Mahimo Masubuan ang Dios—Paano Naton Sia Mapasadya?

Nakaagi ka na bala hibi bangod sa sobra nga kasakit?—a Mahimo tanan kita nakaagi sini. Pero kon kaisa mahimo nga nagahibi kita bangod sang kasubo. Mahimo may maghambal sang malain parte sa aton nga indi matuod. Masubuan ka gid, indi bala?— Nasubuan man ang Dios kon may maghambal sing indi matuod parte sa iya. Hambalan naton kag hibaluon kon paano naton sia mapasadya sa baylo nga mapasubo.

Ang Biblia nagasiling nga may mga nagahambal nga palangga nila ang Dios pero ginapasubo nila sia. Istoryahan naton subong kon ngaa nasubuan si Jehova kon indi naton paghimuon ang iya ginahambal.

Ang una nga duha ka tawo nga gintuga ni Jehova sa duta nagpasubo gid sa iya. Ginpaistar niya sila sa Paraiso sa duta nga gintawag “ang hardin sang Eden.” Sin-o ining duha?— Huo, si Adan, kag dayon si Eva. Hibaluon naton kon ano ang ila ginhimo nga nagpasubo kay Jehova.

Pagkatapos nga ginpaistar sila ni Jehova sa sina nga hardin, ginsilingan niya sila nga atipanon ini. Ginsilingan man niya sila nga puede sila magbata kag mag-istar sa hardin nga indi na mapatay. Pero antes makabata sanday Adan kag Eva, may malain nga natabo. Bal-an mo kon ano ang natabo?— May anghel nga nagsugo kay Eva kag dayon kay Adan nga magrebelde kay Jehova. Hibaluon naton kon paano ini natabo.

Daw ginpahambal sang anghel ang isa ka man-ug, ukon serpente. Nanamian si Eva sang iya nabatian—mangin ‘pareho kuno sia sa Dios’ siling sang man-ug. Gani ginsunod niya ang ginsugo sini. Bal-an mo kon ano ang ginsugo sa iya?—

Ginkaon ni Eva ang bunga sang kahoy nga ginsugo ni Jehova kay Adan nga indi nila pagkaunon. Sa wala pa matuga sang Dios si Eva, ginsugo niya si Adan: “Makakaon ka sing hilway sang tagsa ka kahoy sang katamnan; apang gikan sa kahoy sang pagkilala sang maayo kag malaut dili ka magkaon sa iya, kay sa adlaw nga magkaon ka sa iya mapatay ka nga totoo.”

Nahibaluan ni Eva ini nga sugo. Pero padayon niya nga gintan-aw kag nakita niya nga “ang kahoy maayo nga kalan-on, kag nga makagalanyat sa mga mata . . . nagkuha sia sang iya bunga kag nagkaon.” Sang ulihi ginhatagan niya sing bunga si Adan, “kag nagkaon sia.” Bal-an mo bala kon ngaa nagkaon si Adan?— Kay mas palangga niya si Eva sangsa kay Jehova. Mas gusto niya nga malipay si Eva sangsa Dios. Pero ang pagtuman kay Jehova mas importante sangsa pagtuman kay bisan sin-o.

Nadumduman mo bala ang man-ug, ukon serpente, nga naghambal kay Eva? Pareho sang isa ka tawo nga makahimo sang puppet nga daw nagahambal, may isa nga daw nagpahambal sa man-ug. Sin-o gali ang nagahambal?— Tingog yadto sang “orihinal nga man-ug, ang isa nga ginatawag Yawa kag Satanas.”

Paano mo mapasadya si Jehova?— Mahimo mo ini kon pirme mo sia tumanon. Si Satanas nagsiling nga mapatuman niya ang tanan nga tawo. Gani si Jehova nagpangabay sa aton: “Anak ko, magmaalam ka, kag pasadyaha ang akon tagiposoon, agud nga masabat ko sia nga nagapakahuya sa akon.” Ginapakalain ukon gin-insulto ni Satanas si Jehova. Nagsiling sia nga mapauntat niya sa pag-alagad sa Dios ang bisan sin-o. Gani pasadyaha si Jehova paagi sa pagtuman kag pag-alagad sa iya! Tinguhaan mo gid bala nga himuon ina?—