TOPIKO SA KOBER | NGAA NABUDLAYAN ANG IBAN NGA HIGUGMAON ANG DIOS?
Ngaa Mabudlay Higugmaon ang Dios?
“‘Higugmaon mo si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga hunahuna.’ Amo ini ang labing daku kag nahauna nga sugo.”—Jesucristo, 33 C.E.a
Nabudlayan ang iban nga higugmaon ang Dios. Para sa ila, indi malab-ot, malayo, ukon mapintas pa gani sia. Talupangda ang masunod nga mga halimbawa:
“Nagapangamuyo ako sa Dios nga buligan ako, pero pamatyag ko malayo sia kag daw indi gid malab-ot. Nagahunahuna ako nga ang Dios isa ka persona nga wala sing balatyagon.”—Marco, Italya.
“Bisan gusto ko gid nga alagdon ang Dios, daw kalayo gid sa iya. Pamatyag ko isa sia ka mapintas nga Dios nga nagasilot lang sa aton. Wala ako nagapati nga palangga niya kita.”—Rosa, Guatemala.
“Sang bata pa ako, nagapati ako nga ginabantayan lang sang Dios ang aton mga sala, kag silutan kita bangod amo ini ang bagay sa aton. Sang ulihi, nagbatyag ako nga daw kalayo gid sa iya. Daw pareho sia sang isa ka primer ministro nga nagadumala sang iya mga sakop pero indi sia interesado sa ila.”—Raymonde, Canada.
Ano sa banta mo? Mabudlay bala higugmaon ang Dios? Madugay na ini nga ginapamangkot sang mga Cristiano. Ang matuod, sang 500-1500 C.E., ang kalabanan nga sakop sang Cristiandad wala gani nagapangamuyo sa Labing Gamhanan nga Dios. Ngaa? Bangod nahadlok gid sila sa iya. Amo ini ang komento sang istoryador nga si Will Durant: “Ngaa tilawan pa sang isa ka makasasala nga mangamuyo sa makahaladlok kag malayo nga Dios?”
Ngaa gintamod nila nga “makahaladlok kag malayo” ang Dios? Ano gid ang ginatudlo sang Biblia parte sa iya? Ang pagtuon bala sang kamatuoran parte sa Dios makabulig sa imo nga higugmaon sia?