SABAT SA MGA PAMANGKOT SA BIBLIA
Makabulig bala sa aton ang mga anghel?
Ginbuligan sadto sang mga anghel ang matutom nga alagad sang Dios nga si Daniel, kag ginabuligan man nila subong ang mga tawo nga makabenepisyo sa maayong balita
Madugay na nga gintuga ni Jehova nga Dios ang minilyon ka anghel antes ang mga tawo. (Job 38:4, 7) Ang mga anghel gamhanan nga espiritu nga mga tinuga nga nagaalagad sa Dios, nga kon kaisa ginapadala niya para maggiya kag mag-amlig sa iya mga alagad diri sa duta. (Salmo 91:10, 11) Subong, ginabuligan sang mga anghel ang mga tawo nga makabenepisyo sa maayong balita nga ginabantala sang mga sumulunod ni Jesus.—Basaha ang Bugna 14:6, 7.
Dapat bala kita mangamuyo sa mga anghel para buligan kita? Indi. Ang pangamuyo isa ka buhat sang pagsimba nga para lamang sa Dios. (Bugna 19:10) Bangod ang mga anghel alagad sang Dios, nagapati lang sila sa Iya mga sugo, indi sa mga tawo. Gani, dapat sa Dios lang kita mangamuyo paagi kay Jesus.—Basaha ang Salmo 103:20, 21; Mateo 26:53.
May malain bala nga mga anghel?
Pareho sa mga tawo, gintuga man ang mga anghel nga may kahilwayan sa pagpili sang husto ukon sala. Makapasubo nga madamo nga anghel ang nagrebelde sa Dios. (2 Pedro 2:4) Ang una sa ila amo si Satanas; ang iban nagsunod man kag nangin mga demonyo. Sang ulihi, gintabog sa langit si Satanas kag ang iya mga demonyo, kag gintagbong sila sa duta.—Basaha ang Bugna 12:7-9.
Sugod sang 1914, gulpi nga naglapnag ang kalautan kag kasingki nga nagapatimaan nga malapit na lang laglagon sang Dios si Satanas kag ang mga demonyo. Dayon ipasag-uli sang Dios ang duta sa matahom nga kahimtangan sini.—Basaha ang Bugna 12:12; 21:3, 4.