TOPIKO SA KOBER | MATUOD BALA SI SATANAS?
Nagaluntad Bala si Satanas?
Isa ka estatwa sa Madrid, Spain, nga nagalaragway kay Satanas subong malaut nga anghel
“Nagdaku ako sa El Salvador. Kon indi ako magpati kay Nanay nagasiling sia, ‘Kuhaon ka gid sang Yawa!’ Kag masabat ako, ‘Pakadtua sia diri a!’ Nagapati ako sa Dios apang indi kay Satanas.”—ROGELIO.
Nagaugyon ka bala sa pamatan-on nga si Rogelio? Diin sa masunod nga mga opinyon ang ginapatihan mo?
Si Satanas indi matuod; isa lamang sia ka simbulo sang kalainan.
Si Satanas nagaluntad, apang daw wala sia labot sa mga tawo.
Si Satanas isa ka gamhanan nga espiritu nga tinuga nga may daku nga impluwensia sa mga tawo.
Ang tagsa ka pagtamod may sumalakdag, mahimo minilyon pa gani. Importante bala kon diin sa sini ang husto? Kon wala nagaluntad si Satanas, ang mga nagapati nga matuod sia napatalang. Kon nagaluntad sia apang wala labot sa mga tawo, wala sing basihan ang ila kahadlok kag paghalong. Pero kon manugpatalang sia, mas makatalagam pa sia sangsa ginahunahuna sang kalabanan.
Binagbinagon naton kon ano ang sabat sang Balaan nga Kasulatan sa sini nga mga pamangkot: Ano ukon sin-o si Satanas—simbulo bala sia sang kalainan ukon espiritu nga persona? Kon persona sia, mahalitan ka bala niya? Kon huo, paano mo maamligan ang imo kaugalingon?