Magpatawad sing Kinabubut-on

PRINSIPIO SA BIBLIA: “Padayon nga . . . magpinatawaray kamo sing kinabubut-on bisan pa ang isa may rason nga magreklamo sa isa. Subong nga si Jehova nagpatawad sing kinabubut-on sa inyo, amo man sini ang himuon ninyo.”—Colosas 3:13.

Ano ang kahulugan sini? Sa Biblia, ang sala ginapaanggid sa utang kag ang pagpatawad sa pagkanselar sa utang. (Lucas 11:4, footnote) Ang isa ka reperensia nagsiling nga sa Kasulatan, ang Griego nga tinaga nga ginbadbad nga ‘pagpatawad’ nagakahulugan nga “pabay-an na lang ang utang, kag indi na pagsukton.” Gani kon patawaron naton ang nakasala sa aton, ginapabay-an naton ini kag indi na maghulat sing bisan ano nga balos gikan sa nakasala. Ang aton kinabubut-on nga pagpatawad wala nagakahulugan nga ginakunsinti naton ang sala nga buhat ukon ginapakadiutay ang halit sini sa aton. Sa baylo, nagadesisyon kita nga indi maghinakit, bisan pa “may rason [kita] nga magreklamo.”

Praktikal pa bala ini karon? Subong indi himpit nga mga tawo, tanan kita makasala. (Roma 3:23) Gani maalamon gid nga handa kita nga magpatawad sa iban, kay may tion nga kita naman ang kinahanglan patawaron. Isa pa, kon nagapatawad kita, makabenepisyo man kita sa sini. Paano?

Kon nagahupot kita sing kaakig kag nagahinakit—kag wala nagapatawad—ginapabudlayan naton ang aton kaugalingon. Inang negatibo nga mga balatyagon nagadula sang aton kalipay, nagapabudlay sa aton, kag nagahimo sang aton kabuhi nga miserable. Mahimo man kita magbalatian sing grabe. Ang report sang Journal of the American College of Cardiology, ni Dr. Yoichi Chida kag sang propesor sang Sikolohiya nga si Andrew Steptoe, nagsiling: “Ginapakita sang mga pagtuon sining karon lang nga may koneksion ang kaakig kag pagdumot sa CHD [coronary heart disease].”

Binagbinaga naman ang mga benepisyo sang pagpatawad. Kon kinabubut-on kita nga nagapatawad, mahuptan naton ang paghiusa kag kalinong, nga makaamlig sang aton kaangtanan sa iban. Labaw sa tanan, ginailog naton ang Dios, nga kinabubut-on nga nagapatawad sa mga nagahinulsol kag nagapaabot sia nga amo man sini ang aton himuon.—Marcos 11:25; Efeso 4:32; 5:1.