Ginatuman Mo Bala ang Dios?

“Bisan ano ang gusto mo, ihambal lang kay malipay ako sa paghimo sini.” Mahimo nga indi mo ini mahambal sa indi mo kilala ukon sa bag-o mo pa lang nakilala. Pero mahambal mo gid ini sa imo pinalangga nga abyan. Natural lang sa mag-abyan nga magbuligay.

Ginapakita sang Biblia nga pirme ginahimo ni Jehova ang makapahalipay sa mga nagasimba sa iya. Halimbawa, si Hari David nga may suod nga kaangtanan sa Dios, nagsiling: “O GINOO, nga akon Dios, madamu ang makatilingala nga buhat nga imo nahimo, kag ang imo mga hunahuna ayon sa amon . . . labi pa sila kadamu sa maisipan.” (Salmo 40:5) Indi lamang amo sina ang ginahimo ni Jehova, ginaamanan man niya bisan ang mga wala pa nakakilala sa iya, “nga nagahatag sang bugana nga kalan-on kag nagapuno sang [ila] tagipusuon sang kasadya.”​—Binuhatan 14:17.

Nalipay si Jehova sa pag-aman sa iban, gani rasonable lang nga magpaabot sia nga himuon sang gusto nga mangin abyan niya ang mga butang nga ‘nagapasadya sang iya tagipusuon.’ (Hulubaton 27:11) Pero ano ang mahimo mo para pahamut-an ang Dios? Ang Biblia nagasabat: “Indi pagkalimti ang paghimo sing maayo kag ang pagpaambit sing mga butang sa iban, kay nahamuot gid ang Dios sa sini nga mga halad.” (Hebreo 13:16) Nagakahulugan bala ini nga ang paghimo sang maayo sa iban amo lang ang kinahanglan para mapahamut-an si Jehova?

“Kon wala sing pagtuo imposible nga mapahamut-an gid sia.” (Hebreo 11:6) Talalupangdon nga sa tapos lang “si Abraham nagtuo kay Jehova” kag “gintawag sia nga ‘abyan ni Jehova.’” (Santiago 2:23) Ginpadaku man ni Jesucristo nga kinahanglan naton ‘magtuo sa Dios’ agod pakamaayuhon kita. (Juan 14:1) Gani, paano naton matigayon ang pagtuo nga gusto sang Dios sa mga ginabuyok niya sa iya? Una, paagi sa regular nga pagtuon sa iya Pulong, ang Biblia. Sa paghimo sini, makatigayon ka sing “sibu nga ihibalo tuhoy sa iya kabubut-on,” gani mahibaluan mo kon paano mo “pahamut-an sia sing bug-os.” Kon makilala mo pa gid si Jehova kag ginahimo ang iya ginapatuman, ang imo pagtuo labi nga magabakod kag mangin suod sa iya.​—Colosas 1:9, 10.