Tuguti si Jehova nga Magpabakod kag Magbantay sang Inyo Pag-asawahay

1, 2. (a) Ngaa nawasi sang 24,000 nga Israelinhon ang dalayawon nga mga pagpakamaayo? (b) Ngaa importante sa aton ina nga hitabo?

WALA madugay antes magsulod ang Israel sa Ginsaad nga Duta, linibo ka lalaki ang nakighilawas “sa babaying mga anak sang Moab.” Subong resulta, 24,000 ang ginlaglag ni Jehova. Handurawa​—malapit na gid ang mga Israelinhon sa katumanan sang ila madugay na ginahulat nga palanublion, pero nawasi nila ang dalayawon nga mga pagpakamaayo bangod nagpadala sila sa pagsulay.​—Num. 25:​1-5, 9.

² Inang malaglagon nga hitabo ginrekord “subong paandam sa aton nga naabtan sang katapusan sang mga sistema sang mga butang.” (1 Cor. 10:​6-​11) Sa ulihi nga bahin sining “katapusan nga mga adlaw,” ang mga alagad sang Dios malapit na gid sa matarong nga bag-o nga kalibutan. (2 Tim. 3:1; 2 Ped. 3:​13) Apang, makapasubo nga ang pila sa mga sumilimba ni Jehova wala nagbantay. Nasiod sila sang imoralidad kag nag-antos sang mapait nga mga resulta sini. Mahimo pa gani nila madula ang dayon nga mga pagpakamaayo.

3. Ngaa kinahanglan sang mga mag-asawa ang giya kag proteksion ni Jehova? (Tan-awa ang piktyur sa umpisa sini nga artikulo.)

³ Bangod lapnag karon ang imoralidad, kinahanglan sang mga mag-asawa ang giya kag proteksion ni Jehova agod magmadinalag-on ang ila mga panikasog nga bantayan ang ila pag-asawahay. (Basaha ang Salmo 127:1.) Binagbinagon naton kon paano mapabakod sang mag-asawa ang ila pag-asawahay paagi sa pagbantay sang ila tagipusuon, pagpakigsuod sa Dios, pagsuklob sang bag-o nga personalidad, paghupot sing mapuslanon nga komunikasyon, kag paghatag sa kon ano ang natungod sa mag-asawa.

BANTAYI ANG IMO TAGIPUSUON

4. Ngaa ang pila ka Cristiano nasulay sa paghimo sing imoralidad?

⁴ Paano mahimo mabuyok ang isa ka Cristiano sa imoralidad? Ining makahalalit nga dalanon sang imoralidad masami nga nagasugod sa pagtulok. Si Jesus nagpaathag: “Ang tagsatagsa nga padayon nga nagatulok sa isa ka babayi nga may kaibog sa iya nakapanghilahi na sa iya sa tagipusuon niya.” (Mat. 5:​27, 28; 2 Ped. 2:​14) Madamo nga Cristiano ang nakasala bangod ginpaluya nila ang ila moral nga mga pangamlig paagi sa pagtan-aw sing pornograpiya, pagbasa sing erotiko nga mga literatura, ukon pagtan-aw sing binastos nga materyal sa Internet. Ang iban nagatan-aw sing mga pelikula, mga palaguaon sa entablado, ukon mga programa sa telebisyon nga nagaunod sing seksuwal nga mga buhat. Ang pila nagasulod sa mga naytklab kag nagatan-aw sing mga strip show ukon nagakadto sa mga parlor para magpamasahe nga nagapukaw sang ila gana sa sekso.

5. Ngaa dapat naton bantayan ang aton tagipusuon?

⁵ Ang pila nasulay bangod nangita sila sing atension sa indi nila tiayon. Sa isa ka kalibutan nga wala sing pagpugong kag nagalambo ang tagsa ka sahi sang imoralidad, mahapos lang magtubo sa malimbungon kag naluyahan nga tagipusuon ang romantiko nga balatyagon sa isa nga indi niya tiayon. (Basaha ang Jeremias 17:​9, 10.) Si Jesus nagsiling: “Sa tagipusuon nagagikan ang malaut nga pangatarungan, pagpatay, panghilahi, pagpakighilawas.”​—Mat. 15:19.

6, 7. (a) Sa ano nga makasasala nga dalanon ginadala kita sang malimbungon nga tagipusuon? (b) Paano malikawan ang imoralidad?

