SABAT SA MGA PAMANGKOT SA BIBLIA
Ngaa mangamuyo nga magkari ang Ginharian sang Dios?
Luyag mo bala nga makahibalo sing dugang pa parte sa Ginharian sang Dios kag sa pagahimuon sini?
Ang Ginharian sang Dios isa ka gobierno sa langit. Ginsilingan ni Jesus ang iya mga sumulunod nga ipangamuyo ini nga magkari kay ipasag-uli sini ang pagkamatarong kag paghidait sa duta. Wala sing gobierno sang tawo ang makadula sing bug-os sang kasingki, inhustisya, ukon balatian, kundi ang Ginharian sang Dios lamang. Ginpili sang Dios ang iya Anak nga si Jesus nga mangin Hari sini. Nagpili man si Jehova sang isa ka grupo sang mga sumulunod ni Jesus nga mangin kaupod niya sa paggahom.—Basaha ang Lucas 11:2; 22:28-30.
Sa indi madugay, dulaon sang Ginharian sang Dios ang tanan nga nagapamatok sa paggahom sang Dios. Gani ang pangamuyo nga magkari ang Ginharian sang Dios isa ka pangabay nga buslan sang gobierno sang Dios ang tanan nga gobierno sang tawo.—Basaha ang Daniel 7:13, 14; Bugna 11:15, 18.
Ngaa makabenepisyo ang mga tawo sa Ginharian sang Dios?
Bagay gid si Jesus nga mangin Hari kay maluluy-on sia. Bilang Anak sang Dios, may gahom man sia nga magbulig sa mga nagapangayo sang bulig sang Dios.—Basaha ang Salmo 72:8, 12-14.
Pakamaayuhon sang Ginharian sang Dios ang tanan nga nagapangamuyo sing sinsero nga magkari ini kag ang mga nagakabuhi nahisuno sa kabubut-on sang Dios. Indi ka gid maghinulsol kon tun-an mo ang ginasiling sang Biblia parte sa Ginharian sang Dios.—Basaha ang Lucas 18:16, 17; Juan 4:23.