Naghalad sang Ila Kaugalingon sing Kinabubut-on—Sa Micronesia

SI Katherine nagdaku sa Estados Unidos, kag sa edad nga 16, ginbawtismuhan sia bilang isa sa mga Saksi ni Jehova. Serioso gid sia sa iya pagministeryo, pero diutay lang ang nagapamati sa ila teritoryo. Sia nagsiling: “Nabasa ko ang mga eksperiensia sang mga tawo nga nagapangamuyo sa Dios nga padalhan sila sang mabulig sa ila nga makilala sia. Pirme ko gid ginapangabay nga tani makakita man ako sing amo sina nga tawo, pero wala gid.”

Pagligad sang mga tinuig nga pagbantala sa amo nga teritoryo, naghunahuna si Katherine nga magsaylo sa lugar nga ang mga tawo interesado sa mensahe sang Ginharian. Pero, nagaduhaduha sia kon masarangan niya ini. Isa pa lang ka bes nga nagpalayo sia sa iya pamilya—kag duha lang ato ka semana—kag kada adlaw ginahidlaw gid sia sa ila. Pero nangibabaw ang iya handum nga mabatyagan ang kalipay sa pagbulig sa iban nga nagapangita kay Jehova. Pagkatapos mabinagbinag kon diin sia mahimo magsaylo, nagsulat sia sa sanga sa Guam kag nabaton niya ang mga impormasyon nga kinahanglanon. Sang Hulyo 2007, sa edad nga 26, nagsaylo si Katherine sa Saipan, isa ka isla sa Dagat Pasipiko, nga mga 10,000 ka kilometro halin sa ila balay. Ano ang resulta sang iya pagsaylo?

ANG SABAT SA IYA DUHA KA PANGAMUYO

Wala madugay pag-abot ni Katherine sa bag-o niya nga kongregasyon, nakilala niya si Doris, nga mga 45 anyos, kag nagbaton sing pagtuon sa Biblia. Sang natapos nila ang una nga tatlo ka kapitulo sa Ginatudlo sang Biblia, nabalaka si Katherine. “Maayo gid nga estudyante si Doris, kag indi ko gusto nga paslawon sia,” siling niya. “Wala pa ako makadumala sing regular nga pagtuon sa Biblia, kag pamatyag ko kinahanglan niya sing mas hamtong nga utod nga babayi nga magatuon sa iya, ukon mahimo sa isa nga kaedad lang niya.” Nangamuyo si Katherine kay Jehova nga buligan sia nga makakita sing utod nga babayi nga mahatagan niya sang iya estudyante sa Biblia. Dayon, nagdesisyon sia nga pahibaluon si Doris sa iya plano nga lain na ang magadumala sa iya sing pagtuon.

“Antes ko ini mahambal sa iya,” siling ni Katherine, “naghambal si Doris nga may gusto sia isugid sa akon nga problema. Pagkatapos ko pamati sa iya, ginsilingan ko sia kon paano ako ginbuligan ni Jehova sa amo man nga kahimtangan. Nagpasalamat sia sa akon.” Dayon ginsilingan ni Doris si Katherine: “Ginagamit ka ni Jehova para buligan ako. Sang adlaw nga nagkadto ka sa balay, inoras ko na nga ginabasa ang akon Biblia. Nagahibi ako, nga nagapangabay sa Dios nga padal-an niya ako sing mabulig sa akon nga mahangpan ang Biblia. Dayon nanuktok ka sa puertahan. Ginsabat gid ni Jehova ang akon pangamuyo!” Nagatulo ang luha ni Katherine samtang ginaistorya niya ini nga hitabo. Nagsiling sia: “Ang ginsiling ni Doris sabat sa akon pangamuyo. Ginpakita ni Jehova nga masarangan ko padayunon ang pagtuon.”

Nabawtismuhan si Doris sang 2010, kag nagadumala naman sia karon sing pila ka pagtuon sa Biblia. Si Katherine nagsiling: “Nagapasalamat gid ako nga natuman ang madugay ko na nga handum nga magbulig sa sinsero nga tawo nga mangin alagad ni Jehova!” Sa karon, malipayon nga nagaalagad si Katherine subong espesyal payunir sa isla sang Kosrae sa Pasipiko.

TATLO KA KABUDLAYAN—KON PAANO INI ATUBANGON

Sobra sa isa ka gatos ka kauturan nga naghalin sa iban nga pungsod (nagaedad sing 19 asta 79) ang nag-alagad sa Micronesia diin may mas daku nga kinahanglanon. Ang ginabatyag sining makugi nga manugpangabudlay makita sa ginpabutyag ni Erica, nga nagsaylo sa Guam sang 2006 sa edad nga 19. Sia nagsiling: “Makalilipay gid magpayunir sa teritoryo nga ang mga tawo uhaw sa kamatuoran. Nagapasalamat gid ako nga ginbuligan ako ni Jehova nga makigbahin sa sini nga sahi sang pag-alagad. Amo ini ang pinakamaayo nga pagkabuhi!” Sa karon, malipayon si Erica sa pag-alagad subong espesyal payunir sa Ebeye sa Marshall Islands. Siempre, may mga kabudlayan man ang pag-alagad sa iban nga pungsod. Binagbinagon naton ang tatlo sini, kag kon paano ini gin-atubang sang mga nagsaylo sa Micronesia.