⁶ Kon manggamot na ang malain nga kailigbon sa malimbungon nga tagipusuon, ang duha ka tawo nga nanamian sa isa kag isa mahimo nga nagaistoryahanay na sang mga butang nga para lang sa mag-asawa. Sa ulihi, mas madamo na sila sing kahigayunan nga magkaupod, kag ang daw wala ginahungod nga pag-updanay nangin mas masunson. Samtang nagabaskog ang ila mga balatyagon, nagaluya ang ila moral nga mga pangamlig. Samtang nagadugay ang ila paglakat sa makasasala nga dalanon, mas mabudlay na ini untatan, bisan pa nahibaluan nila nga sala ang ila ginahimo.​—Hulu. 7:​21, 22.

⁷ Ang espirituwal nga mga pamakod amat-amat nga nagakarumpag samtang ang sayop nga mga kailigbon kag panghambal nagaresulta sa pag-uyat sing mga kamot, paghalok, pagdalo, paghapulas, kag iban pa nga pagpabutyag sing pagpalangga, nga dapat lang ihatag sa ila tiayon. Sa katapusan, ‘ginaganyat sila kag ginahaylo sang ila kaugalingon nga kailigbon.’ Kon manamkon na ang kailigbon, “nagabun-ag [ini] sang sala”​—sa sini nga kaso, sing seksuwal nga imoralidad. (Sant. 1:​14, 15) Makahalalit gid ini! Malikawan kuntani ini kon gintugutan nila nga duha si Jehova sa pagpabakod sang ila pagtahod sa pagkasagrado sang pag-asawahay. Pero paano?

PADAYON NGA MANGIN SUOD SA DIOS

8. Paano ang pagpakig-abyan kay Jehova nagaamlig sa moral?

⁸ Basaha ang Salmo 97:10. Ang pagpakig-abyan kay Jehova importante para maamligan kita sa moral. Samtang ginatun-an naton ang maayo nga mga kinaiya sang Dios kag ginatinguhaan nga ‘mangin manug-ilog sa Dios, subong mga anak nga hinigugma, kag padayon nga maglakat sa gugma,’ mangin mabakod kita sa pagsikway sang ‘pagpakighilawas kag sang tanan nga sahi sang kahigkuan.’ (Efe. 5:​1-4) Bangod nahibaluan sang mag-asawa nga “hukman sang Dios ang mga makihilawason kag mga makihilahion,” ginapanikasugan nila nga mangin dungganon kag wala sing kasawayan ang ila pag-asawahay.​—Heb. 13:4.

9. (a) Paano napamatukan ni Jose ang imoral nga pagsulay? (b) Ano ang aton matun-an sa halimbawa ni Jose?

⁹ Ang pila sa matutom nga mga alagad sang Dios nagpaluya sang ila mga pangamlig sa moral paagi sa pagpakig-upod sa indi Saksi nga mga katrabaho sa tapos sang obra. Bisan sa tion sang trabaho, mahimo mag-utwas ang pagsulay. Sa trabaho nahibaluan sang guapo kag pamatan-on nga si Jose nga ang asawa sang iya amo naluyag gid sa iya. Adlaw-adlaw niya nga ginsulay si Jose. Sang ulihi, “ginbuyotan niya sia sa iya bayo, nga nagasiling, ‘Hulid ka sa akon!’ ” Pero nakapalagyo si Jose gikan sa iya. Ano ang nagbulig kay Jose nga mahuptan ang iya espirituwal nga mga pangamlig sa sina nga pagsulay? Ang iya malig-on nga pamat-od nga indi paggub-on ang iya kaangtanan sa Dios amo ang nag-amlig sang iya kaputli kag integridad. Bangod sang iya malig-on nga panindugan, nadula niya ang iya trabaho kag indi makatarunganon nga ginpriso, pero ginpakamaayo sia ni Jehova. (Gen. 39:​1-​12; 41:​38-​43) Sa trabaho man ukon bisan diin, kinahanglan likawan sang mga Cristiano nga ibutang ang ila kaugalingon sa makasululay nga sitwasyon upod sa iban nga indi nila tiayon.

ISUKLOB ANG BAG-O NGA PERSONALIDAD

10. Ano nga pangamlig sa moral ang mahatag sang bag-o nga personalidad?

¹⁰ Bangod ang bag-o nga personalidad “gintuga suno sa kabubut-on sang Dios sa matuod nga pagkamatarong kag pagkamainunungon,” importante ini para mapabakod ang espirituwalidad sang mag-asawa. (Efe. 4:​24) Ang mga nagsuklob sang bag-o nga personalidad ‘nagpatay’ sang bahin sang ila lawas “may kaangtanan sa pagpakighilawas, kahigkuan, kailigbon sa sekso, makahalalit nga handum, kag pagkamahamkunon.” (Basaha ang Colosas 3:​5, 6.) Ang tinaga nga “patya” nagapakita nga dapat kita maghimo sing malig-on nga mga tikang para mabatuan ang imoral nga mga kailigbon. Likawan naton ang bisan ano nga butang nga makapukaw sa sekso sa isa nga indi naton tiayon. (Job 31:1) Samtang ginapahisuno naton ang aton kabuhi sa kabubut-on sang Dios, matun-an naton nga ‘magkangil-ad sa malaut’ kag “magpanguyapot sing malig-on sa maayo.”​—Roma 12:​2, 9.

