Tatlo ka Pamangkot ang Nagpabag-o sang Akon Kabuhi

ANG AKON NAGLIGAD:

Nagdaku ako sa Ancram, isa ka gamay nga banwa sa kaumhan sang New York, U.S.A. Ang kalabanan diri may galatasan nga mga baka. Ang matuod, madamo pa ang mga baka sangsa mga tawo sa sini nga banwa.

Isa lang ang simbahan sa sini nga banwa kag diri nagasimba ang amon pamilya. Kada Domingo sang aga, ginapahining ni Lolo ang akon sapatos, dayon nagakadto ako sa Sunday school dala ang akon gamay nga puti nga Biblia nga ginhatag ni Lola. Kami sang akon mga manghod gintudluan nga mangin mapisan, magtahod kag magbulig sa mga isigkatawo, kag magpasalamat sa mga pagpakamaayo nga nabaton namon.

Sang nagdaku na ako, naghalin ako sa balay kag nangin maestra sa isa ka eskwelahan. Madamo ako sing pamangkot parte sa Dios kag sa kabuhi. Ang pila ko ka estudyante maalam gid. Ang iban naman indi masyado kaalam pero maukod sila magtuon. Ang pila may diperensia sa lawas, samtang ang iban naman mapagros kaayo. Nabatyagan ko nga indi patas ang kahimtangan. Kon kaisa ang mga ginikanan sang mga estudyante nga may diperensia sa lawas nagasiling, “Pagbuot sang Dios nga amo sini ang akon bata.” Naghunahuna ako kon ngaa ginatugutan sang Dios nga mabun-ag ang iban nga lapsag nga may diperensia. Kay man, wala man sing nahimo nga sala ang lapsag.

Namensar man ako, ‘Ano ayhan ang mapuslanon nga butang nga himuon ko sa akon kabuhi?’ Nabatyagan ko nga malip-ot lang ang kabuhi. Nagdaku ako sa maayo nga pamilya, nag-eskwela ako sa maayo nga mga eskwelahan, kag karon nagustuhan ko gid ang akon obra. Apang daw may kulang pa sa akon kabuhi. Nagalaum ako nga makapamana, may matahom nga balay kag mga bata, magtrabaho tubtob nga magretiro, kag sa ulihi mag-istar sa balay para sa mga tigulang. Naghunahuna ako kon bala amo lang sini ang kabuhi.

KON PAANO GINBAG-O SANG BIBLIA ANG AKON KABUHI:

Isa ka bes sang tig-ilinit, nagkadto kami sang akon kaupod nga mga manunudlo sa Europa. Ginkadtuan namon ang Westminster Abbey, Notre-Dame de Paris, Vatican, subong man ang madamo nga gamay nga simbahan. Bisan diin ako magkadto, ginapamangkot ko ang parte sa Dios kag sa kabuhi. Sang nagpauli na ako sa Sloatsburg, New York, nagkadto ako sa madamo nga simbahan. Apang wala gid sang nakahatag sing sabat nga nakapakumbinsi sa akon.

Isa ka adlaw, may nagpalapit sa akon nga 12-anyos nga estudyante kag ginpamangkot niya ako sing tatlo ka pamangkot. Una, namangkot sia kon bala nahibaluan ko nga isa sia ka Saksi ni Jehova. Siling ko, huo. Ikaduha, namangkot sia kon luyag ko makahibalo sing dugang pa tuhoy sa mga Saksi ni Jehova. Nagsiling ako liwat, huo. Ikatlo, namangkot sia kon diin ako nagaistar. Sang ginsugiran ko sia sang akon adres, nahibal-an namon nga malapit lang gali ang ginaistaran ko sa ila balay. Wala gid ako maghunahuna nga ining tatlo ka pamangkot sang bata nga babayi makapabag-o sang akon kabuhi sing dayon.

Wala magdugay pagkatapos sadto, nagbisikleta sia pakadto sa amon balay kag nagtuon kami sing Biblia. Ginpamangkot ko sia sang mga ginpamangkot ko man sa madamo nga lider sang mga relihion. Gingamit niya ang akon Biblia, kag sia lang ang nakahatag sing maathag nga mga sabat nga nagpakumbinsi sa akon—mga sabat nga subong ko pa lang nabatian!