Estilo sang pagkabuhi. Sang nag-abot ang 22 anyos nga si Simon sa Palau sang 2007, narealisar niya dayon nga tama ka gamay sang iya kita didto sangsa iya kita sa ila pungsod sa England. “Natun-an ko nga indi pagbaklon ang bisan ano lang nga gusto ko. Karon, ginapili ko na sing maayo ang pagkaon nga akon baklon, kag nagapangita sing mas barato. Kon may maguba, nagapangita ako sing segunda mano nga mga piyesa kag nagapabulig sa iban sa pagkay-o sini.” Ano ang epekto sa iya sang simple nga kabuhi? Si Simon nagsiling: “Nakabulig ini sa akon nga matun-an kon ano gid ang kinahanglanon kag kon paano ko mapaigo ang akon diutay nga kinitaan. Makapila ko gid mabatyagan ang pag-atipan ni Jehova. Sa pito ka tuig nga pag-alagad ko diri, may makaon gid ako kag matulugan.” Huo, ginasakdag ni Jehova ang mga nagapasimple sang ila kabuhi bangod gusto nila unahon ang Ginharian.—Mat. 6:32, 33.

Kahidlaw. Si Erica nagsiling: “Suod gid ako sa akon pamilya, kag nabalaka ako nga ang akon kahidlaw sa ila makaapektar sa akon pagministeryo.” Ano ang ginhimo niya para mahandaan ini? “Antes ako magsaylo, nagbasa ako sang mga artikulo sa Lalantawan parte sa kahidlaw sa pamilya. Ginhanda sini ang akon tagipusuon para maatubang ini nga problema. Sa isa ka artikulo, ginpasalig sang iloy ang iya anak nga atipanon sia ni Jehova, nga nagasiling, ‘Mas labaw pa ang pag-atipan ni Jehova sa imo sangsa pag-atipan ko.’ Napalig-on gid ako sa sini nga pasalig.” Si Hannah kag ang iya bana nga si Patrick, nagaalagad sa Majuro sa Marshall Islands. Naatubang ni Hannah ang kahidlaw sa iya pamilya paagi sa pagsentro sang iya atension sa mga kauturan sa ila kongregasyon. Sia nagsiling: “Pirme ko gid ginapasalamatan kay Jehova ang bug-os kalibutan nga paghiliutod bangod pamilya ko man sila. Kon indi paagi sa ila mahigugmaon nga bulig, indi man ako makaalagad sa lugar diin mas daku ang kinahanglanon.”

Pagpakig-abyan. “Pag-abot mo sa iban nga pungsod, lain gid ang tanan,” siling ni Simon. “Kon kaisa, nahidlaw ako maglahog nga naintiendihan sang tanan.” Si Erica nagsiling: “Sa umpisa, daw wala ako sing mga abyan, pero nakabulig ato sa akon nga dumdumon kon ano ang akon motibo sa pagsaylo. Nagsaylo ako indi para sa akon kaayuhan kundi para alagaron sing dugang si Jehova.” Nagsiling pa sia: “Sa pagligad sang tion, nakasapo ako sing maayo nga mga abyan, nga ginapabaloran ko gid.” Nanikasog gid si Simon nga magtuon sing Palauan, nga nakabulig sa iya nga “magpasangkad” sa mga kauturan didto. (2 Cor. 6:13) Ginpalangga sia sang mga kauturan bangod nanikasog sia nga tun-an ang lenguahe. Huo, kon ang mga nagsaylo kag lokal nga mga kauturan mag-updanay sa mga hilikuton, pareho sila nga magaani sing maayo nga pag-abyanay sa kongregasyon. Ano pa ang iban nga padya sang mga handa mag-alagad diin may mas daku nga kinahanglanon?

‘MAGAANI SING BUGANA’

Si apostol Pablo nagsiling: “Sia nga nagasab-ug sing bugana magaani man sing bugana.” (2 Cor. 9:6) Ang prinsipio sa sini maaplikar man sa mga nagapasangkad sang ila ministeryo. Ano nga mga bunga ang ‘ginaani nila sing bugana’ sa Micronesia?

