SABAT SA MGA PAMANGKOT SA BIBLIA
Paano mangin maayo nga ginikanan?
Ginatudluan mo bala ang imo bata nga higugmaon ang dios?
Ang puluy-an diin ang mga ginikanan nagapakita sing gugma kag pagtahod sa isa kag isa maayo gid nga kahimtangan sa pagdaku sang isa ka bata. (Colosas 3:14, 19) Ang maayo nga mga ginikanan nagapalangga kag nagahatag sing komendasyon sa ila kabataan, subong nga ginhatagan sing komendasyon ni Jehova nga Dios ang iya Anak.—Basaha ang Mateo 3:17.
Ang aton langitnon nga Amay nagapamati sa iya mga alagad, kag ginahatagan niya sing igtalupangod ang ila mga balatyagon. Maayo gid nga ilugon sia sang mga ginikanan kag pamatian kon ano ang ginasiling sang ila kabataan. (Santiago 1:19) Dapat nila hangpon ang mga balatyagon sang ila kabataan, lakip na ang negatibo nga mga ginahambal nila.—Basaha ang Numeros 11:11, 15.
Paano mo mapadaku nga responsable ang imo kabataan?
Subong ginikanan, may awtoridad ka sa paghimo sing mga pagsulundan. (Efeso 6:1) Magtuon sa halimbawa sang Dios. Ginpabutyag niya ang iya gugma sa iya mga anak paagi sa maathag nga paghambal sing mga pagsulundan kag sa indi maayo nga mga resulta kon indi ini pagtumanon. (Genesis 3:3) Apang imbes nga piliton ang mga tawo sa pagtuman, ginatudluan niya sila kon paano sila makabenepisyo sa paghimo sing matarong.—Basaha ang Isaias 48:18, 19.
Himua nga tulumuron ang pagbulig sa imo kabataan nga higugmaon ang Dios. Sa amo, mangin maalamon sila bisan pa indi na kamo updanay. Subong nga ang Dios nagatudlo paagi sa halimbawa, tudlui ang imo kabataan nga higugmaon ang Dios paagi sa imo halimbawa.—Basaha ang Deuteronomio 6:5 -7; Efeso 4:32; 5:1.