Nalipay gid ako kag kumbinsido sa natun-an ko sa Biblia. Natandog gid ako sang ginbasa ko ang 1 Juan 5:19, nga nagasiling: “Ang bug-os nga kalibutan yara sa gahom sang isa nga malauton.” Daw naglinong ang akon hunahuna sang natun-an ko nga indi gali ang Dios ang ginatunaan sang tanan nga kasubo sa palibot naton kundi si Satanas—kag pagadulaon sang Dios ining malain nga kahimtangan. (Bugna 21:3, 4) Natukiban ko nga puede gali mahangpan ang Biblia kon ginapaathag ini sing maayo. Bisan 12 anyos lang ang nagatudlo sa akon, nangatarungan ako nga ang kamatuoran, kamatuoran gid bisan sin-o man ang nagahambal sini.

Apang gusto ko mahibaluan kon bala ginahimo sang mga Saksi ang ila ginabantala. Halimbawa, ginpadaku gid sang bata nga ang matuod nga mga Cristiano mapinasensiahon kag may maayo nga kabubut-on. (Galacia 5:22, 23) Gintilawan ko sia agod makita kon bala may amo sia sini nga mga kinaiya. Isa ka adlaw, ginhungod ko nga maulihi sa amon pagtuon. Naghunahuna ako: ‘Magahulat ayhan sia? Kag maakig bala sia nga naulihi ako?’ Sang ginpundo ko ang akon salakyan, nakita ko sia nga nagahulat sa atubangan sang akon balay. Nagdalagan sia pakadto sa akon kag nagsiling: “Mapauli na kuntani ako kag silingon si Nanay nga tawgan namon ang mga ospital kag mga pulis agod mahibaluan kon bala may natabo sa imo kay wala ka gid nagakaulihi sa aton pagtuon. Nabalaka gid ako sa imo!”

Isa pa ka bes, namangkot ako sing pamangkot nga pagdumdom ko mabudlay gid sabton sang isa ka 12 anyos. Luyag ko makita kon bala maimbento lang sia sing sabat. Sang ginpamangkot ko sia, serioso sia nga nagtulok sa akon kag nagsiling: “Mabudlay ina. Isulat ko ini kag ipamangkot sa akon mga ginikanan.” Dason pag-abot niya para sa masunod namon nga pagtuon, dala niya ang isyu sang Ang Lalantawan nga may sabat sang akon pamangkot. Amo ini ang nagbuyok sa akon sa mga Saksi—ginasabat sang ila mga publikasyon nga pasad sa Biblia ang tanan ko nga pamangkot. Padayon ako nga nagtuon sa bata, kag pagligad sang isa ka tuig ginbawtismuhan ako bilang isa sang mga Saksi ni Jehova.a

MGA BENEPISYO:

Sang nasabat na ang akon mga pamangkot kag kumbinsido sa sini, luyag ko ipaambit ini sa tanan. (Mateo 12:35) Sang primero, namatok ang akon pamilya sa akon bag-o nga pagtuluuhan. Apang sang ulihi, gin-untatan nila ini. Antes mapatay si Nanay, nagtuon sia sing Biblia. Bisan napatay sia antes pa mabawtismuhan, napat-od ko nga nakadesisyon na sia nga alagaron si Jehova.

Sang 1978, ginpamana ko ang isa ka Saksi nga si Elias Kazan. Sang 1981, gin-agda kami nga mangin katapo sang Pamilya Bethel sang Estados Unidos.b Masubo gid nga pagligad lang sang apat ka tuig nga nag-alagad kami didto, napatay si Elias. Bisan balo na ako, nagpabilin ako sa akon asaynment sa Bethel. Nangin masako ako sa sini kag naghatag ini sa akon sing lugpay.

Sang 2006, ginpamana ko si Richard Eldred, nga katapo man sang pamilya Bethel. Padayon kami ni Richard nga nagaalagad sa Bethel. Bangod nahibaluan ko ang kamatuoran tuhoy sa Dios, nabatyagan ko gid nga nasapwan ko indi lamang ang mga sabat sa akon mga pamangkot kundi pati na ang matuod nga katuyuan sang kabuhi—kag nagsugod ini tanan sa tatlo ka pamangkot sa akon sang bata nga babayi.