11. Paano ang bag-o nga personalidad magapabakod sa pag-asawahay?

¹¹ Ang bag-o nga personalidad nagapakita sang “larawan sang Isa nga nagtuga sini,” si Jehova mismo. (Col. 3:​10) Pakamaayuhon gid ang mag-asawa kon pabakuron nila ang ila mga pangamlig sa moral paagi sa pagsuklob sang “mapinalanggaon nga balatyagon nga may kaawa, kaayo, pagpaubos sang hunahuna, kalulo, kag pagkamapinasensiahon”! (Col. 3:​12) Matigayon man nila ang paghiusa subong mag-asawa kon ‘tugutan nila ang paghidait ni Cristo nga maggahom sa ila tagipusuon.’ (Col. 3:​15) Makapaladya gid sa mag-asawa nga ‘magpakita sang mapinalanggaon nga balatyagon sa isa kag isa’! Nalipay sila sa ‘pagpanguna’ sa “pagpadungog sa isa kag isa.”​—Roma 12:10.

12. Ano nga mga kinaiya ang ginakabig mo nga importante sa malipayon nga pag-asawahay?

¹² Sang ginpamangkot kon ano nga mga kinaiya ang nakabulig para mangin malipayon ang ila pag-asawahay, si Sid nagsiling: “Ang gugma amo ang panguna nga kinaiya nga pirme namon ginapakita. Kag nakita man namon nga importante gid ang kalulo.” Nagaugyon sa sini ang iya asawa nga si Sonja, kag nagsiling: “Ang kaayo importante gid nga kinaiya. Kag ginapanikasugan man namon nga ipakita ang pagkamapainubuson bisan indi ini pirme mahapos.”

HUPTI ANG MAPUSLANON NGA KOMUNIKASYON

13. Ano ang importante sa mabakod nga pag-asawahay, kag ngaa?

¹³ Ang mainayuhon nga pulong importante gid sa malig-on nga pag-asawahay. Makapasubo kon mas matinahuron pa makig-istorya ang mga mag-asawa sa mga indi nila kilala ukon sa ila pa gani mga hinuptanan sangsa ila mga tiayon! Kon ang mag-asawa magpabutyag sing “paghinakit kag kaakig kag kasingkal kag sininggitanay kag nagapakalain nga hambal,” ginahalitan nila ang espirituwal nga mga pangamlig sang ila pag-asawahay. (Efe. 4:​31) Imbes nga paluyahon ang ila pag-asawahay paagi sa pirme pagpakanubo ukon masakit nga mga halambalanon, kinahanglan pabakuron sang mga mag-asawa ang ila relasyon paagi sa mainayuhon, mapinalanggaon, kag mainawaon nga mga hambal.​—Efe. 4:​32.

14. Ano nga mga buhat ang maalamon nga likawan naton?

¹⁴ Ang Biblia nagasiling nga may “tion sa paghipos.” (Man. 3:7) Wala ini nagapahangop nga indi naton pagsapakon ang aton tiayon, kay balagbag ini sa komunikasyon. “Sa sini nga mga kahimtangan,” siling sang asawa sa Germany, “ang paghipos makapasakit sa imo tiayon.” Nagsiling pa gid sia: “Bisan pa indi pirme mahapos mangin kalmado kon nagalainay kamo, indi maayo nga ipaupok dayon ini. Dayon makahambal ka ukon makahimo sing butang nga makapasakit sa imo tiayon, kag magapalala lang ini sang kahimtangan.” Indi gid masolbar sang mag-asawa ang ila mga problema paagi sa pagsinggitanay ukon indi pagsapakanay. Sa baylo, mapabakod nila ang ila pag-asawahay kon solbaron nila gilayon ang ila indi paghangpanay kag indi ini pagbaisan.

