SABAT SA MGA PAMANGKOT SA BIBLIA

Amo lang bala sini ang kabuhi?

Napaligban mo na bala kon amo lang sini ang kabuhi—paghampang, pag-obra, pagminyo, pagsagod sang pamilya, kag pagtigulang? (Job 14:1, 2) Ginapakita sang Biblia nga bisan ang maalam gid nga mga tawo nagpalibog sa sini.​—Basaha ang Manugwali 2:11.

May katuyuan bala ang kabuhi? Una, dapat kita mamangkot, Paano nagsugod ang kabuhi? Sa tapos mausisa ang dalayawon nga pagdesinyo sang aton utok kag sang tanan nga bahin sang aton lawas, madamo ang nagsiling nga may maalam nga Manunuga nga naghimo sini tanan. (Basaha ang Salmo 139:14.) Kon amo, may rason gid sia sa paghimo sa aton! Ang paghibalo sina nga rason nagahatag sing dugang nga katuyuan sa aton kabuhi.

Ngaa gintuga ang mga tawo?

Ginpakamaayo sang Dios ang una nga mag-asawa kag ginhatagan sila sing makalilipay nga asaynment. Ang iya katuyuan amo nga pun-on nila ang duta, himuon ini nga paraiso, kag mabuhi sing walay katapusan.​—Basaha ang Genesis 1:28, 31.

Ang katuyuan sang Dios wala gilayon natuman bangod nagrebelde ang mga tawo sa iya paggahom. Pero wala nangampo ang Dios sa aton—ukon sa iya katuyuan. Ginapasalig kita sang Biblia nga ang Dios nagapanghikot sa pagluwas sa matutom nga katawhan kag ang iya katuyuan para sa duta matuman! Gani gusto sang Dios nga matigayon mo ang kabuhi nga gusto niya para sa imo! (Basaha ang Salmo 37:29.) Matun-an mo sa Biblia kon paano ka personal nga makabenepisyo sa katuyuan sang Dios.