Sa Micronesia, madamo pa sing kahigayunan nga makasugod sing mga pagtuon sa Biblia kag makita mismo kon paano ang mga indibiduwal nga nagatuon kag nagaaplikar sa kamatuoran sa Pulong sang Dios nagauswag sa espirituwal. Sanday Patrick kag Hannah nagabantala man sa Angaur, isa ka gamay nga isla nga may 320 ka pumuluyo. Pagligad sang duha ka bulan nga pagbantala didto, nakilala nila ang isa ka nagasolo nga iloy. Nagpasugot sia dayon nga magtuon sa Biblia, malipayon nga nagbaton sang kamatuoran, kag naghimo sing daku nga mga pagbag-o sa iya kabuhi. Si Hannah nagsiling: “Sa kada tapos sang amon pagtuon, samtang nagabiya kami sa ila balay sakay sa amon bisikleta, nagatulukay kami nga duha kag nagasiling: ‘Salamat Jehova!’” Si Hannah nagdugang: “Nahibaluan namon nga buyukon ni Jehova ini nga babayi sa iya sa ano man nga paagi, pero bangod sa pag-alagad diin may mas daku nga kinahanglanon, nasapwan namon kag nabuligan ining tulad-karnero nga makilala si Jehova. Isa ini sa pinakamakalilipay nga eksperiensia sa amon kabuhi!” Subong sang ginsiling ni Erica, “kon mabuligan mo ang isa ka tawo nga makilala si Jehova, indi mo mapaathag ang imo kalipay!”

MAKABULIG KA BALA?

Sa madamo nga lugar, daku pa ang kinahanglanon sa mga manugbantala sang Ginharian. Puede ka man bala makasaylo sa mga lugar nga mas daku ang kinahanglanon? Mangamuyo kay Jehova nga pabakuron ang imo handum nga pasangkaron ang imo ministeryo. Binagbinaga ini upod sa mga gulang sa kongregasyon, sa manugtatap sang sirkito, ukon sa mga nagaalagad sa mga lugar nga may mas daku nga kinahanglanon. Kon nagaplano ka na, sulati ang sanga nga nagatatap sa teritoryo nga gusto mo buligan, kag mangayo sing dugang nga impormasyon.a Mahimo nga mangin isa ka man sa linibo ka kauturan—bata kag tigulang, minyo kag di-minyo—nga naghalad sang ila kaugalingon sing kinabubut-on kag natilawan ang kalipay sa ‘pag-ani sing bugana.’

a Tan-awa ang artikulo nga ‘Makatabok Ka Bala sa Macedonia’? sa Agosto 2011 nga Ang Aton Ministeryo sa Ginharian.

Paano Makahatag sing Paghanas?

MAY Cristianong mga gulang nga nag-alagad sa iban nga pungsod nga may tinuig na nga eksperiensia sa pagtatap sa panong. Paano ini nga mga utod makahatag sing paghanas sa mga kongregasyon?

Sanday Richard kag Joel

Si Richard, 65 anyos, nagsaylo sa Guam halin sa Estados Unidos sang 2010. Nagsiling sia nga ang paghatag sing sinsero nga komendasyon isa sa pinakaimportante nga aspekto sang paghanas. Si Richard nagsiling pa gid: “Ang maayo nga paagi sa paghanas sa iban amo ang pag-upod sa ila sa ministeryo. Makita kag mabatian sang mga kauturan kon paano mo ginatudluan ang iban parte kay Jehova. Dugang pa, ang inyo pag-updanay nagapalig-on sang gugma kag paghiusa.”

Sanday Byron kag Greg

Si Greg, 60 anyos, nagaistar sa Saipan halin pa sang 2010. Sia nagsiling: “Ang mga gulang nga nagsaylo diri nagahatag sing daku nga atension sa tagsa ka lokal nga mga utod. Nangin suod namon sila nga mga abyan kag may pagsalig kami kag pagtahod sa isa kag isa.” Nagsiling pa sia: “Indi lang sila ang nahanas. Madamo man kami sing natun-an sa lokal nga mga kauturan.”

Sanday Mike kag Alice

Si Mike, 60 anyos, upod sa iya asawa nga si Alice, nagaalagad sa isa ka lugar sa Pasipiko sa sobra na 20 ka tuig. Paano niya ginhanas ang iban? “Paagi sa pagpakita sing maayo nga halimbawa sa pagsunod sa direksion sang organisasyon ni Jehova. Ginasigurado ko nga nahangpan sang akon ginahanas ini nga direksion. Ginapanikasugan ko nga iaplikar ang akon ginatudlo, mangin mapinasensiahon, kag pirme maghatag sing komendasyon.” Nagsiling pa gid si Mike: “Kon magsaylo ka sa iban nga lugar, dapat dumdumon mo nga sa masami may madamo nga paagi para mahimo ang isa ka butang.”

Ano ang ginabatyag sang mga kauturan nga taga-Micronesia sa paghanas nga ila ginabaton? Si Joel, 21 anyos, nga nagaistar sa Guam nagsiling: “Ginapakita sang mga gulang nga may pagsalig sila sa akon paagi sa paghatag sa akon sing mga asaynment. Nakabulig ini sa akon nga makita nga may bilidhon ako nga butang nga mahatag sa pag-alagad kay Jehova.” Si Byron, nga 31 anyos, nga nagaistar sa Saipan, nagsiling: “Paagi sa ila kakugi sa ministeryo kag gugma sa mga karnero, ginbuligan ako sang mga gulang nga magkonsentrar sa espirituwal nga mga butang imbes nga maghingamo nga magmanggaranon.” Nagsiling pa sia: “Pagpakamaayo gid nga nakaupod namon ining eksperiensiado nga mga utod.”