15. Paano mapalig-on sang maayo nga komunikasyon ang pag-asawahay?

¹⁵ Ang pag-asawahay nagabakod kon nagahatag sing tion ang mga mag-asawa para istoryahan ang ila mga balatyagon kag mga opinyon. Ang paagi sang aton paghambal pareho ka importante sa kon ano ang aton ginahambal. Gani bisan pa sa mabudlay nga mga sitwasyon, tinguhai nga mangin mainayuhon sa imo ginahambal, sa tono man sang imo tingog kag sa imo ginasiling. Paagi sini mangin mahapos para sa imo tiayon nga mamati sa imo. (Basaha ang Colosas 4:6.) Ang maayo nga komunikasyon magapalig-on pa gid sa pag-asawahay, paagi sa paghambal sang “bisan anong pinamulong nga maayo para sa pagpabakod suno sa kinahanglanon, agod mahatag sini ang maayo” sa ila mga tiayon.​—Efe. 4:​29.

IHATAG SANG MAG-ASAWA ANG NATUNGOD SA ISA KAG ISA

16, 17. Ngaa importante nga mangin sensitibo ang mga mag-asawa sa emosyonal kag seksuwal nga kinahanglanon sang isa kag isa?

¹⁶ Mapabakod man sang mag-asawa ang ila pag-asawahay kon ginauna nila ang personal nga kaayuhan sang ila tiayon sangsa ila. (Fil. 2:​3, 4) Kinahanglan mangin sensitibo ang mag-asawa sa emosyonal kag seksuwal nga kinahanglanon sang ila tiayon.​—Basaha ang 1 Corinto 7:​3, 4.

¹⁷ Makapasubo nga ang pila ka mag-asawa wala na nagaangga ukon wala na nagapakighirop sa ila tiayon, kag ginakabig sang pila ka lalaki nga kaluyahon ang pagpakita sing pagpalangga. Ang Biblia nagasiling: “Kamo nga mga bana dapat magtinguha nga hangpon ang inyo mga asawa.” (1 Ped. 3:​7, Phillips) Kinahanglan mahangpan sang bana nga ang natungod sa mag-asawa indi lang pisikal nga paghirupay. Ang asawa mas malipayon sa ila relasyon kon ang bana mahigugmaon kag mapinalanggaon indi lang sa tion sang ila paghirupay. Kon magpakita sila nga duha sing mapinalanggaon nga konsiderasyon, mas mahatag nila sing nagakaigo ang ila emosyonal kag pisikal nga mga kinahanglanon.

18. Paano mapabakod sang mag-asawa ang ila relasyon?

¹⁸ Bisan pa wala sing rason nga mangin indi matutom sa tiayon, ang kakulang sing pagpalangga mahimo magresulta nga ang tiayon mangita sang iban nga magapalangga sa ila. (Hulu. 5:​18; Man. 9:9) Gani ang Biblia nagpalig-on sa mga mag-asawa: “Indi ini pag-idingot sa isa kag isa [ang natungod sa mag-asawa], luwas kon pareho nga ginkasugtan sa sulod sang gintalana nga tion.” Ngaa? “Agod indi kamo padayon nga sulayon ni Satanas bangod wala kamo sing pagpugong sa kaugalingon.” (1 Cor. 7:5) Makapasubo gid kon tugutan sang mag-asawa si Satanas nga hingalitan ang ila ‘wala sing pagpugong’ kag magpadala ang isa sa ila sa pagsulay kag makapanghilahi! Sa kabaliskaran, kon ang kada tiayon mangita ‘indi sang iya kaugalingon nga kaayuhan, kundi sang iya sang iban nga tawo’ kag ihatag ang natungod sa mag-asawa subong pagpabutyag sang gugma imbes nga napilitan lamang, ang pagpalangga magapabakod sa relasyon sang mag-asawa.​—1 Cor. 10:24.

PADAYON NGA BANTAYI ANG INYO PAG-ASAWAHAY

19. Ano ang determinado naton nga himuon, kag ngaa?

¹⁹ Yara na kita sa ganhaan sang matarong nga bag-o nga duta. Gani ang pagpadala sa undanon nga mga kailigbon mahimo nga makahalit sa aton, pareho sa 24,000 ka Israelinhon sa Kapatagan sang Moab. Sa tapos malaragway inang makahuluya kag malain nga hitabo, ang Pulong sang Dios nagpaandam: “Ang nagahunahuna nga nagatindog sia mag-andam nga indi sia mapukan.” (1 Cor. 10:12) Gani, importante gid nga pabakuron naton ang aton pag-asawahay paagi sa pagpabilin nga matutom sa aton langitnon nga Amay kag sa aton tiayon. (Mat. 19:​5, 6) Karon na gid ang tion nga kinahanglan naton “himuon ang aton bug-os nga masarangan agod sa katapusan masapwan kita nga wala sing higko kag wala sing depekto kag sa paghidait.”​—2 Ped. 3:​13, 14.