Ang Matuod nga Balasulon sa Inaway kag Pag-antos

Sang Nobiembre 11, 1918, ang Bug-os Kalibutan nga Inaway I natapos. Nag-untat ang mga negosyo, kag nagkinalipay ang mga tawo sa dalan. Pero wala ini nagdugay. Ang isa pa ka kalalat-an, nga mas makamamatay sangsa machine gun, nagbulos dayon sa bug-os kalibutan nga inaway.

Ang makamamatay nga balatian nga kilala nga trangkaso Espanyol naglapnag sa mga patag-awayan sa Pransia sang Hunyo 1918. Madasig ang paglapta sining makamamatay nga virus. Halimbawa, sa pila lang ka bulan, mas madamo pa ang napatay sini nga Amerikano nga soldado sa Pransia sangsa napatay sa inaway. Kag ang trangkaso nga gindala sang nagpalauli nga soldado sa ila pungsod sang natapos na ang inaway, madasig nga naglapta sa bilog nga kalibutan.

May daku man nga gutom kag pag-usmod sang ekonomiya pagkatapos sang inaway. Ang kalabanan sang taga-Europa nagutman sang natapos ang inaway sang 1918. Sang 1923, wala na gid sing balor ang kuarta sang Germany. Anom ka tuig sang ulihi, nag-usmod ang ekonomiya sang bilog nga kalibutan. Kag sang ulihi, sang 1939, nagsugod ang ikaduha nga bug-os kalibutan nga inaway, nga sa pila ka paagi daw sugpon lang sang una nga bug-os kalibutan nga inaway. Ano ang rason sining sunodsunod nga kalalat-an?

TANDA SANG KATAPUSAN NGA MGA ADLAW

Ginapakita sang mga tagna sang Biblia ang rason sining mga hitabo sa kasaysayan, kag matuod gid ini sa Bug-os Kalibutan nga Inaway I. Gintagna ni Jesucristo ang tion nga “ang pungsod magatindog batok sa pungsod” kag may kakulang sang pagkaon kag mga balatian nga matabo sa kalibutan. (Mateo 24:3, 7; Lucas 21:10, 11) Ginsilingan niya ang iya mga disipulo nga ina nga mga kalamidad mangin tanda sang katapusan nga mga adlaw. Ginapakita sang tulun-an sang Bugna ang dugang pa nga detalye nga nagaangot sang kalalat-an sa duta sa inaway sa langit.—Basaha ang kahon nga “Inaway sa Duta kag Inaway sa Langit.”

Ginsambit man sini nga tulun-an sang Biblia ang apat ka manugkabayo, nga ginatawag kon kaisa nga apat ka manugkabayo sang Bugna. Ang tatlo sa sini nagapatuhoy sa kalamidad nga gintagna ni Jesus, ang inaway, gutom, kag balatian. (Basaha ang kahon nga “Nagasakay Na Gid Bala ang Apat ka Manugkabayo?”) Maathag nga ang una nga bug-os kalibutan nga inaway amo ang panugod sang tion sang pag-antos nga wala pa matapos. Kag ginbuyagyag sang Biblia nga si Satanas amo ang nag-umpisa sini tanan. (1 Juan 5:19) Mapunggan pa ayhan ang iya gahom?

Ginapasalig man kita sang tulun-an sang Bugna nga “malip-ot na lamang ang [tion ni Satanas].” (Bugna 12:12) Amo nga tuman gid ang iya kaakig kag nagapahanabo sia sang kalalat-an sa duta. Pero ang mga pag-antos nga makita naton, pamatuod lamang nga diutay na lang ang iya nabilin nga tion.

PAGLAGLAG SANG MGA BINUHATAN SANG YAWA

Talalupangdon gid nga hitabo sa kasaysayan ang Bug-os Kalibutan nga Inaway I. Nangin kabangdanan ini sang kabug-usan nga inaway, pagprotesta kag pagkadula sang pagsalig sa mga lider. Maathag man ini nga pamatuod nga gintagbong na si Satanas halin sa langit. (Bugna 12:9) Kag ining indi makita nga manuggahom sang kalibutan nanghikot subong mapintas nga diktador nga nakahibalo nga malip-ot na lang ang iya tion. Kon matapos na ining mga tion, matapos man ang mga kabudlayan nga nagsugod sang Bug-os Kalibutan nga Inaway I.

Suno sa tagna sang Biblia, makasalig kita nga si Jesucristo, ang aton Hari sa langit, ‘magalaglag sa mga binuhatan sang Yawa’ sa dili madugay. (1 Juan 3:8) Minilyon ang nagapangamuyo nga mag-abot ang Ginharian sang Dios. Ikaw man bala? Nagapasalamat kita nga bangod sini nga Ginharian makita sang mga matutom ang katumanan sang kabubut-on sang Dios sa duta kag indi ang kay Satanas. (Mateo 6:9, 10) Sa paggahom sang Ginharian sang Dios, wala na sing bug-os kalibutan nga inaway ukon sing bisan ano nga inaway! (Salmo 46:9) Hibalua ang parte sini nga Ginharian, kag magkabuhi sa tion nga may paghidait na sa bilog nga kalibutan!—Isaias 9:6, 7.