mga kangga kag kabayo. Pero sa nagahilapit nga “dakung kapipit-an,” proteksionan kita ni Jehova subong isa ka grupo sang mga kauturan sa bug-os nga kalibutan. (Mat. 24:21; Bug. 7:9, 14) Samtang wala pa ini, dumdumon naton pirme nga “ang Dios dalangpan naton.”—Sal. 62:8.