TOPIKO SA KOBER | LUYAG MO BALA TUN-AN ANG BIBLIA?

Kahimusan sa Pagtuon sing Biblia Para sa Tanan

Kilala gid ang mga Saksi ni Jehova sa ila pagbantala. Apang nahibaluan bala ninyo nga nagadumala man kami sing mga pagtuon sa Biblia sa bug-os nga kalibutan?

Lalaki nga nagatuon sing Biblia sa iya ulubrahan

Sang 2014, sobra 8,000,000 ka Saksi sa 240 ka kadutaan ang nagadumala sing halos 9,500,000 ka pagtuon sa Biblia kada bulan.a Ang matuod, ang kadamuon sang mga tawo nga nagatuon sing Biblia upod sa amon madamo pa sa tagsa ka populasyon sang mga 140 ka pungsod!

Agod mahimo ini nga pagpanudlo, ang mga Saksi ni Jehova nagabalhag kada tuig sing halos isa ka bilyon kag tunga nga Biblia, libro, magasin, kag iban pa nga publikasyon nga bulig sa pagtuon sing Biblia—sa mga 700 ka lenguahe! Bangod sining indi matupungan nga panikasog sa pagbalhag, natun-an sang mga tawo ang Biblia sa lenguahe nga gusto nila.

“Sang nag-eskwela ako wala ako nanamian magtuon, apang ini nga pagtuon makalilipay gid. Kag nalugpayan gid ako sang mga natun-an ko!”—Katlego, South Africa.

“Nasabat sini nga pagtuon ang tanan ko nga pamangkot kag ang madamo pa.”—Bertha, Mexico.

“Ang pagtuon sing Biblia ginhiwat sa akon balay kag sa oras nga kombeniente sa akon. Nagustuhan ko gid ini!”—Eziquiel, Brazil.

“Kon kaisa, ang mga leksion nagalawig sing 15 tubtob 30 minutos—kon kaisa naman mas malawig—kon ano ang kombeniente sa akon.”—Viniana, Australia.

“Ang pagtuon wala sing bayad —dalayawon gid ini!”—Aimé, Benin.

“Ang nagatudlo sing Biblia sa akon mapinasensiahon gid kag mabuot. Nag-amigahay kami.”—Karen, Northern Ireland.

“Madamo nga tawo ang nagtuon sing Biblia kag wala man nangin Saksi.”—Denton, England.

SABAT SA PIRME GINAPAMANGKOT PARTE SA ATON KAHIMUSAN SA PAGTUON SING BIBLIA

Paano ginatun-an ang Biblia?

May mga topiko nga ginapili kag ginausisa ang mga teksto sa Biblia may kaangtanan sa sina nga topiko. Halimbawa, ginasabat sang Biblia ang mga pamangkot, subong sini: Sin-o ang Dios? Ano sia nga sahi sang persona? May ngalan bala sia? Diin sia nagapuyo? Mahimo bala kita mangin suod sa iya? Ang hangkat amo ang paghibalo kon diin pangitaon sa Biblia ang mga sabat.

Agod buligan ang mga tawo nga makita ang mga sabat, masami nga nagagamit kami sing 224 ka pahina nga libro nga Ano Gid ang Ginatudlo sang Biblia?b Ini nga libro pinasahi nga gindesinyo agod buligan ang mga tawo nga mahangpan ang sadsaran nga mga panudlo sang Biblia. May mga leksion ini tuhoy sa Dios, kay Jesucristo, sa pag-antos sang mga tawo, sa pagkabanhaw, sa pangamuyo, kag madamo pa.

San-o kag diin ginahiwat ang pagtuon?

Ang pagtuon ginahiwat sa oras kag lugar nga kombeniente sa imo.

Daw ano kalawig ang kada pagtuon?

Madamo nga tawo ang nagatuon sing Biblia sing mga isa ka oras kada semana. Apang mahimo bulubag-uhon ang kalawigon sang pagtuon. Pasibuon namon ini sa imo iskedyul. Ang iban nagatuon sing 10 ukon 15 minutos lang kada semana.

Pila ang bayad sa sini nga pagtuon?

Ang pagtuon kag ang mga publikasyon nga ginagamit sa pagtuon wala sing bayad. Nahisuno ini sa ginsiling ni Jesus sa iya mga disipulo: “Nakabaton kamo nga wala sing bayad, gani maghatag kamo nga wala sing bayad.”—Mateo 10:8.

Daw ano kadugay tubtob matapos ang pagtuon?

Ang kadugayon sang pagtuon nagadepende sa imo. Ang libro nga Ano Gid ang Ginatudlo sang Biblia? may 19 ka leksion. Mahimo mo tun-an ang bisan ano ukon ang tanan nga leksion suno sa kadasigon nga luyag mo.

Kinahanglan bala nga mangin isa ako ka Saksi ni Jehova?

Indi man. Nahibaluan namon nga ang kada tawo may kinamatarong sa pagpili kon ano ang iya patihan. Apang ang mga tawo nga may sadsaran nga ihibalo sa Biblia makadesisyon suno sa nahibaluan nila.

Diin ako makakuha sing dugang nga impormasyon?

Makita sa Web site nga jw.org/hil ang sibu nga impormasyon tuhoy sa mga pagpati kag mga hilikuton sang mga Saksi ni Jehova.

Paano ako makapangabay sing pagtuon sa Biblia?

Mangabay online sa www.jw.org/hil.
Magsulat sa pinakamalapit nga adres nga nalista sa pahina 2 sini nga magasin.
Kontaka ang mga Saksi ni Jehova sa inyo lugar.

a Ang mga pagtuon sa Biblia kinaandan nga ginahiwat upod sa mga indibiduwal ukon sa gamay nga grupo sang mga tawo.

b Ginbalhag sang mga Saksi ni Jehova. Sobra sa 230 ka milyon ka kopya sini nga libro ang naimprinta na sa kapin sa 260 ka lenguahe.

BULIG PARA SA MGA PAMILYA

“Sang magtuon sing Biblia ang akon asawa, natalupangdan ko ang iya daku nga pagbag-o. Nangin maayo ang amon pagkabuhi subong pamilya. Luyag ko mahibaluan kon ano ang iya ginatun-an, gani nagtuon man ako. Bangod sang akon natun-an, nangin mas maayo ako nga tawo. Nangin suod ang amon pamilya bangod sang pagtuon sa Biblia.”—Eziquiel.

“Sang nakatuon na ako sing Biblia, gin-untatan ko ang akon bisyo sa droga, ang pag-inom sing sobra nga makahulubog nga ilimnon, kag natun-an ko nga kontrolon ang akon kaakig. Nangin matinlo kag mahipid ang amon balay. Labi ko nga ginpabaloran ang akon pamilya kag nalipay ako sa paghimo sang mga butang nga nagapahalipay sa ila. Mas malipayon na ako subong.”—Karen.

“Ginpakalain ako sang iban nga tawo bangod nagtuon ako sing Biblia. Apang ginsuportahan sang akon bana ang akon desisyon, kag nagsiling sia: ‘Wala ako sing labot kon ano ang ginahambal sang mga tawo. Ang importante sa akon amo ang imo pagbag-o. Padayuna ang imo ginahimo.’ Nangin maayo na gid ang pagkabuhi namon bilang pamilya!”—Viniana.